बोक्सीको आरोपमा यातना खेपेकी राधा भन्छिन्- गाउँघरमा अझै पनि बोक्सी भन्छन्

समाज

नेपाल लाइभ मंगलबार, वैशाख २५, २०७५ १५:२८

कैलाली- गत फागुन २४ गते बोक्सीको आरोपमा निर्घात कुटपिट र यातना खेपेकी घोडाघोडी नगरपालिका–५ देउकलियाकी राधा चौधरीले गाउँघरमा असामान्य व्यवहार भोग्नुपरेको गुनासो गरेकी छन्।

घटनापछि उपचार गरेर केही समयपछि नै आफ्नो गाउँ फर्केकी उनले गाउँघरका कतिपयले आफूलाई अझै पनि बोक्सी भन्ने गरेको सुनाइन्।

घोडाघोडी नगरपालिकाकै सुखडस्थित राष्ट्रिय माविमा कक्षा ११ मा अध्ययनरत उनले भनिन्, 'विद्यालयमा शिक्षक र साथीभाइले त राम्रो व्यवहार गर्छन्। तर, गाउँघरका कतिपयले अझै बोक्सी भन्ने गरेका छन् ।’

राधाले गाउँमा छरछिमेकीहरु आफूसँग पहिले जस्तै बोल्ने गरे पनि अरु गाउँलेहरु भने नबोल्ने गरेको तीतो पोखिन्।

मंगलबार पढाइ खर्चवापत प्राप्त भएको सहयोग रकम बुझ्ने कार्यक्रममा उनी गाउँमा खेपिरहेको भोगाइ सञ्चारकर्मीसामु पोख्दै थिइन्।

कुटपिटको घटना भएको केही दिनमै प्रदेश ७ को सरकारले राधाको उच्च शिक्षा र स्वास्थ्य उपचार खर्च व्यर्होने आश्वासन दिएको थियो। तर, यो वर्षको वार्षिक शुल्क आफैंले तिरेको उनले बताइन्।

अध्ययन खर्चका लागि ५० हजार सहयोग

यसैबीच राधाले अध्ययन खर्चका लागि विदेशबाट पठाइएको ५० हजार रुपैयाँ पाएकी छन्। हाल बेलायमा बस्दै आएकी खोटाङ बाक्सीला ८ की जयन्ती राईले पत्रकार दीपक उपाध्याय मार्फत पठाएको रकम मंगलबार जिल्ला प्रशासन कार्यालय कैलाली मार्फत राधालाई हस्तान्तरण गरिएको छ।

राधामाथि भएको अमानवीय घटनाबारे विभिन्न सञ्चारमाध्यमबाट थाहा पाएकी राईले चित्रकला मार्फत संकलन भएको रकम राधालाई सहयोग गरेकी हुन्। राईले आफ्नो भतिजीको पास्नीमा आएका छरछिमेकका बालबालिकालाई चित्रकलामा सहभागी गराएर उक्त रकम संकलन गरेको पत्रकार उपाध्यायले बताए ।

यही बैसाख ३० गतेबाट सुरु हुने कक्षा ११ को परीक्षाको तयारी गरिरहेकी राधाले अध्ययन खर्च पठाइदिने राईलाई धन्यवाद दिइन्।

बोक्सी भगाउने भन्दै राधालाई कुटपिट गर्ने देउकलियाकै रामबहादुर चौधरी उर्फ भोलेबाबा, किस्मती चौधरी लगायतलाई पुर्पक्षका लागि थुनामा राखिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

बालिकालाई सामूहिक बलात्कार गरेको आरोपमा चार जना पक्राउ

सेयर धितो कर्जाको जोखिम भार घट्यो

अनेरास्ववियुमा ३२ वर्षे उमेर हद लगाउने एमालेको निर्णय