काठमाडौं- फुटबलमा दुई क्लबको रोमाञ्चक भिडन्त ती क्लब कति नजिकका हुन् भन्ने आधारमा हुन्छन्। तर, रियल मड्रिड र बार्सिलोनाबीचको भिडन्तलाई छाडेर। रियल मड्रिड र बार्सिलोना परका सहर भए पनि भिडन्त एउटै सहरका दुई क्लबको भन्दा ज्यादा हुन्छ।
रियल मड्रिड र बार्सिलोनाबीचको खेल विश्व फुटबलमा सर्वाधिक हेरिने खेल मानिन्छ। जहाँ विश्वभरका फुटबलप्रेमी जोडिन्छन्। त्यहाँ दर्शकबीचको राजनीतिक र भौगोलिक दुरीसमेत पसिदिन्छ। मड्रिडको केन्द्रीय शासन र क्याटालोनियाको स्वतन्त्रताको लडाइँ त्यहाँ छ।
यो सिजनको पहिलो एल क्लासिको शनिबार बेलुका पौने ८ बजे बार्सिलोनाको मैदानमा हुँदैछ। अहिले लिगमा बार्सिलोनाभन्दा एक खेल बढी खेलेको रियल मड्रिड तीन अंकले अघि छ। मड्रिडको पाँच खेलमा १० अंक छ भने बार्सिलोनाको चार खेलमा सात अंक छ। लिगमा यसअघिको खेलमा रियल मड्रिड र बार्सिलोना दुबै पराजित भएका थिए।
विजेता क्लबको छबि बनाएका रियल मड्रिड र बार्सिलोना दुबैका लागि हार स्वीकार गर्न कठीन पर्छ। अझ रियल मड्रिड त ला लिगामा नवप्रवेशी काडिजसँगको हारपछि च्याम्पियन्स लिगमा शख्तर डोनेस्कसँग पराजित भइसकेको छ। यसैले लगातार तेस्रो हार नभोग्न मड्रिड टिमको प्रयास दुगुना हुनेछ।
हुन पनि रियल मड्रिडले ३४ ला लिगा उपाधि जितिसकेको छ। बार्सिलोनाले २६ ला लिगा जितेको छ। कोपा डेल रे हेर्दा बार्सिलोनाले ३० उपाधि जितेको छ, रियल मड्रिडले १९ उपाधि जितेको छ। युरोपियन प्रतिस्पर्धा हेर्ने हो भने रियल मड्रिडले १३ च्याम्पियन्स लिग जितेको छ, बार्सिलोनाले पाँच पटक जितेको छ। सबैमा दुई टिम युरोपियन फुटबलका प्रमुख टिममध्ये हुन्।
बार्सिलोना सन् १८९९ मा स्थापना भएको हो। रियल मड्रिड त्यसको तीन वर्षपछि १९०२ मा स्थापना भयो। त्यसबेलासम्म प्रतिस्पर्धाहरु स्थानीय सहरमा नै केन्द्रित थिए। १९०३ पछि कोपा डेल रे सुरु हुँदा स्पेनमा फुटबलले अलि व्यापकता पायो। १९२९ मा रियल मड्रिड र बार्सिलोनासमेत मिलाएर १० टिमबीच ला लिगा सुरु भएपछि त क्लब फुटबलको गति तीब्र भयो।
रियल मड्रिड र बार्सिलोनाबीच पहिलो पटक प्रतिस्पर्धा १९१६ को कोपा डेल रे सेमिफाइनलमा भएको थियो। जति बेला खेल चार लेगमा हुन्थे। जसमा एक खेल बार्सिलोनाले जित्यो, दुई खेल रियल मड्रिडले जितेको थियो भने एक खेल बराबरी भएको थियो। समग्रमा रियल मड्रिड लेजेन्ड सान्टियागो बर्नाबेउले आठ गोल गरेका थिए।
दुई क्लबबीचको ला लिगा भेट १९२९ को फेब्रुअरी १७ मा भएको थियो। खेल रियल मड्रिडले २–१ ले जित्यो। दुई क्लबबीच युरोपियन प्रतिस्पर्धामा भेट १९५९–६० को युरोपियन कप सेमिफाइनलमा भयो। जहाँ समग्रमा रियल मड्रिड ६–२ ले विजयी भएको थियो।
एक समय एल क्लासिको क्रिष्टियानो रोनाल्डो र लियोनल मेस्सीको प्रतिस्पर्धासँग जोडेर समेत खुब चर्चामा आयो। तर क्रिष्टियानो युभेन्टस लागेपछि पनि एल क्लासिकोको हल्ला कम भएको छैन। स्थापना कालदेखिकै मजबुत बनिरहेका क्लबहरु अहिले पनि विश्व फुटबलको केन्द्रमा नै देखिन्छन्।
अहिले यो सबैमा विशेष ध्यान हुनेछ, लियोनल मेस्सीमाथि। जो शनिबार आफ्नो ४४औँ एल क्लासिको खेल्दैछन्। मेस्सीले १८ वर्षको उमेरमा एल क्लासिको डेब्यू गरेदेखि अहिलेसम्म धेरै कुरा फेरियो। सबैभन्दा बढी त उनको आफ्नै कीर्तिमानहरु।
सन् २००७ को मार्च महिनामा क्याप नाउमा रियल मड्रिडविरुद्ध लियोनल मेस्सी पहिलो पटक धेरैको नजरमा परेका हुन्। उनको अन्तिम समयको गोलले बार्सिलोनाले आफ्नो पुरानो प्रतिस्पर्धीसँग बराबरी गरेको थियो। जहाँ मेस्सीले आफ्नो पहिलो एल क्लासिको ह्याट्रिक पनि पूरा गरेका थिए।
त्यसको १४ वर्ष र २६ एल क्लासिको गोल र १६ एल क्लासिको असिस्टपछि अहिलेसम्म पनि खेलमा परिवर्तन गराउन सक्ने क्षमता उनै मेस्सीसँग नै छ। बार्सिलोना छाड्ने प्रयासपछि पनि यो सिजन क्लबमै रोकिएका मेस्सीका लागि सिजनको पहिलो एल क्लासिको धेरै प्रश्नहरुको जवाफ पनि हुन सक्नेछ।
बार्सिलोना र रियल मड्रिडबीच अहिलेसम्म भएका प्रतिस्पर्धात्मक खेलको संख्या २ सय ४४ पुगेको छ। जसमा रियल मड्रिडले ९६ खेल जितेको छ भने बार्सिलोनाले पनि ९६ खेल नै जितेको छ। ५२ खेल बराबरी भएका छन्। एल क्लासिकोमा अहिलेसम्मका सबै खेलमा हेर्दा रियल मड्रिडले ४ सय ५ गोल गरेको छ भने बार्सिलोनाले ३ सय ९९ गोल गरेको छ।
मैत्रीपूर्ण ३३ खेलहरुलाई हेर्ने हो भने बार्सिलोनाले १९ खेल जितेको छ भने रियल मड्रिडले ४ खेल जितेको छ, १० खेल बराबरी भएका छन्। जसमा बार्सिलोनाले ८३ गोल गरेको छ भने रियल मड्रिडले ४३ गोल गरेको छ।
ला लिगामा रियल मड्रिड र बार्सिलोनाबीचको पछिल्लो आठ खेललाई हेर्ने हो भने रियल मड्रिडले एक खेल मात्र जितेको छ। त्यसमा तीन खेल बराबरी खेलेको रियल मड्रिडले चार खेल हारेको छ।
शनिबार हुने एल क्लासिको दर्शकबिनाको पहिलो एल क्लासिको हो। तर विश्वभर टेलिभिजनमार्फत दर्शकहरु जोडिने नै छन्। ला लिगाले एल क्लासिको खेल ६५० मिलियन दर्शकले हेर्ने अनुमान गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.JPG)
.JPG)
.jpg)
