काठमाडौं– नेपाल एयरलाइन्सको जहाजमार्फत् हङकङ पुगेका यात्रुमा कोरोना संक्रमण फेला परेको भन्दै ४ पटकसम्म उडान प्रतिबन्ध खेपेको नेपाल एयरलाइन्सको अब भने नियमित उडान हुने भएको छ।
पछिल्लो पटक चौथो पटकको उडान प्रतिबन्ध फुकुवासँगै हङकङ उडेको नेपाल एयरलाइन्सलाई यस पटक भने हङकङ विमानस्थलले प्रतिबन्ध लगाएको छैन।
४ पटकसम्म नेपाल एयरलाइन्सलाई हङकङले उडानमा प्रतिबन्ध लगाएको थियो। हङकङले नेपाल एयरलाइन्सको जहाजमार्फत् आएका यात्रुमा कोरोना देखिएको भन्दै उडान प्रतिबन्ध लगाउँदै आएको थियो। ४ पटकको उडान प्रतिबन्ध फकुवा भएपछि नेपाल एयरलाइन्सले पुस ६ गते उडान गरेको थियो। पुस ६ गतेको उडानका नेपाल एयरलाइन्समार्फत् हङकङ पुगेका १ जना यात्रुमा कोरोना देखिए पनि हङकङले उडानमा प्रतिबन्ध लगाएको छैन।
बारम्बार हङकङ उडानमा प्रतिबन्ध लाग्न थाले पनि निगमका महाप्रबन्धक डिमप्रकाश पौडेलले निजी ल्याबको कोरोना परीक्षण रिपोर्टलाई मान्यता नदिने भन्दै सरकारी ल्याबको रिपोर्टलाई मात्रै मान्यता दिने निर्णय गरेका थिए। सरकारी ल्याबको रिपोर्टलाई मात्र मान्यता दिँदा पनि पुनः नेपाल एयरलाइन्सको जहाजमार्फत् हङकङ पुगेका यात्रुमा कोरोना देखिएको भन्दै हङकङले उडानमा प्रतिबन्ध लगाएको थियो।
त्यसपछि भने महाप्रबन्धक पौडेलले सरकारी ल्याबको रिपोर्टमा पनि ७२ घण्टाको सट्टा ४८ घण्टा भित्रको रिपोर्टलाई मात्रै मान्यता दिने निर्णय गरेका थिए। उक्त निर्णय भने प्रभावकारी भएको छ। जसका कारण निगमको जहाजमार्फत् हङकङ पुगका यात्रुमा कोरोना देखिएको छैन। हङकङले पहिलो पटक अक्टोबर ४ देखि नोभेम्बर १७ सम्म, दोस्रोपटक अक्टोबर २० देखि नोभेम्बर ३ सम्म र तेस्रो पटक नोभेम्बर १२ देखि २५ सम्म र चौथो पटक ३ डिसेम्बरदेखि १७ डिसेम्बर सम्म उडान प्रतिबन्ध लगाएको थियो।
अब नेपाल एयरलाइन्सले हङकङ सातामा एउटा उडान गर्नेछ। हङकङ उडान प्रतिबन्धका कारण नेपाल एयरलाइन्सले १० करोड रुपैयाँभन्दा बढी आम्दानी पनि गुमाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
