पोखरा– ज्यान फतक्कै गल्ने सराङकोटको उकालो। भनेको समयमा बस नै नजाने। ट्याक्सीको उत्तिकै महँगो भाडा। कसरी छिटो पुग्न सकिन्छ भन्ने पोखरेलीको मनमा थियो। यसअघि उकालोमा पनि छिटै पुग्न सकिने केबलकारको मजा लिन गोरखा मनकामना पुग्नुपर्थ्यो।
अब भने पोखरेलीले केबलकारको मजा पोखरामै लिन पाउने भएका छन्। अन्नपूर्ण केबलकार प्रालिले पोखरेलीको केबल चढ्ने सपना पूरा गर्न लागेको हो। प्रालिले आउँदो बैसाखसम्म केबलकार सञ्चालनमा ल्याउने लक्ष्यका साथ काम गरिरहेको प्रालिका अध्यक्ष कालु गुरुङले जानकारी दिए।
केबलकार पोखराको सेदीदेखि सराङकोटसम्मको हुनेछ। केबलकार निर्माणपछि १ हजार ५ सय ९५ मिटरको उचाइ जम्मा ८ मिनेटमा पूरा गर्न सकिनेछ।
केबलकार निर्माण गर्न आवश्यक पर्ने सामग्री जापानबाट पोखरा ल्याइएको अध्यक्ष गुरुङले बताए। ‘जापानबाट ६० कन्टेनर सामान मंगलबार नै निर्माणस्थलमा पुगिसकेको छ,’ उनले भने। उनका अनुसार अहिले निर्माणको पहिलो चरणको काम भइरहेको छ। भर्खर पहिलो चरणको काम भइरहेका कारण कति लगानी लाग्न सक्छ भन्ने कुरामा यकिन नभएको गुरुङको भनाइ छ।
बेसमेन्ट ढलानको अध्ययन गरी जापानी टोली फर्किसकेको र अहिले भवन, बोरिङ र खानेपानीको काम भइरहेको गुरुङले जानकारी दिए। बेसमेन्टको काम सकिएपछि केबलकारको लागि आवश्यक तार ल्याइनेछ। एउटा डब्बामा ८ जना यात्रु रहने केबलकारमा प्रतिघन्टा ५ सय यात्रु ओसारपसार गर्न सकिने गुरुङले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766152266.png)
-1764146706.png)
-1763721444.png)
