वाशिङटन–अमेरिकी संसद भवन क्यापिटल बिल्डिङमा भएको हिंसाका क्रममा ४ जनाको मृत्यु भएको छ। प्रहरीका अनुसार प्रहरीको गोली लागेर एक जनाको र अन्य ३ को मेडिकल इमर्जेन्सीका कारण मृत्यु भएको हो।
मृत्यु हुनेमा अमेरिकी एयरफोर्समा रहिसकेकी एसली बेबिट नामकी महिलासमेत रहेको बताइएको छ। क्यापिटल बिल्डिङमा प्रवेश गर्ने क्रममा प्रहरीले चलाएको गोली लागेर उनको मृत्यु भएको जनाइएको छ।
प्रहरीले हालसम्म ५२ प्रदर्शनकारीलाई पक्राउ गरिसकेको छ। तीमध्ये ४७ जनालाई कर्फ्यु तोडेको आरोप लगाइएको छ।
राष्ट्रपति डोनाल्ड ट्रम्पका समर्थकहरुले संसद भवनमा आक्रमण गर्नुका साथै हिंसा मच्चाएपछि वाशिङटन डिसीमा कर्फ्यु लागू गरिएको थियो। ट्रम्प समर्थकहरुले बुधबार क्यापिटल बिल्डिङमा प्रवेश गरेर हिंसा सुरु गरेका थिए। राष्ट्रपतिमा निर्वाचित जो बाइडेनको विजयलाई औपचारिकता दिन लागिएका बेला यो हिंसा भएको हो। संसदमा बहस चलिरहेका बेला अचानक ट्रम्पसमर्थक भवनभित्र प्रवेश गरेका थिए। सोहीकारण बहस रोकिएको थियो। पछि संसद बैठक पुनः सञ्चालनमा ल्याइएको थियो।
अमेरिकी सभामुखको कुर्सीमा प्रदर्शनकारी।
ट्रम्प समर्थकहरुले निर्वाचन रद्द गर्नुपर्ने माग गर्दै प्रदर्शन गरेका थिए। सो क्रममा प्रहरी र प्रदर्शनकारीबीच हिंसात्मक झडपसमेत भएको थियो। अवस्था नियन्त्रणबाहिर गएपछि नेशनल गार्डलाई परिचालित गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1774514962.png)
-1764146706.png)
