अब धुलिखेलमा मोटरल्यान्ड [फोटो फिचर]

अन्य

सराेज तामाङ शुक्रबार, पुस १७, २०७७ १७:४७

काभ्रे- काभ्रेको धुलिखेलमा ‘हिमालयन मोटरल्याण्ड सर्किट स्पोर्टस्’ मार्फत नौलो खेल भित्र्याइएको छ। कार्ट, बाइक र कार रेसका लागि हिमालयन मोटरल्याण्ड सर्किट स्पोर्टसको उद्घाटन भएको छ। शुक्रबार काभ्रेको धुलिखेलमा अल्टिमेट हिमालयन मोटर ल्याण्डले मोटर स्पोर्टसको विभिन्न खेलको प्रदर्शन गर्दै उद्घाटन गरेको हो।

४ करोड ५० लाख रुपैयाँमा निर्माण भएको यो सर्किटमा अफ रोडतर्फ १.५ किलोमिटरको छ भने पिच ट्रयाक ८ सय मिटरको छ। यो खेलमा निर्धारित दूरी निश्चित समयमा पार गर्नु पर्छ। मोटरसाइकल विधातर्फ रेसमान्डु, क्रसमान्डौं रहेका छन् भने मोटर स्पोर्टस् विधामा अटो जिमखाना र कार्ट विधाअन्तर्गत युथ कार्ट १४ वर्षमुनिका तथा राष्ट्रिय च्याम्पियनसिप गर्ने अल्टिमेट हिमालयन मोटर ल्याण्डले जानकारी दिएको छ।

उद्घाटन कार्यक्रममा धुलिखेल नगरपालिकाका मेयर अशोककुमार व्याञ्जु, राष्ट्रिय खेलकुद परिषद् राखेपका उपाध्यक्ष शिव कोइराला, तथा राखेप सदस्यहरुको उपस्थितिमा उद्घाटन भएको थियो। अल्टिमेट हिमालयन मोटर ल्याण्डले एकेडेमी मोडलमा ‘हिमालयन मोटरल्याण्ड सर्किट स्पोर्टस्’ लाई अघि बढाएको छ।

धुलिखेल नगरपालिकाका मेयर अशोककुमार व्याञ्जुले एकेडेमी कै मोडलमा जाने भए नगरपालिकाले १० लाख सहयोग गर्ने बताए। उनले भने, ‘यो खेललाई विकास गर्न एकेडेमी सञ्चालन गर्नु पर्छ। एकेडेमी सञ्चालन गर्ने हो भने सुरुमा नगरपालिकाले १० लाख सहयोग गर्छ। प्रतियोगिता आयोजना गर्न प्रत्येक वर्ष ५ लाखको दरले सहयोग गर्ने आश्वसन दिन्छु’। यस्तै, धुलिखेल अल्टिमेट मोटरल्यान्ड सर्किटका अधयक्ष अनिल बरालले राष्ट्रका लागि राम्रा खेलाडी उत्पादन गर्न मद्दत पुग्ने बताए।