काठमाडौं- झापाको बालुवाटार काण्ड भनेर चिनिएको दमकको १० बिघा सरकारी जग्गा आफ्नो नाममा बनाउने मुख्य अभियुक्त पक्राउ परेका छन्। मंगलबार काठमाडौंबाट उनलाई सम्पत्ति शुद्धीकरण अनुसन्धान विभागको टोलीले पक्राउ गरेको हो।
‘झापाको दमकका गगन पुरी भनेर चिनिने रेवतराज पुरालाई पक्राउ गरिएको हो,’ विभागका उच्च स्रोतले नेपाल लाइभसँग भन्यो, 'पुरीमाथि लागेका आरोपबारे विभागले अनुसन्धान गरिरहेको छ।'
दमक नगरपालिका-८ स्थित सरकारी जग्गा कीर्ते गरी व्यक्तिको नाममा दर्ता गरेको अभियोगमा सत्तारुढ नेकपाका नेता गगन पुरीलगायतविरुद्ध विभागमा उजुरी परेको थियो।
जग्गा हिनामिना प्रकरणमा संलग्न पुरी, उनका दाजु देवकुमार पुरी, मनमाया पुरी, केशावती पुरी, भूमिका कोइराला, रमेश ढकाल, रमेश गिरीलगायत नापी कार्यालयका कर्मचारी विन्देधर पन्जियार, विनोदकुमार मण्डल, सीताराम यादव, इन्द्रिस नदाफ, शेषबहादुर श्रेष्ठविरुद्ध पनि झापा जिल्ला अदालतमा मुद्दा दायर भएको थियो।
मालपोतका कर्मचारीसमेतको मिलेमतोमा पुरीले सरकारी जग्गा आफ्नो र आफ्ना परिवारका सदस्यका नाममा पारेको आरोप लागेको छ।
पुरीले दमकमा विश्वस्तरीय पार्क बनाउने भन्दै प्रचार गरेका थिए। अजेयराज सुमार्गी, प्रधानमन्त्रीका स्वकीय सचिव इन्द्र भण्डारी, नेकपा केन्द्रीय सदस्य देवेन्द्र दाहाल, दमकका स्थानीय ठेकेदार गणेश बस्नेतको संलग्नतामा पार्क बन्न लागेको भनी पुरीले प्रचार गर्दै आएका थिए। त्यही कीर्ते गरिएको जग्गामा करीब १६ अर्ब रुपैयाँ लगानीमा पार्क बनाउने बताइँदै आएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।