काठमाडौं- झापाको दमक नगरपालिका-८ स्थित बालुवाटार नामले चिनिने सरकारी जग्गा कीर्ते गरी व्यक्तिको नाममा दर्ता गरेको अभियोगमा नेकपाका नेता गगन पुरीसहित १६ जनाविरुद्ध मुद्दा दायर भएको छ। नेकपा नेता पुरी, उनका परिवारका सदस्य र मालपोत कार्यालयका कर्मचारीलाई विपक्षी बनाएर जिल्ला सरकारी वकिलको कार्यालय भद्रपुरले झापा जिल्ला अदालतमा सरकारी छाप दस्तखत कीर्ते मुद्दा दायर गरेको हो।
नेकपा नेता पुरीविरुद्ध २ करोड ६९ लाख ५५ हजार रुपैयाँभन्दा बढीको बिगो र हदैसम्मको कैद सजाय माग गरिएको छ। पुरीले सरकारी कर्मचारीको मिलेमतोमा बालुवाटार नामले चिनिने दमक-८ को सरकारी जग्गा गैरकानुनी रुपमा आफूलगायत आफू निकटका नाममा नामसारी गरेको अनुसन्धानमा पाइएको थियो।
प्रहरीले गरेको अनुसन्धानमा कुल ३० बिघा जग्गामध्ये ९ बिघा कीर्ते गरेको र बाँकी २१ बिघा आफ्नो नाममा स्रेस्ता कायम गरी विभिन्न व्यक्तिलाई बिक्रीसमेत गरेको पाइएको थियो।
जग्गा हिनामिना प्रकरणमा संलग्न (रेवतराज) भनिने पुरी, उनका दाजु देवकुमार पुरी, मनमाया पुरी, केशावती पुरी, भूमिका कोइराला, रमेश ढकाल, रमेश गिरीलगायत नापी कार्यालयका कर्मचारी विन्देधर पन्जियार, विनोदकुमार मण्डल, सीताराम यादव, इन्द्रिस नदाफ, शेषबहादुर श्रेष्ठविरुद्ध मुद्दा दायर भएको गरिएको छ।
मालपोत कर्मचारी ठाकुरप्रसाद निरौला, बाबुराम भट्टराई, सोमप्रसाद पोखरेल, र खगेश्वर भट्टराईविरुद्ध बिगोसहित सरकारी छाप दस्तखत कीर्तेको माग दाबीसहित अभियोग तयार भएको छ।
उनीहरूलाई मुलुकी ऐन किर्ते कागजको ७ नम्बर बमोजिम बिगो दावी र १२ नम्वर बमोजिमको थप सजाय हुन माग दाबी लिइएको सरकारी वकिलको कार्यालय झापाले जनाएको छ।
मुद्दाको अनुसन्धानका क्रममा देखिएका दमक–८ स्थित सिट नं १७९–००५५, १७९ –००५६–१६,१७ र २१ र सिट नं.. १७९–००९५ सरकारी ऐलानी जग्गा आफ्नो नाउँमा दर्ता गरेको र साविकको भूगोलमा एकातर्फ रहेको जग्गालाई नापी टोलीको मिलोमतोमा अर्को भूगोलमा देखाइ अम्बरबहादुर कार्कीलगायत १ सय ४८ जनालाई बिक्री गरेको पाइएको छ ।
मालपोत ऐन, २०३४ को परिच्छेद ७ को दफा २४ को उपदफा १ र २ बमोजिम कारबाही हुनुपर्ने मागदाबी सरकारी वकिलको कार्यालय झापाले अभियोग दायर गरेको छ।
साथै दमक-८ स्थित सरकारी जग्गालाई २ नम्बर नापी टोली समेतको मिलेमतोमा पुरीले उक्त जग्गा आफ्नो नाममा दर्ता कायम गरी एकपछि अर्कोको नाममा बिक्री गरेर गैरकानुनी रुपमा सम्पति आर्जन गर्ने मनसाय गरेको देखिएको आरोपपत्रमा उल्लेख छ।
सम्पत्ति शुद्धीकरणमा अनुसन्धान गर्न सिफारिस
जग्गा किर्तेमा संलग्न भएको आरोप लागेका रमेश ढकाल, भूमिका कोइराला, केशावती पुरीलगायतलाई सम्पत्ति शुद्धिकरणमा पनि अनुसन्धान गर्न सरकारी वकिलले सिफारिस गरेको छ।
गैरकानुनी रुपमा सम्पत्ति आर्जन गर्दै उनीहरुले सम्पत्ति शुद्धीकरण गरेको देखिएकाले थप अनुसन्धान गरि मुद्दा दर्ता गर्नुपर्ने राय सरकारी बकिलले दिएको छ । सम्पत्ति शुद्धिकरण विभागमा अनुसन्धान तथा कारबाहीका लागि पत्र लेखेर पठाइएको छ।
भ्रष्टाचारमा अनुसन्धान गर्न अख्तियारलाई पत्र
सरकारी जग्गा किर्ते गर्ने कार्यमा संलग्न सरकारी कर्मचारी र अन्यलाई भ्रष्टाचार मुद्दामा अनुसन्धान गर्न पनि पत्र लेखिएको छ।
सरकारी ऐलानीप्रति जग्गा किर्ते गरी एवं आफ्नो प्रमाण भिडाइ फरक ठाउँको जग्गा हडपी आफ्नो नाममा श्रेस्ता कायम गरी व्यक्तिको नाममा कायम गर्ने कार्यमा संलग्नहरुलाई अनुसन्धान गर्न भनिएको छ।
नापी, मालपोत कार्यालयका कर्मचारी, लेखापढी व्यवसायी र अन्य संलग्नको हकमा अख्तियार दुरुपयोग अनुसन्धान आयोगको क्षेत्राधिकार आकर्षित हुने देखिएकाले थप अनुसन्धान गर्न अख्तियारलाई पठाइएको सरकारी वकिलको कार्यालय झापाले जनाएको छ।
त्यस्तै, पुरीले बैंक र वित्तीय संस्थामा राखिएको धितोका कारण बैंकले जग्गा लिलामसमेत गरेको पाइएको छ।
११ बिघा सरकारी जग्गा पुरीले कब्जा गर्ने प्रयास गरेको खुलेसँगै गत मंसिरदेखि सिआइवी र इलाका प्रहरी कार्यालय दमकले अनुसन्धान सुरु गरेको थियो। अनुसन्धानकै क्रममा अन्य ३० बिघा सरकारी जग्गा व्यक्तिको नाममा सार्ने कार्यमा पनि पुरीकै संलग्नता देखिएको थियो । जिल्ला अदालत झापाले सरकारी छाप र हस्ताक्षर किर्ते गरेको आरोपमा पुरीलाई पहिलोपटक गत मंसिर १९ गते पक्राउ पुर्जी जारी गरेको थियो। तर, पुरी फरार भएका थिए।
जिल्ला अदालत झापाले सरकारी छाप र हस्ताक्षर किर्ते गरेकै आरोपमा पुरीलाई पुनः पुस २४ गते पक्राउपुर्जी जारी गरेको थियो। पुरीलगायत फरार प्रतिवादीको हकमा अदालतबाट नै म्याद जारी गरिनेछ।
आरोपी पुरी पूर्व एकीकृत माओवादीका केन्द्रीय नेता हुन्। उनी स्थानीय तहको निर्वाचनमा प्रधानमन्त्री केपी ओलीको गृहनगर दमक नगरपालिकाको मेयर पदका उम्मेदवारसमेत बनेका थिए।
पार्कको नाममा ठगी
पुरीले दमकमा विश्वस्तरीय पार्क बनाउने भन्दै प्रचार गरेका थिए।
अजेयराज सुमार्गी, प्रधानमन्त्रीका स्वकीय सचिव इन्द्र भण्डारी, नेकपा केन्द्रीय सदस्य देवेन्द्र दाहाल, दमकका स्थानीय ठेकेदार गणेश बस्नेतको संलग्नतामा पार्क बन्न लागेको भनी पुरीले प्रचार गर्दै आएका थिए।
त्यही कीर्ते गरिएको जग्गामा करीब १६ अर्ब रुपैयाँ लगानीमा पार्क बनाइने भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
