फाइल तस्बिर
काठमाडौं–जहाज उडान गर्ने चालक दलका सदस्य तथा एयर होस्टेसलगायत सम्पूर्ण उड्डयनकर्मीले अबदेखि उडानका क्रममा फोटो तथा भिडियो खिच्न नपाउने भएका छन्।
नियामक निकाय नेपाल नागरिक उड्डयन प्राधिकरणले नेपाली सबै वायुसेवा कम्पनीहरुका चालक दलका सदस्य तथा एयरहोस्टेसले उडानका क्रममा फोटो तथा भिडियो खिच्न नपाउने गरी नयाँ मापदन्ड जारी गरको छ।
प्राधिकरणको फ्लाइट सेफ्टी स्ट्यान्डर्ड विभागले उडान सञ्चालन मापदण्ड संशोधन गर्दै यस्तो नियम लागू गरेको हो। पछिल्लो समय पाइलट तथा एयरहोस्टेसले नै जहाज उडानका क्रममा फोटो तथा भिडियो खिचेर सामाजिक सञ्जालमा हाल्न थालेपछि सुरक्षाको विषयलाई लिएर यस्तो मापदन्ड जारी गरिएको प्राधिकरण महानिर्देशक राजन पोखरेलले बताए।
कसैले फोटो तथा भिडियो खिच्नुपर्ने आवश्यकता भए उडानअघि महानिर्देशक वा अन्य सरोकारवाला अधिकारीसँग लिखित अनुमति लिनुपर्नेछ । जारी भएको मापदन्ड कार्यान्वयनका लागि प्राधिकरणले सबै वायुसेवा सञ्चालक कम्पनीहरुलाई पत्राचार गर्दै सर्कुलर पनि गरिसकेको छ। तर, प्राधिकरणले यात्रुहरुका हकमा भने फोटो तथा भिडियो खिच्न छुट दिएको छ। पर्यटकीय अवधारणामा सञ्चालित पर्वतीय उडानलगायतमा यात्रुहरुले फोटो तथा भिडियोग्राफी गर्न रोक लगाइएको छैन ।
प्राधिकरणको सर्कुलरपछि नेपाल वायुसेवा निगम (नेपाल एयरलाइन्स) ले पनि आफ्ना पाइलट तथा एयरहोस्टेसलाई उक्त मापदन्ड अनुसार काम गर्न सर्कुलरसमेत गरिसकेको छ। प्राधिकरणले जारी गरेको मापदन्ड कार्यन्वयनका लागि निगमले पुस २० गते नै सर्कुलर गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
