काठमाडौं–राष्ट्रिय परीक्षा बोर्डले कक्षा १२ को परीक्षा गराउनका लागि दुई विकल्प पेश गरेको छ। बोर्डका प्रवक्ता दुर्गाप्रसाद अर्यालका अनुसार कोरोना महामारीका कारण वैशाखकाे परीक्षा स्थगित भएपछि बोर्डले वैकल्पिक विधि मन्त्रालयमा पेश गरेको हो।
‘विद्यालय क्षेत्रमा सरोकार राख्नुहुने एक हजारभन्दा बढी सरोकारवालाहरुसँग कसरी कक्षा १२ को परीक्षा लिने भन्नेबारे बोर्डले छलफल गरेको थियो,’ प्रवक्ता अर्यालले ‘उहाँहरुबाट ८ वटा सुझाव आएको थियो। तिनलाई बोर्डमा छलफल गरेर मन्त्रालयमा २ विधि पेस गरेका हौँ।’
कक्षा ११ र १२ को परीक्षासम्वन्धी सुझाव शिक्षा, विज्ञान, तथा प्रविधि मन्त्रालयमा आइसकेको र तर कुन विधिबाट परीक्षा लिने निर्णय भइनसकेको मन्त्रालयका प्रवक्ता दीपक शर्माले बताए। ‘राष्ट्रिय परीक्षा बोर्डबाट दुईवटा विकल्प आएको छ,’ प्रवक्ता शर्माले भने, ‘तर यही विधिबाट परीक्षा लिने भन्ने निर्णय भने भइसकेको छैन।’
पहिलो विकल्प : चरणबद्ध परीक्षा
बोर्डले सुझाएको पहिलो विकल्पमा परम्परागत रुपमा नै चरणबद्ध परीक्षा लिइने उल्लेख छ। जसमा कोरोना महामारी कम भएका जिल्लाहरुमा भौतिक दूरी कायम राखेर तथा स्वास्थ्यका मापदण्ड पुरा गरेर परीक्षा लिइनेछ । त्यसपछि क्रमैले कम कोरोना महामारी भएका जिल्ला वा क्षेत्रमा परीक्षा लिने तयारी बोर्डको छ। ‘कोरोनाको अवस्था हेरेर चरणबद्ध परीक्षा लिने पहिलो विकल्प पेश गरेका छौँ,’ प्रवक्ता अर्यालले भने, ‘अलग प्रश्नपत्रमा देशैभरि अलग समयमा परीक्षा गर्ने कि भन्ने हाम्रो विकल्प हो।’
दोस्रो विकल्प : केही प्रतिशत प्रयोगात्मक र केही लिखित
यस्तै, पुरै १०० पूर्णांकको लिखित परीक्षा नलिइ केही प्रतिशत लिखित र केही प्रयोगात्मक लिने सुझाव दोस्रो विकल्पका रुपमा दिइएको प्रवक्ता अयार्लको भनाइ छ। ‘केही नम्बरको घरमै बसेर गर्न सकिने प्रोजेक्ट वर्क दिने र त्यही अनुसार मूल्यांकन गर्ने र बाँकी नम्बरको भौतिक रुपमा परीक्षा लिने गरी परीक्षा लिनुपर्ने बोर्डको दोस्रो सुझाव छ,’ अर्यालले भने, ‘भौतिक रुपमा परीक्षा लिन सम्भव भएन भने ओपन बुकमार्फत् पनि जान सकिने विकल्प दिएका छौँ।’
कक्षा ११ को ब्याक पेपरको के हुने ?
कक्षा ११ को नियमिततर्फको परीक्षा अवस्था सामान्य हुनेबित्तिकै विद्यालयले नै लिन सक्नेछन् । तर अघिल्लो वर्ष परीक्षा दिएका तर ब्याक पेपर भएकाहरुको हकमा भने विद्यालयले परीक्षा लिन नमिल्ने प्रवक्ता अर्यालले बताए। ‘पोहोर बोर्डले नै मूल्यांकन गरिसकेका र फेल भएका विद्यार्थीको हकमा पुन बोर्डले नै मूल्यांकन गर्नुपर्छ,’ अर्यालले भने, ‘कक्षा ११ को ब्याक पेपर लागेकाहरुको हकमा भने बोर्डले नै परीक्षा लिन्छ।’
अर्यालका अनुसार पहिलो विकल्प लागू भए एक चरणको परीक्षा र दोस्रो विकल्प लागू भए केही प्रतिशतको परीक्षा (होम असाइनमेन्टहरुको) परीक्षा दशैं अघि हुन सक्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
