काठमाडौं- जिल्ला प्रहरी कार्यालय धादिङले गुन्डा नाइके राधाकृष्ण भण्डारी उर्फ 'राधे'लाई नियन्त्रणमा लियो। उनलाई पक्राउ गर्नुको कारण थियो सुरक्षा थ्रेट।
धादिङका प्रहरी प्रमुख एसपी महेन्द्र खड्काका अनुसार उनीले जनप्रतिनिधिलाई आक्रमण गरेकोदेखि ज्यान लिनेसम्मको धम्की दिएको उजुरी परेपछि उनी पक्राउ परेका हुन्।
धादिङको सिद्धलेक गाउँपालिकाका जनप्रतिनिधिलाई उनले धम्की दिएका थिए। धम्कीको कारण भने उही पहिलेकै जस्तो ठेक्कापट्टा हो। ठेक्कापट्टाको म्याद सकिए पनि राधेले काम गरिरहेकाले काम नगर्न अनुरोध गर्दा धम्की दिएको उनीविरुद्ध परेको उजुरीमा उल्लेख छ।
म्याद सकिए पनि नदीजन्य पदार्थ गिट्टीबालुवाको उत्खनन गर्न राधेले छाडेका थिएनन्। सोही विषयमा विवाद हुँदा उनले जनप्रतिनिधिलाई धम्की दिएको बताइएको छ।
उनको धम्की र अपराधयात्रा यो पहिलो भने होइन। गुण्डा नाइकेकका रूपमा परिचति राधे यसअघि गत वर्ष जेठको अन्तिम साता पक्राउ परेका थिए। त्यसबेला उनको साथबाट प्रहरीले पेस्तोलसमेत बरामद गरेको थियो। प्रहरीलाई देखेपछि उनको समूहले प्रहरीमाथि नै आक्रमण गरेको थियो। सो क्रममा दुई प्रहरी घाइतेसमेत भएका थिए।
त्यसबेला पक्राउ परेका राधेलाई छुटाउन नेपाल कांग्रेस नै लागेको थियो। तरुण दल धादिङको जिल्ला उपाध्यक्षसमेत रहेका राधेलाई छुटाउन भन्दै प्रहरीलाई चर्को दबाब पनि पर्दै आएको छ। राधेलाई फसाउन खोजिएको र तत्कालै उनलाई बिनासर्त रिहा गर्नुपर्ने माग तरुण दलले गरेको थियो।
त्यसेबला पनि धादिङ बेनीघाट रोराङ गाउँपालिका–३ स्थित मलेखु खोलाको गिटीबालुवा निकासी ठेक्का गुण्डागर्दीकै आडमा राधेले हात पारेका थिए। ४ करोडको निकासी ठेक्कामा राधेले दाबी गरेपछि अरुले टेन्डर फिर्ता लिएका थिए। यसबाट पनि धादिङमा गुण्डा नाइके राधेको रजगज कतिसम्म छ भन्ने प्रष्ट पार्छ। गुण्डागर्दीकै आडमा २०७५ सालमा मलेखु खोलाको गिटीबालुवा निकासी ठेक्का पनि राधेले नै पाएका थिए।
धादिङमा राधेको राज चल्न थालेपछि बिनाप्रतिस्पर्धा उनैले टेन्डर हात पार्दै आएका छन्। टेन्डर हात परेपछि मलेखु खोलाबाट निर्माण सामग्रीको निकासी कर राधेकै समूहले उठाउँदै आएको थियो। उनको विरुद्धमा न जनप्रतिनिधिले नै मुख खोल्न सक्छन्, न प्रशासन नै।
ठेक्का आफैंले लिने र निकासी कर पनि आफैंले उठाउने भएपछि राधे समूहले उक्त क्षेत्रका क्रसर र गिट्टी बालुवा खानीमा चासो राख्न थालेको हो। सोही प्रकरण अहिले पनि दोहारिएको जानकारहरू बताउँछन्।
धादिङ प्रहरीका अनुसार टेन्डर प्रक्रियादेखि अन्य विविध किसिमले राधे समूहले अवैध रकम उठाउँदै आएको छ। राधे समूहको अपराधको नेक्सस ठेक्कापट्टासँग जोडिएको धादिङकै स्थानीय नेताहरुले बताउँदै आएका छन्।
नदी तथा खोलाबाट निकालिने निर्माण सामग्री उनको प्रभाव हुने नै भयो। अपराध गर्नेले नै ठेक्का पाउने र उनीहरूले कर उठाउने भएपछि एकाधिकार हुने र अपराध बढ्ने गरेको बताइएको छ।
हेल्मेट काण्डबाट उघ्रिएको राधेको अपराधको बर्को
राधेको अपराधको चक्र पल्टाउन १३ वर्षअघि फर्कनुपर्ने हुन्छ। २०६४ कात्तिक २४ गते धादिङकै गणेश ठकुरीको घरमा गएर टाउकोमा हेल्मेट प्रहार गरी घाइते बनाएको घटनाबाट राधेको गुण्डागर्दी बाहिर आएको हो। त्यसपछि बाहिर आएको उनको आपराधिक यात्रा अहिलेसम्म पनि जारी छ।
प्रहरीका अनुसार राधे अवैध असुली, ठेक्कापट्टा, टेन्डरमा मात्र नभएर अन्य थुप्रै घटनामा पक्राउ पर्दै अदालतमा मुद्दा चल्दै छुटेका व्यक्ति हुन्। उनले धादिङ क्षेत्रलाई आधार बनाएर आपराधिक गतिविधि गर्दै आएका छन्।
जानकार प्रहरी अधिकृतहरूका अनुसार सुरुमा दिनेश अधिकारी चरीको समूहमा रहेर राधे आपराधिक गतिविधि गर्थे। चरीसँग खटपट भएपछि उनी तरुण दलमा लागे।
२०७० असार २१ गते बा १० च ६९९३ गाडी रोकेर राधेसहितको समूहले चरीलाई खुकुरी प्रहार गरेर घाइते बनाएको थियो। सोही केसमा राधे २०७० साउन १३ पेस्तोलसहित पक्राउ परेका थिए। त्यसबेला केही समय जेल परेर छुटे।
यस्तै, २०७४ असार ५ गते धादिङ नीलकण्ठ नगरपालिका-३ का २४ वर्षीय आयुष तामाङलाई राधेसहित उनको समूहले धारिलो हतियार प्रहार गरी घाइते बनाएको थियो। त्यो घटनामा राधे ‘फरार’ थिए। धादिङ प्रहरीले उनलाई देखेकोनदेखे गर्दथ्यो। अहिले भने जनप्रतिनिधिलाई धम्क्याएको आरोपमा उनी प्रहरी हिरासतमा छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.jpg)
