प्रधानमन्त्री ओलीसँगको भेटबारे किन बोल्दैनन् देउवा?

राजनीति

लिलु डुम्रे सोमबार, मंसिर ८, २०७७ १७:१३

काठमाडौं- प्रधानमन्त्री केपी शर्मा ओलीको अभिव्यक्ति,कार्यशैली, प्रतिपक्ष दलसँगको व्यवहारमा दर्जनौं प्रश्न कांग्रेसले उठाउँदै आइरहेको छ। तर, राज्य सञ्चालनमा ओलीको व्यवहारले ‘आजित’ कांग्रेसका सभापति शेरबहादुर देउवाले उनै प्रधानमन्त्री ओलीसँग भेट गरेका छन्। तर यसबारे न त प्रधानमन्त्री ओली बोल्छन्, न प्रधानमन्त्रीको सचिवालयका सदस्यहरू नै प्रष्ट पार्छन्, न त कांग्रेस सभापति देउवा नै। छलफलबारे सभापति शेरबहादुर देउवाले औपचारिक रूपमा मुख नखोलेपछि विभिन्न शंकाउपशंका उब्जिएका छन्। कांग्रेसका नेताहरूले आफ्ना व्यक्तिगत धारणा सार्वजनिक गरिरहेका छन्।

मूलतः कांग्रेस संस्थापन पक्षले ओली-देउवाबीचको भेटबारेमा लुकाउन खोजेको थियो। तर मिडियाहरूमा आइसकेपछि अब छिपाउने अवस्था छैन। तर प्रष्ट नपारिदिनाले शंका निवारण भएका पनि छैनन्।

यसपटकको भेटबारे आधिकारिक रूपमा कुनै पनि कुरा नखुलाएका देउवाले यसअघि भने प्रेस नोटका रूपमा खुलाउँदै आएका थिए। साउन ८ गते प्रधानमन्त्रीसँगको भेटमा सभापति शेरबहादुर देउवाले राखेका धारणाबारे प्रेस नोटमार्फत् सार्वजनिक गरिएको थियो। नोटमा भनिएको थियो, ‘कोरोना सृजित चुनौतीहरुका कारण उब्जिएका विभिन्न क्षेत्रका असन्तुष्टि र आन्दोलनहरुले अघि सारेका जायज मागहरूलाई गम्भीरतापुर्वक लिएर सम्बोधन गर्न पनि सभापतिले प्रधानमन्त्रीको ध्यानाकर्षण गराउनु भएको छ।’

त्यस अघि असार २० मा प्रधानमन्त्रीलाई भेटेको देउवाले कोरोना संक्रमणमा सरकारी असफलता, अनियमितता र पार्टीले उठाएका मागलाई सम्बोधन गर्न आग्रह गरिएको थियो। सात बुँदे माग राख्दै कार्यान्वयनको माग देउवाले गरेका थिए।

विगतमा वालुवाटार छलफल बारे जानकारी गराउने प्रमुख प्रतिपक्ष दलले शनिबारको भेट गुपचुपमै राख्ने प्रयास गर्‍यो। दुई पक्षको भेटको विषयमा सत्तारुढ दल नेकपा मौन त छँदैछ। कांग्रेसले पनि सत्तापक्षको ‘लाइन’ लिएको छ।

शनिबारको भेट विगतकै निरन्तरतामा थिएन। संवैधानिक निकाय र विश्वविद्यालयका पदाधिकारी मनोनयन केन्द्रित संवाद भनिएपनि वार्ता त्यतिमा मात्रै सिमित नभएको ‘छिपाउने प्रवृतिले’ स्पष्ट पारेको छ। दुई पक्षले संवादका विषय सार्वजनिक नगरेपछि अनेक आशंकालाई थप मलजल गरेको छ। नेकपा भित्रको विवाद उत्कर्षमा पुगेकै बेला भएको ‘गुपचुप’ भेटले सत्ताकेन्द्रित संवाद भएको बुझ्न सकिने ठाउँ छ। तथापि, दुवै पक्षले भेट भएको भएको हो वा होइन स्पष्ट भन्न सकिरहेका छैनन्।

प्रधानमन्त्री ओलीको सत्ता ‘धर्मराएको’ बेला प्रमुख प्रतिपक्ष दलका सभापतिले भेट्नु अर्थपूर्ण रुपमा हेरिएको छ। शनिबारको छलफल ‘सत्ता स्वार्थ’केन्द्रित रहेको बुझाई कांग्रेसकै नेताहरुको भएकाले सामान्य भेटका रुपमा मात्र अर्थ्याउन सकिन्न।

शिनबार आफ्ना विश्वासपात्र रमेश लेखकलाई साथै लिएर देउवा बालुवाटार छिरेका थिए। बालुवाटार छिरेको भनिएका लेखक आफू नगएको दाबी गर्छन्।प्रधानमन्त्री र देउवाबीच भएको संवादलाई भने उनले टार्न सकेनन्। नेकपामा विवाद बढ्दै गएपछि प्रधानमन्त्री र देउवा निकटका व्यक्तिहरुको प्रत्यक्ष/अप्रत्यक्ष संवाद बढेको छ। देउवाले तिहारअघि आफ्ना विश्वासपात्र ज्ञानेन्द्रबहादुर कार्कीलाई राष्ट्रपति विद्यादेवी भण्डारीलाई भेट्न पठाएका थिए। राष्ट्रपतिसँग भेट भएको स्वीकारेका कार्कीले संवादमा भएका कुराकानीबारे भने खुलाउन चाहेनन्।

प्रधानमन्त्री ओली पार्टीभित्र संकटमा परेपछि सत्ता गठबन्धनका लागि देउवाको सहयोग खोजेका छन्। यसअघि पनि पार्टी विवाद उत्कर्षमा रहेकै बेला प्रधानमन्त्री ओलीको दूत बनेर सहकार्यको प्रस्ताव सहित सुवासचन्द्र नेम्बाङ बुढानीलकण्ठस्थित देउवा निवास पुगेका थिए। उनै नेम्बाङ शनिबारको छलफलमा पनि सहभागी थिए।

नेकपाकै स्पष्ट बहुमतप्राप्त सरकार हुँदाहुँदै कांग्रेससँगको सहकार्य खोजेपछि प्रश्न उठ्नु स्वभाविक हो। ३१ असारमा कांग्रेस प्रवक्ता विश्वप्रकाश शर्माले भनेका थिए, ‘प्रधानमन्त्रीको सोच, शैली,अभिव्यक्ति र व्यवहार सम्पूर्ण रुपले बदल्ने या प्रधानमन्त्रीनै बदल्ने, उहाँकै दल नेकपाको बिषय हो।’

सत्ता परिवर्तनमा कांग्रेस संलग्न नहुने अभिव्यक्ति दिएका प्रवक्ताले शनिबारको उठेका विषय खुलाउनै चाहँदैनन्। बालुवाटारको भेट ‘होइन’ वा ‘हो’ भन्न पनि उनी सक्दैनन्। विगतमा प्रेस नोट जारी गर्ने कांग्रेसले शनिबारको भेटबारे किन सार्वजनिक नगरिएकोबारे प्रवक्ता शर्मासँग नेपाल लाइभले जिज्ञासा राख्दा उनले भने, 'ट्विटमा जति लेखिएको त्यति नै हो। पार्टीको अफिसियल धारणा जति हो, ट्विटमा राखेको छु। हेर्नू न।’

सभापतिसँग व्यक्तिगत रुपमा भएका छलफलका विषय देउवासँगै बुझ्न उनको आग्रह थियो। सत्ताकेन्द्रlत वार्ताबारे उनले कुनै कुरा खुलाउन चाहेनन्।कांग्रेससँग सत्ता सहकार्यका लागि प्रधानमन्त्री ओलीको र देउवाको भेट भएको चर्चा भएपछि शर्माले सत्ता बाहिरै रहने सामाजिक सञ्जाल मार्फत प्रष्टाएका थिए।

ट्विटमा भेट भए/नभएको भने उनले खुलाएका थिएनन्। सत्ताधारी नेकपाको भड्कावबाट टाढा रहने उनले प्रष्टाएका थिए। कांग्रेसलाई ५ वर्ष विपक्षमा बस्ने प्रष्ट जनादेश रहेको जनाउँदै आइतबार शर्माले लेखेका थिए, ‘नेकपाको द्वन्द्वसंग विलकुल निरपेक्ष छौं। अत यता या उताको जोडघटाउमा कांग्रेसको शिर गन्ने धृष्टता कोहीबाट नहोस्।’

अंकगणितमा बलियो नेकपा सरकारलाई बलियो प्रतिपक्षको अपेक्षा देउवा सभापति भएकै कारण सम्भव नभएको टिप्पणी हुँदै आएको छ। संवैधानिक निकाय, विश्वविद्यालयका पदाधिकारी, न्यायाधीश, द्वन्द्वकालीन आयोग लगायतमा सत्तासँग भाग खोजेपछि उनको आलोचना हुँदै आएको छ।

देउवा सत्तासँग हिस्सेदारी खोज्दै आएकाले जनमत अपमान गरी सरकारमा जाने डर कांग्रेसका नेताहरूलाई नै छ। बालुवाटार भेटमा भएको छलफलका विषयमा बाहिर नआएपनि सत्ता गठबन्धनमा कांग्रेस लाग्नै नहुने मत कांग्रेस नेताको छ। सत्तामा जाने हतार गर्नु कांग्रेसकै लागि आत्मघाती हुने नेता अर्जुननरसिंह केसीको बुझाई छ।

‘स्थिरता,समृद्धि र स्वर्ग लाने भ्रम छरेर आएको,भ्रष्टाचारमा चुर्लुम्म डुबेकासँग, फोहोरको भारी बोक्न यसमा संलग्न हुनु वा सत्तामा जाने हतार गर्नु कांग्रेसको निम्ति आत्महत्या हुने छ,’ नेता सिंह भन्छन्, ‘उनीहरू (नेकपा) टुटुन्/फुटुन् वा जुटुन् यो उनकै समस्या हो।’

प्रधानमन्त्री ओलीले शासन गर्ने नैतिक आधार गुमाइसकेको निर्णय कांग्रेस केन्द्रीय समितिबाट पारित गरिसकेको छ। प्रधानमन्त्रीको राजीनामा माग्न अंक गणितले साथ नदिने हुँदा सत्ता खेलमा कांग्रेस नलाग्ने अभिव्यक्ति दोहोरिरहेका थिए।

शासनका लागि वैधता गुमाएको ओली सरकार इतिहासकै असफल सरकार रहेको नेता प्रदीप पौडेलले बताए। ‘जन नजरमा ईतिहासकै असफल ओली सरकारसँग सम्झौता नगरियोस्,' नेता पौडेलले भने, ‘हेक्का रहोस्, कांग्रेस एउटा व्यक्ति होइन लाखौं सहिदको बलिदानले बनेको संस्था हो। पाँच वर्ष हामी प्रतिपक्षमा रहन्छौँ।’

शनिबारको भेटलाई कांग्रेसको साथ लिएर अर्को समूहलाई चेतावनी दिने ओली शैलीका रुपमा समेत टिप्पणी हुने गरेको छ।