काठमाडौं- युवाहरुलाई कतार पुलिसमा रोजगारीको प्रलोभन देखाएर अनधिकृत रुपमा बिना पूर्वस्वीकृति अन्तर्वार्ता लिने ३ वटा म्यानपावर कम्पनीहरुको कारोबार रोक्का गरिएको छ। एसओएस म्यानपावर, डीडी ह्युमन रिसोर्स म्यानपावर र होप इन्टरनेसनल म्यानपावरको कारोबार रोक्का गरिएको हो।
‘हामीले म्यानपावरको कारोबार रोक्का गरेका छौँ। छापा मार्ने क्रममा नै कागजात जफत गरी म्यानपावर सञ्चालकहरुलाई विभागमा उपस्थित हुनका लागि २४ घण्टे पत्र समेत काटेका छौँ,’ वैदेशिक रोजगार विभागका निर्देशक टिकामणी नेउपानेले नेपाल लाइभसँग भने । कारोबार रोक्का गरेसँगै अब आवश्यक अनुसन्धान तथा कारबाही प्रकृया अगाडि बढाइने उनले जानकारी दिए।
सोमबार वैदेशिक रोजगार विभागले एसओएस म्यानपावर र डीडी ह्युमन रिसोर्स म्यानपावरमा छापा मार्ने क्रममा करिब ८ सय युवाहरुलाई कतार पुलिसको काममा पठाउने भन्दै पूर्वस्वीकृति नै नलिएको डिमाण्ड देखाएर अन्तरवार्ता लिइरहेको फेला पारेको थियो। त्यस्तै मंगलबार होप इन्टरनेसनल म्यानपावरमा समेत सोही कामका लागि भन्दै अनधिकृत रुपमा अन्तरवार्ता लिइरहेको भेटिएको थियो।
यो पनि पढ्नुहोस्
म्यानपावरमा छापा मार्ने क्रममा वैदेशिक रोजगार विभागको टोलीले नेपालका लागि कतारी दूतावासको गाडी समेत फेला पारेको थियो। यसमा दूतावासको समेत मिलोमतो रहेको हुन सक्ने आशंका गरिएको छ। वैदेशिक रोजगार व्यवसायी संघले समेत यसभित्र निकै ठूलो चलखेल रहेको ठहर गरेको छ। दूतावासले भने आफ्नो कुनै संलग्नता नरहेको दूतावासको गाडीमात्र चेकजाँचका लागि आएको टोलीलाई दिएर पठाएको दाबी गरेको छ।
पछिल्लो समय म्यानपावरहरुले युवाहरुलाई अनधिकृत रुपमा चर्को रकम असुलेर रोजगारदाता मुलुकमा पठाउने गरेको पाइएको छ।
प्रतिकामदार ३ देखि ५ लाखसम्म असुलेर म्यानपावरहरुले कामदारहरुलाई अवैध रुट तथा भिजिट भिसाको माध्यमबाट रोजगारदाता मुलुक छिराउने गरेको पाइएको हो। कतिपय म्यानपावरले वैदेशिक रोजगारमा नपठाएर अलपत्रसमेत पार्ने गरेका छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।