नयाँ उचाइमा डोमिनिक कलभर्ट लेविन

फिचर

नयाँ उचाइमा डोमिनिक कलभर्ट लेविन

ऋग्वेद शर्मा आइतबार, असोज २५, २०७७, ११:२५

काठमाडौं- इंग्लिस प्रिमियर लिगमा यो सिजन छाइरहेका खेलाडी हुन्, डोमिनिक कलभर्ट लेविन। इभर्टनका लेविनले प्रिमियर लिगमा चार खेलमा छ गोल गरिसकेका छन्। गोलको शीर्ष स्थानमा रहेका लेविनको शैली र मैदानमा देखिने विश्वास पनि गजवको देखिइरहेको छ।

प्रिमियर लिगमा पहिलो खेलमा टोटनह्यामलाई १-० ले हराउँदा उनै लेविनले गोल गरेका थिए। दोस्रो खेलमा वेस्टब्रुमलाई ५-२ ले हराउँदा त उनले ह्याट्रिक नै गरे। तेस्रो खेलमा क्रिस्टल प्यालेसविरुद्ध २-१ ले जित्दा पनि उनले एक गोल गरे। चौथो खेलमा ब्राइटनलाई ४-२ ले हराउँदा पनि लेविन गोल गर्न चुकेनन्। यसैले उनले हरेक खेलमा गोल गरेका छन्।

प्रिमियर लिगबाहेक इएफएल कपमा वेस्ट ह्यामविरुद्ध ४-१ ले जित्दा पनि लेविनले ह्याट्रिक गरेका थिए। यो सिजन लेविन मैदानमा उत्कृष्ट रुपमा बढिरहेका छन्। गोलको संख्याले त्यसलाई पुष्टि गरिरहँदा गोलबाहेक नै पनि उनको खेल तारिफयोग्य छ। बलमा बढ्ने उनको शैली राम्रो देखिन्छ। यसैले त इंग्ल्याण्ड टिममा ह्यारी केनको विकल्पका रुपमा उनको नाम आइरहेको छ।

हुन त २३ वर्षका लेविन इभर्टनमा २०१६ मा नै आबद्ध भएका हुन्। तर उनी मैदानमा याद हुने गरी चिनिएका यहि सिजन मात्र हो। इभर्टनका लागि उनले १४० खेल खेलिसकेका छन्। जसमा ४१ गोल र ११ असिस्ट गरेका छन्।

इभर्टनमा २०१६-१७ को सिजन ११ खेल खेलेका उनले एक गोल मात्र गरेका थिए। २०१७-१८ को सिजन ४४ खेल खेलेका उनले ८ गोल र ७ असिस्ट गरेका थिए। २०१८-१९ को सिजन ३८ खेलमा उनले ८ गोल र ३ असिस्ट गरेका थिए। गएको सिजन उनले ४१ खेलमा १५ गोल र एक असिस्ट गरे।

पछिल्ला सिजनको तुलनामा उनको खेल यो सिजन विशेष देखिँदैछ। यसैले त २०१६ मा इभर्टनमा उनलाई भित्र्याएका डेभिड अन्सवर्थ अहिले खुसी छन्। त्यो समय लेविनलाई सेफिल्ड युनाइटेडबाट १.५ मिलियन पाउण्ड मात्र तिरेर इभर्टन लगिएको थियो।

लेविन १५ वर्षकै हुँदा डेभिडको नजरमा परेका थिए। जतिबेला लेविन जिममा हुँदा भविष्यमा चल्न सक्ने खेलाडीका रुपमा डेभिडले अनुमान गरेका थिए। ‘उसले जिममा जसरी अभ्यास गरिरहेको थियो त्यो कुराले नै मेरो ध्यान खिचिहाल्यो। उसले काठको बक्सामा टेकेर जसरी उफ्रिरहेको थियो त्यो गजव थियो’ डेभिडलाई उद्धृत गर्दै बिबिसीले लेखेको छ।

इभर्टन प्रशिक्षक कार्लो एन्सेलोटीको नजरमा लेविन अहिले सबै कुरामा पूर्ण स्ट्राइकर हुन्। २०१९ को डिसेम्बरमा इभर्टन प्रशिक्षकका रुपमा एन्सेलोटी आएपछि नै लेविनको फरक रुप मैदानमा देखिएको हो। लेविनबाट शतप्रतिशत खेल निकाल्न एन्सेलोटी सफल भइरहेका छन्।

‘लेविनसँग युरोपमा एक उत्कृष्ट स्ट्राइकरका रुपमा चिनिन मिल्ने सबै गुण छ, शैली पनि राम्रो छ र उनी मैदानमा तीब्र छन्। एयर बलमा पनि उनको समझ राम्रो देखिन्छ। टिमका लागि खुब मेहनत गर्छन्। आजभन्दा भोलि राम्रो गर्न चाहने उनको बलियो मानसिकता पनि राम्रो देखिन्छ’ एन्सेलोटीले भनेका छन्।

प्रायजसो खेलमा एन्सेलोटीले लेविनलाई ४-४-२ को फर्मेसनमा प्रयोग गरिरहेका छन्। जसमा लेविनसँगै अगाडि रहन्छन् रिचार्लिसन। त्यसबाहेक ४-३-३ को फर्मेसनमा प्रयोग गर्दा पनि लेविनले आफ्नो क्षेत्रमा राम्रो गरिरहेका छन्। टिममा गोलकिपर जोर्डन पिकफोर्डले दिने लामा पासहरुमा पनि लेविनको भूमिका विशेष छ।

२०१४ मा सेफिल्ड युनाइटेडको सिनियर टिमबाट एक सिजन सेल्टिकमा र अर्को सिजन नर्थह्याम्पटन टाउनमा लोनमा पठाइएका लेविनले अहिले यो उचाइ देखाउलान् भन्ने विश्वास कमैलाई थियो। इभर्टनमा २०१६ मा गएपछि पहिलो सिजन प्रशिक्षक रोनाल्ड कोम्यानको समयमा उनले जम्मा ११ खेल खेल्न पाएका थिए। त्यसपछिका सिजन पनि मैदानमा उनको उपस्थिति कमजोर नै देखिइरह्यो।

‘मलाई विश्वास थियो म यहाँ पुग्न सक्नेछु। कहिलेकाहिँ उमेर र अनुभवहरुले पनि असर गरिरहेको हुन्छ। मैले जहिले पनि धैर्यता बनाइराखेँ, जसको फल अहिले पाइरहेको छु’ ब्राइटनसँगको खेलपछि लेविनले भनेका थिए।

‘प्रशिक्षक एन्सेलोटीको मप्रतिको विश्वास पनि सकारात्मक छ। पहिले गरिरहेका मेहनत पनि गोलमा देखिन सकेको थिएन, अहिले भने मेहनत अनुसार गोलमा बढ्न सकिरहेको छु। अहिले डिबक्स एरियामा बल पाउँदा गोलका लागि छिटो प्रयास गरिरहेको छु, त्यो एन्सेलोटीकै योजना हो। सहि समयमा सहि ठाउँमा हुनु महत्वपूर्ण हुन्छ’ उनले भनेका छन्।

हुन त २०१७ मा इंग्ल्याण्डलाई यु २० फिफा विश्वकपको उपाधि जिताउँदा पनि लेविनको खुब तारिफ भएको हो। २०१८ मा उनले इंग्ल्याण्ड यु २१ प्लेयर अफ दि इयर अवार्डसमेत जितेका थिए। त्यो सबैभन्दा बढी प्रिमियर लिगमा अहिले उनले देखाउन सकेको खेल माथि देखिएको छ।

इभर्टनकै पनि लामो समयदेखि चलिरहेको असफल यात्रामा यसपटक केही भिन्न देखिएको छ। कम्तिमा सुरुवात हेर्दा यो सिजन इभर्टन सफल हुृने नै देखिन्छ। जसमा नयाँ भित्र्याइएका खेलाडीहरु एलान र एब्डुलाए डुकोरे जस्ता सेन्टर मिडफिल्डर, बल अघि बढाउन उत्कृष्ट काम गरिरहेका ह्यामेस रोड्रिग्वेज र फेरिएका लेविनको भूमिका ठूलो छ।

सेफिल्डमा हुर्किएका लेविनलाई कुनै समय सेफिल्ड युनाइटेड टिममा पुग्नु नै सपना थियो। जहाँ पुगे पनि। तर अहिले त्यही सपना सानो बनिरहेको छ। इभर्टनबाट मात्र होइन इंग्ल्याण्ड राष्ट्रिय टिमबाट समेत राम्ररी अघि बढ्ने उनको सपनाले ठाउँ पाउँदै गइरहेको पनि छ। बिहीबार राति वेल्सविरुद्ध भएको मैत्रीपूर्ण खेलमा इंग्ल्याण्डका लागि उनको गोल अगाडिको बाटो निर्माण नै हो।