काठमाडौं- कोरोना परीक्षणमा निजी ल्याबहरूको लापरबाहीका कारण नेपाल एयरलाइन्सले हङकङ उडानबाट एक महिनाको बीचमै साढे ६ करोड आम्दानी गुमाएको छ।
नेपाल एयरलाइन्सको जहाजमार्फत हङकङ पुगेका यात्रुमा पुनः परीक्षण गर्दा कोरोना पोजेटिभ देखिएको भन्दै नेपाल एयरलाइन्सलाई उडानमा प्रतिबन्ध लाग्दा साढे ६ करोडभन्दा बढी आम्दानी गुमाएको हो।
नेपाल एयरलाइन्सले हङकङका लागि काठमाडौंबाट सातामा ३ वटा उडान गर्दै आएको थियो। तर, एयरलाइन्सबाट हङकङ पुगेका केही यात्रु यात्रुमा कोरोना पोजेटिभ देखिएपछि हङकङले उडानमा प्रतिबन्ध लगाउँदा उक्त आम्दानी गुमाउनु परेको एयरलाइन्सले जनाएको छ।
हङकङले अक्टोबर ४ देखि १७ र अक्टोबर २० देखि नोभेम्बर ३ सम्म गरी २ पटक नेपाल एयरलाइन्सलाई उडानमा प्रतिबन्ध लगाएको थियो। पहिलो पटक लगाएको प्रतिबन्ध १७ अक्टोबरमा फुकुवा भएपछि नेपाल एयरलाइन्सले २ वटा उडानसमेत गरेको थियो। तर, पुनः यात्रुमा कोरोना पोजेटिभ देखिएको भन्दै २० अक्टोबर हङकङले नेपाल एयरलाइन्सलाई प्रतिबन्ध लगाएको थियो। सो प्रतिबन्ध नोभेम्बर ३ (हिजो) बाट हटेको छ।
दुई पटकको प्रतिबन्धका कारण नेपाल एयरलाइन्सले १२ वटा उडान गुमाउँदा साढे ६ करोड रुपैयाँ गुमाएको हो। नेपाल एयरलाइन्सले ए-३२० जहाज मार्फत हङकङ उडान गरिरहेको थियो।
एयरलाइन्सले १ सय ५८ सिट क्षमताको न्यारोबडी जहाजमार्फत् काठमाडौं–हङकङ एकतर्फी उडानमा मात्र करिब ५३ लाख रुपैयाँ आम्दानी गर्दथ्यो भने फर्कदा (हङकङ-काठमाडौं उडानमा) पनि सोही रकम बराबार आम्दानी गर्दै आएको थियो। तर, कोरोना परीक्षणमा निजी ल्याबहरुले कोरोना परीक्षणमा लापरबाही गर्दा व्यापारमा असर गरेको भन्दै एयरलाइन्सले संस्कृति, पर्यटन तथा नागरिक उड्डयन मन्त्रालयमा पत्राचार गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
