काठमाडौं–राष्ट्रिय ध्वजवाहक नेपाल एयरलाइन्सले चिनियाँ जहाज एमए–६० सदाका लागि उडान बन्द गरेको १२ दिनपछि पाइलट गोपाल सिंह विष्टको राजीनामा पत्र फिर्ता गर्दै काममा बोलाएको खुलासा भएको छ।
विष्टले नोभेम्बर २४ मा राजीनामा बुझाएका थिए। त्यसको झन्डै ९ महिनापछि निगमका अपरेशन विभागका प्रमुखले विष्टको राजीनामा फिर्ता गराउँदै काममा बोलाउन भनेर मानव संसाधन विभागलाई पत्र पठाएको खुलासा भएको छ।
निगमले विष्टलाई काममा बोलाउँदा उनले उडान गर्ने चिनियाँ जहाज एमए–६० जहाज भने सदाका लागि बन्द गर्ने निर्णय भइसकेको थियो।
निगमले साउन १५ अर्थात् जुलाई ३० मा चिनियाँ जहाज उडान बन्द गरेको थियो। उडान बन्द भएको जहाजका पाइलटको राजीनामा स्वीकृत गर्नुको सट्टा १२ दिनपछि राजीनामा फिर्ता गराउँदै काममा बोलाउन लागेको हो। विष्टले अगष्ट १२ मा राजीनामा फिर्ता भएको पत्र निगममा बुझाएका थिए। त्यसपछि अपरेशन विभागका प्रमुखले राजीनामा फिर्ता गर्ने निर्णय गर्दै मानव संसाधन विभागलाई अनुरोध गरेको पत्र नेपाललाइभले प्राप्त गरेको छ।
निगमले उडान बन्द गरेको चिनियाँ जहाज कुनै बेला उडान गर्नुपरेको अवस्थामा स्थायी पाइलट जगेडामा छन्। तर पनि आर्थिक भार थपिने गरी विष्टको राजीनामा स्वीकृत नगरी काममा बोलाइएको हो।
निगमका चिनियाँ जहाज उडान गर्ने स्थायी पाइलट प्रसन्न राणा अहिले पनि छन्। यस विषयमा निगमका महाप्रबन्धक डिमप्रकाश पौडेललाई सोध्दा उनले यस विषयमा आफूलाई जानकारी नभएको बताउँदै सोधखोज गरेर जानकारी दिने बताए।
पाइलट विष्टले उमेर हदका कारण २०७५ फागुन २८ गतेबाट अवकाश पाएका थिए। तर, उनलाई तत्कालीन कार्यकारी अध्यक्ष मदन खरेलले पुनः करारमा नियुक्ति गरेका थिए।
उनलाई करारमा नियुक्ति गर्दा दोहोरो जन्ममितिको विषय समेत विवादमा परेको थियो।
२०७५ फागुन २७ मा ५८ वर्ष पूरा भएकाले विष्टले २०७५ फागुन २८ गतेबाट सेवाबाट अनिवार्य अवकाश पाउने भन्दै निगमले पत्र लेखेको थियो।
यसका आधारमा उनको नागरिकता उल्लेख भएको जन्म मिति २०१७ फागुन २९ गते हुन्छ। तर, विष्टको पाइलट लाइसेन्स र पासपोर्टमा उल्लेख भएको जन्म मिति भने सन् १९६३ डिसेम्बर १२ उल्लेख छ। यो भनेको २०२० मंसिर २६ गते हुन आउँछ।
‘यस विभागमा रहेको तपाईंको वैयक्तिक अभिलेख अनुसार मिति २०७५ ÷११ ÷२७ मा तपाईंको उमेर ५८ वर्ष पूरा हुने भएकाले निगमको कर्मचारी सेवा सर्त सम्बन्धको विनियमावली २०६८ को विनियम ६३ अनुरुप मिति २०७५ /११/२७ देखि उमेर हदका कारण निगमको सेवाबाट अनिवार्य अवकाश हुने व्यहोरा अग्रिम जानकारी गराइएको छ,’ उक्त सयममा एयरलाइन्स व्यवस्थापनले विष्टलाई लेखेको पत्रमा भनिएको थियो, ‘आफ्नो बिदा तथा नोकरी विवरणसम्बन्धी अद्यावधिक जानकारीका लागि अवकाश हुने मितिले एक हप्ताअगावै मानव संशाधन विभागको अभिलेख शाखामा सम्बन्धित फाँटवालाकहाँ सम्पर्क राख्न हुनसमेत अनुरोध छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
-1765273665.jpg)
