काठमाडौं- जनयुद्धकालमा गोरखाको जेल तोडेर फरार भएकी जेल ब्रेकर उमा भुजेल पक्राउ हुनबाट जोगिएकी छन्। प्रतिबन्धित नेत्रविक्रम चन्द विप्लवको पार्टीका रहेकी भुजेल आइतबार साँझ पक्राउ गर्न अदालतको मूलढोकामा बसेका प्रहरीलाई चक्मा दिँदै भाग्न सफल भएकी हुन्।
यसअघि १२ पटकसम्म पक्राउ पर्ने र अदालतले छोड्नू भन्ने शृंखलाबाट गुज्रिएकी विप्लव नेतृ उमा फरार भएपछि प्रहरी भने तनावमा परेको छ। सर्वोच्चले आइतबार जिल्ला न्यायाधीश र जिल्ला बार एसोसियसनका अध्यक्षको रहोबरमा छोड्न आदेश दिएको थियो।
न्यायाधीशहरु दीपकुमार कार्की र हरिकृष्ण कार्कीको इजलासले तत्काल थुनामुक्त गर्न दिएको आदेशको जानकारी करिब ५ बजे सप्तरी जिल्ला अदालत पुगेको थियो। सर्वोच्च आदेशपछि अदालतले बार अध्यक्ष डोमन साहको रोहवरमा नेतृ उमालाई अदालत परिसरबाट रिहा गरेको थियो।
तर यसपछि उनी मुख्य गेटबाट निस्किएकी भए पक्राउ पर्ने थिइन्। मूल गेटमा नै पक्राउ गर्न प्रहरी बसिरहेको पनि थियो। तर यसरी मूल गेटबाट बाहिरिँदा पक्राउ परेर अभ्यस्त भइसकेकी उमाले यसपटक मूल गेटबाट बाहिरिइनन्। उनी मात्र होइन विप्लवकै अर्का नेतालाई पनि पुनः पक्राउ पर्नबाट जोगाइन्।
अदालत परिसरबाट निस्कने मूल गेट कुरेर बसेका प्रहरीलाई पत्तै नदिई पुनः पक्राउका लागि अदालत अगाडि बसेको प्रहरीलाई झुक्याएर नेत्रविक्रम चन्द ‘विप्लव’ समूहकी नेतृ भुजेल र नेता सुमनसिंह पौडेल बेपत्ता भएका हुन्।
सप्तरी जिल्ला अदालत अगाडि पक्राउ गर्न दुई इन्स्पेक्टरको नेतृत्वमा बसेको दुई दर्जन बढी प्रहरी तैनाथ थिए। उनीहरुको आँखा छल्दै भुजेल र पौडेल उम्कन सफल भएपछि पहरी भने तनावमा परेको छ। विप्लव नेता उम्किएपछि प्रहरीलाई खोजी तीव्र पारेको छ।
बन्दीप्रत्यक्षीकरणको रिटमा सर्वोच्च अदालतले रिहा गर्ने आदेश गरे बमोजिम उनीहरु रिहा भएपछि अदालत परिसरबाटै बेपत्ता भएको बार एसोसिएसनका अध्यक्ष साहले बताए।
उनीहरु अदालतबाट बार एसोसिएसनको पछाडिको ढोका हुँदै बेपत्ता भएका थिए। जिल्ला अदालत सुनसरीले भदौ २ गते पुर्पक्षका लागि साधारण तारखेमा रिहा गरेलगत्तै अदालत परिसरबाट बाहिर निक्लँदा पक्राउ परेका उनीहरुविरुद्ध इलाका प्रहरी कार्यालय कञ्चनरुप, सप्तरीले अभद्र व्यवहारको आरोप लगाउँदै भदौ ४ गते मुद्दा चलाएको थियो।
सुनसरीमा पक्राउ परेलगत्तै दुवै जनालाई सुनसरी प्रहरीले नियन्त्रणमा लिएर सप्तरी प्रहरीलाई बुझाएको पौडेलको परिवारका सदस्यले जानकारी दिएका छन्। आठ महिनाको अवधिमा भुजेल १२औ पटक पक्राउ परिसकेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
