भैरहवा- गृहमन्त्री रामबहादुर थापाले सार्वजनिक सवारी बन्द गर्ने यातायात व्यवसायी समिति र संघका पदाधिकारीलाई पक्राउ गर्न निर्देशन दिएपछि रुपन्देहीका यातायात व्यवसायीहरु सम्पर्कविहीन भएका छन्।
गृहमन्त्रीको निर्देशनलगत्तै प्रहरीले संघका र समितिका पदाधिकारीहरुलाई धमाधम पक्राउ गर्न थालेपछि अन्य व्यवसायी र पदाधिकारीहरु भागाभाग भएका हुन्। रुपन्देहीमा रहेको विभिन्न बस व्यवसायी संघ र समितिका पदाधिकारीहरुले मोबाइल स्विच अफ गरेका छन् भने कतिपयले फोन उठाएका छैनन्।
व्यवसायीहरु सम्पर्कविहीन भएपछि रुपन्देही प्रहरीले उनीहरुको खोजीकार्य तीव्र पारेको जनाएको छ। जिल्लाभर व्यापक रुपमा प्रहरी परिचालन गरिएको रुपन्देहीका प्रहरी प्रमुविही प्रहरी उपरीक्षक श्याम ज्ञवालीले बताए। केही यातायात व्यवसायीहरुलाई पक्राउ गरिएको र थप व्यवसायीहरुको खोजीकार्य भइरहेको उनले बताए। 'नागरिकलाई दुःख दिने लुकेर बसेका व्यवसायीहरु पानीमुनि गए पनि छाड्दैनौँ।'
गृहमन्त्री थापाको निर्देशनलगत्तै रुपन्देही प्रहरीले पश्चिम नेपाल बस व्यवसायी संघका उपाध्यक्ष जीवनकुमार बन्जाडे, संघका महासचिव पदम गाहा मगर, बुटवल यातायात व्यवसायी समितिका उपाध्यक्ष अशोक कुमार श्रेष्ठलाई पक्राउ गरेको छ।
यातायात व्यवसायी संघ, समितिले सिन्डिकेट खारेज गर्ने सरकारको निर्णयको विरोध गर्दै देशभर सार्वजनिक यातायात ठप्प पारेर जनतालाई दुःख दिएपछि गृहमन्त्रीले थापाले देशभरका प्रमुख जिल्ला अधिकारीहरुलाई लिखित निर्देशन पठाउँदै अत्यावश्यक सेवा सञ्चालन ऐन २०१४ अनुसार गाडी नचलाउने व्यवसायीहरुलाई पक्राउ गर्न निर्देशन दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1709961276.jpg)
-1786602170.png)
