काठमाडौं–राष्ट्रिय ध्वजवाहक नेपाल वायुसेवा निगम (नेपाल एयरलाइन्स) का दुई वटा वाइडबडी ए३३० जहाज गन्तव्य नपाएसँगै थन्किएका छन्।
निगमसँग रहेका २ वटा वाइडबडी ए३३० जहाजले अहिले सातामा एउटा मात्रै उडान गर्दै आएको छ।
निगमले वाइडबडी जहाजमार्फत् भारतको नयाँदिल्ली, हङकङ, जापानको नारिता र कतारको दोहामा उडान गर्दै आएको थियो।
तर, अहिले नेपाल एयरलाइन्सले अहिले जापानको नारितामात्रै उडान गर्दै आएको छ। कोभिडका कारण बन्द रहेको दिल्ली उडान नखुल्नु र हङकङ उडानमा प्रतिबन्ध लागेसँगै नेपाल एयरलाइन्सका २ वटा वाइडबडीले काम नपाएको निगम महाप्रबन्धक डिमप्रकाश पौडेलले बताए।
‘अहिले २ वटा वाइडबडी ए ३३० जहाजले सातामा एउटा मात्रै उडान गरिरहेको छ,’ उनले भने, ‘दिल्ली उडान खुलेको अवस्थामा दैनिक एक उडान हुनसक्ने अवस्था हो। तर, अहिले दिल्ली उडान बन्द रहेको र हङकङको प्रतिबन्धले जहाज थन्किएको छ।’
नेपाल एयरलाइन्सको जहाजमार्फत् आएका यात्रुमा कोरोना देखिएको भन्दै हङकङले तेस्रो पटक उडानमा प्रतिबन्ध लगाएको छ। प्रतिबन्ध यही नोभेम्बर २५ सम्म जारी रहने छ। हङकङले नेपाल एयरलाइन्सलाई अक्टोबर ४ देखि उडानमा बारम्बार प्रतिबन्ध लगाउँदै आएको छ।
निगमले वाइडबडीमार्फत् दैनिक दिल्लीमा एउटा उडान गर्दै आएको थियो। सरकारले दिल्ली उडान अझै खुलाउने संकेत देखाएको छैन। भारतीय पक्षले एयर बबल उडान गर्ने प्रस्ताव गरे पनि नेपालले नै अस्वीकार गरेको हो।
यसैगरी नेपाल एयरलाइन्सले कतारको दोहामा वाइडबडीमार्फत् उडान गर्दै आएकोमा अहिले एयर बस३२० ले उडान गरिरहेको छ। निगमले यात्रु कम भएको भन्दै यसो गरेको हो।
यसैगरी निगमले वाइडबडी जहाजमार्फत् उडान गर्दै आएको गन्तव्य जापानको नारिता हो। नारिता उडानमा पनि यात्रु कम भएको भन्दै निगमले सातामा एउटामात्रै उडान गर्दै आएको छ। डिसम्बरदेखि भने २ वटा उडान गर्ने तयारीमा निगम रहेको छ।
वाइडबडीले उडान गन्तव्य नपाए पनि एयरबस ३२०ले भने गन्तव्य पाइरहेको छ। एयरबस ३२०ले मलेसिया, दुबई र कतारको दोहामा उडान गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
