काठमाडौँ– प्रधानमन्त्री सुशीला कार्कीको आह्वानमा बुधबार प्रधानमन्त्री निवास बालुवाटारमा भएको त्रिपक्षीय छलफलमा अधिकांश दल र जेनजी प्रतिनिधि फागुन २१ लाई तोकिएको प्रतिनिधिसभा निर्वाचनको पक्षमा उभिएको सहभागीहरूले दाबी गरेका छन्।
बालुवाटारमा भएको छलफलमा सरकारले तोकिएकै समयमा निर्वाचन गराउन वातावरण बनाउन दलहरूलाई आग्रह गरेको थियो भने दलहरूले सरकारबाटै त्यस्तो वातावरण तयार हुनु पर्नेमा जोड दिइरहदा कांग्रेस, माओवादी र रास्वपा लगायतका दलले चुनावका लागि सरकार अघि बढे साथ दिने धारणा राखेका थिए तर एमालेले भने संसद् पुनर्स्थापनामा जोड दिएको थियो।
बैठकपछि नेकपा एकीकृत समाजवादीका नेता राजेन्द्र पाण्डेले जेनजीहरुले सुशासनका लागि आन्दोलन गरेको र तोकिएको समयमा निर्वाचन सम्पन्न गर्न दलहरुको सहभागिता हुनुपर्ने धारणा राखेको बताए।
‘तपाईंहरु चुनावमा आइदिनुस्। संसद् पुनर्स्थापनातिर नलाग्नुस् भन्ने उहाँहरूको प्रस्ताव भयो’, पाण्डेले भने– ‘एमालेले संसद् पुनर्स्थापना गरेर जेनजीका माग पुरा गर्नुपर्छ भनेजस्तो कुरा राख्यो।’
बैठकमा सहभागी धेरैले भने निर्वाचन गर्न सुरक्षा चुनौतीबारे चिन्ता प्रकट गरेका थिए। जवाफमा प्रधानमन्त्रीले सुरक्षाको जिम्मा सरकारले लिने भन्दै दलहरूलाई आश्वस्त पारेकी थिइन्।
जेनजी प्रतिनिधी उपार्जुन चाम्लिङ भन्छन्, ‘हामीले चाहिँ चुनावको मिति तोकिइसकेको र अहिलेकै सरकारले चुनाव गराएर त्यसै सांसदले जेनजीका बाँकी मागहरू पूरा गर्ने धारणा राख्यौं। एमालेले संसद् पुनःस्थापना गर्ने कुरा उठायो। ’
वार्तामा सहभागी कांग्रेस महामन्त्री गगन थापाले आफू चुनावकै पक्षमा रहेको तर समय निकै नै छोटो भएको धारणा राखेका थिए।
सरकारका प्रवक्ता समेत रहेका सूचना तथा सञ्चारमन्त्री जगदीश खरेलले सरकार, राजनीतिक दल र जेनजी प्रतिनिधिहरूबीच भएको छलफल उपलब्धिमूलक भएको बताए।
‘हामीलाई चुनाव चाहिएको छ, गर्नुपर्छ पनि। तर, चुनाव–चुनाव भनेर मात्रै हुँदैन। हाम्रो आन्दोलनको मुख्य माग सुशासन हो। भ्रष्टाचार विरुद्धको कारबाही हो’, जेनजी प्रतिनिधिले छलफलमा धारणा राखेका थिए। प्रवक्ता खरेलले छलफल सकारात्मक भएको र मुलुक सामान्यीकरणतर्फ जाने विश्वास व्यक्त गरे।
अन्त्यमा प्रधानमन्त्री सुशीला कार्कीले कुनै पनि हालतमा चुनाव गराउने बताइन्। उनले भनिन्, ‘मैले कुनै पनि हालतमा चुनाव गराएर मात्रै यो सरकार छाड्छु। ’
राजनीतिक दलबाट १६ र जेनजी समूहबाट १४ जना प्रतिनिधिको सहभागिता रहेको थियो। निर्वाचनको माहौल बनाउने सन्दर्भमा पहिलो पटक भएको छलफलमा सरकारका तर्फबाट प्रधानमन्त्री कार्की, गृहमन्त्री ओमप्रकाश अर्याल, सञ्चार तथा सूचना प्रविधि मन्त्री जगदीश खरेल, प्रधानमन्त्रीका मुख्य सल्लाहकार अजयभद्र खनाललगायत सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
