काठमाडौं– विगतका वर्षहरुमा दशैँ नजिकिएसँगै भिडभाड सुरु हुने ल्यापटप तथा मोबाइल पसलहरु यतिबेला सुनसान छन्। फाट्टफुट्ट मात्रै ग्राहकहरु आउँने हुँदा मुख्य व्यापारिक केन्द्र न्यूरोडका व्यापारीहरु पनि फुर्सदिला भेटिन्छन्।
यतिबेला सामान्य अवस्थाको जस्तो पनि व्यापार नहुँदा एकातिर भाडा कसरी तिर्ने र अर्कोतिर कर्मचारीहरुलाई पारिश्रमिक कसरी दिने भन्ने चिन्ताले पिरोल्न थालेको उनीहरु गुनासो गर्छन्।
‘अघिल्लो वर्ष त यो बेला व्यापार भ्याइनभ्याइ हुन्थ्यो। अहिले हेर्नुस् यस्तो सुनसान छ। व्यापार धेरै घटेको छ। यो वर्षको दसैँ त लाग्योे तर व्यापारमा दसैँ लागेन,’ न्यूरोडका मोबाइल व्यापारी साहीद राना भन्छन्।
बजारमा ग्राहकले खोजेजस्तो ब्राण्ड तथा मोडलको मोबाइल ल्याउन नसकिएको तथा भएको सामान पनि खासै बिक्री नभएको उनको भनाइ छ।
‘अहिले ग्राहकहरुले २० हजारभन्दा कम मूल्य पर्ने मोबाइल बढी खोज्नु भएको छ। तर त्यो मूल्यका मोबाइहरु बजारमा खासै छैनन्,’ उनले भने।
अघिल्लो वर्षको ठ्याक्कै यही समयमा उनको सोरुमबाट दैनिक ५० देखि ६० थान मोबाइल बिक्री हुने गरेकोमा हिजो आज १५ देखि २० थान मुस्किलले व्यापार हुने उनी बताउँछन्।
दिउँसो ३ बजेतिर पसलमा ग्राहक कुर्दै गरेकी भेटिइन् व्यापारी शिला महर्जन। उनी पनि कोरोनाका कारण यो वर्षको दसैँमा व्यापार ठप्प भएको बताउँछिन्।
‘अहिले त मोबाइल अत्यावश्यक हुने मानिसहरु मात्रै मोबाइल खरिदका लागि आउँछन्। यस्तो त्रास छ। व्यापार पनि के होस्,’ उनी भन्छिन्।
अघिल्लो वर्षको यस्तै दसैँको सिजनमा उनको सोरुमबाट दैनिक ३० थानसम्म मोबाइलको व्यापार हुन्थ्यो। यस वर्ष बढीमा ३ देखि ४ थानसम्म मात्र मोबाइलको व्यापार भइरहेको छ। उनका अनुसार अहिलेको व्यापारले सोरुमको भाडा तिर्न पनि मुस्किल हुन थालेको छ।
ताम्राकार कम्प्लेक्सकी व्यापारी आशा धिमाल दशैँको समयमा मोबाइल व्यापार निकै सुनसान भएको बताउँछिन्। ‘बजारमा खोजेजस्तो सामान पनि ल्याउन सकिएको छैन। भएको सामानको पनि खासै व्यापार छैन,’ उनले भनिन्।
न्यूरोडका अधिकांश व्यापारीहरुले दशैँको मुखमा पनि व्यापार ठप्पजस्तै भएको बताएका छन्। मागअनुसारका मोबाइल आयात गर्न नसक्दा पनि व्यापार खस्किएको उनीहरुको भनाइ छ।
ल्यापटपको व्यापार पनि खस्कियो
पहिलो पटकको लकडाउन खुलेपछि केही समय ल्यापटपको व्यापार राम्रो भए पनि दसैँको मुखैमा भने ल्यापटप व्यापार समेत खस्किएको व्यापारीहरुले बताएका छन्।
एउटा पसलबाट दिनमा मुस्किलले २ देखि ३ थानसम्म ल्यापटप व्यापार हुने अधिकांशले बताएका छन्।
‘अहिले सामान पनि ल्याउन सकिएको छैन। खोजको सामान नभएपछि व्यापार पनि के हुन्थ्यो’ व्यापारी सुनिता महर्जन भन्छिन्।
किन घट्यो मोबाइल र ल्यापटपको व्यापार?
मानिसहरु दसैँ, तिहार, छठ लगायत चाडपर्वहरुमा नयाँ मोबाइल तथा ल्यापटप बोक्न रुचाउँथे। चाडपर्वको अवसरमा केहीले उपहार स्वरुप मोबाइल तथा ल्यापटप आदानप्रदा गर्थे। जसले गर्दा अघिल्ला वर्षहरुमा दसैँ सुरु हुन थालेसँगै मोबाइल तथा ल्यापटप पसलहरुमा ग्राहकहरुको खचाखच भीड देख्न सकिन्थ्यो। यो वर्ष कोरोना महामारीका कारण अघिल्ला वर्षहरुमा जस्तो चहलपहल छैन।
कोरोनाकै कारण महिनौँदेखि रोजगारी गुमाएर अधिकांश मानिसहरु आर्थिक समस्यामा छन्। खान, लगाउनै मुस्किल भइसकेको अवस्थामा मोबाइल प्रयोगकर्ता घट्नु स्वभाविक देखिएको छ। जसले गर्दा पनि यस वर्ष मोबाइल तथा ल्यापटपको व्यापार घटेको पाइएको छ। यो वर्ष भिडभाड तथा रमाइलो गर्ने माहोल नहुँदा समेत मोबाइल तथा ल्यापटप व्यापार सुनसान देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
