नयाँ दिल्ली- बलिउड अभिनेता सुशान्तसिंह राजपुतको आत्महत्याले बलिउडभित्र ठूलै कम्पन ल्याएको छ। करण जोहरदेखि हाइप्रोफाइल व्यक्तिमाथि ड्रग्सको विषयमा प्रश्न उठ्यो। यो प्रकरणमा सुशान्तकी प्रेमिकाले ड्रग्स प्रयोग गर्ने भन्दै १० जना बलिउडकर्मीको नाम लिएपछि अहिले बलिउडका एकपछि अर्को सेलिब्रेटी बयानमा तानिन थालेका छन्।
लागू औषध कन्ट्रोल ब्युरो (एनसिबी)ले शुक्रबार बलिउडका चर्चित अभिनेत्रीहरु दिपीका पादुकोण, श्रद्धा कपुर र सारा अली खानको बयान लिएको छ। उनीहरुको बयानमा सन्तुष्ट हुन नसकेपछि एनसिबीले उनीहरुको मोवाइल अनुसन्धानका लागि नियन्त्रणमा लिएको बलिउड हङ्गामाले उल्लेख गरेको छ। शुक्रबार दिपीका बयानका लागि एनसिबीको गेस्ट हाउन पुगेकी थिइन्।
अभिनेत्री पादुकोण बयान दिने क्रममा तीनपटक भावुक भएकी थिइन्। उनले धेरै प्रश्नहरुमा आफूलाई मौन पनि राखिन्। एनसिबीको पाँच सदस्यको टोलीले उनलाई प्रश्न सोधेको थियो। उनकी म्यानेजर करिश्मालाई समेत सामुन्ने राखेर एनसिबीले प्रश्न सोधेको थियो। यसरी प्रश्न सोध्ने क्रममा जवाफ नदिने र धेरै भावुक हुन थालेपछि एनसिबीका प्रश्नकर्ताले उनलाई ‘इमोस्नल कार्ड’ नखेल्न अनुरोध गरेको इन्डिया टूडेमा उल्लेख छ।
यसअघि एक ह्वाट्सएप ग्रुपमा उनले लागूऔषध छ भनी सोधेको सार्वजनिक भएको थियो। उक्त ग्रुपको उनी एमडिन रहेकी छन्। बयानमा उनले चुरोट खाने गरेको स्वीकार गरेकी छन् तर लागूऔषध प्रयोग नगर्ने बताएकी छन्।
दिपीकालाई पाँच घण्टा सोधपुछ गरिएको थियो। सुशान्तसिंह राजपुतको मृत्युबारे भने उनलाई केही प्रश्न सोधिएन।
शुक्रबार अभिनेत्री रकुलप्रित सिंह, जया शाह र करिश्मा प्रकाशसँग एनसीबीले सोधपुछ गरेको थियो।
धर्मा प्रोडक्सनको पूर्वकर्मचारी क्षितिज रवि प्रकाशलाई पनि एनसिबीले शुक्रबार सोधपुछपछि पक्राउ गरेको थियो। शनिबार उनलाई मेडिकल जाँचका लागि अस्पताल लगिएको भारतीय सञ्चार माध्यमले जनाएका छन्।
धर्मा प्रोडक्सनका प्रमुख निर्माता एवं निर्देशक करण जोहर हुन्। उक्त प्रोडक्सनमा मानिसको लागू औषधसँग सम्बन्ध देखिएपछि जोहरमाथि प्रश्न उठेको थियो। उनले योलगत्तै क्षितिज र अनुभव चोपडासँग कुनै सम्बन्ध नभएको बयान सार्वजनिक गरेका छन्। अनुभवलाई पनि यो मुद्दामा सोधपुछ गरिएको छ। क्षितिज दिल्लीमा हुँदा एनसिबीले उनको घरबाट केही मात्रामा लागू औषध बरामद गरेको थियो।
श्रद्धा कपुरसँग पनि ६ घण्टा बयान लिएको थियो।
अभिनेत्री श्रद्धाले पनि एनसिबीको अगाडि लागूऔषध उपभोग नगर्ने बयान दिएकी थिइन्। सारा अलीले आफूले चुरोट सेवन गरे पनि लागूऔषध उपभोग नगर्ने बताइन्।
‘केदारनाथ’को छायांकनको समयमा सुशान्तसँग नजिक भएको तर कुनै सम्बन्ध नभएको र ड्रग्स नलिएको जिकीर उनले गरिन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।