काठमाडौं- गत आर्थिक वर्षम राजस्व संकलन ०.२ प्रतिशतले बढेको अर्थ मन्त्रालयले जनाएको छ। अर्थ मन्त्रालयले सार्वजनिक गरेको विवरण अनुसार अघिल्लो आर्थिक वर्ष २०७५/०७६ को तुलनामा गत आर्थिक वर्ष २०७६/०७७ मा राजस्व संकलन नगण्य मात्रामा बढेको हो।
अघिल्लो आर्थिक वर्षमा ८ खर्ब ३९ अर्ब रूपैयाँ राजस्व संकलन भएकोमा गत वर्ष ८ खर्ब ४१ अर्ब रूपैयाँ राजस्व संकलन भएको मन्त्रालयको भनाइ छ। आयकर र आन्तरिकतर्फको मूल्य अभिवृद्धि करबाहेक अन्य क्षेत्र नकारात्मक हुँदा राजस्व संकलनमा सामान्य मात्रै वृद्धि भएको हो।
मन्त्रालयका अनुसार भन्सार महसुल अघिल्लो आर्थिक वर्षको तुलनामा गत आर्थिक वर्षमा ११.१८ प्रतिशतले कम उठेको छ। गत आर्थिक वर्षमा १ खर्ब ३७ अर्ब रूपैयाँ भन्सार राजस्व संकलन भएकोमा त्यसअघिको वर्षमा १ खर्ब ५५ अर्ब रूपैयाँ मात्रै उठेको छ।
भन्सार राजस्व कम हुँदा त्यसको प्रभाव आयाततर्फको मूल्य अभिवृद्धि करमा पनि परेको छ। आयाततर्फको मूल्य अभिवृद्धि कर १७.२६ प्रतिशतले घटेको छ। आन्तरिकतर्फको मूल्य अभिवृद्धि कर ९.७२ प्रतिशतले बढेको छ। समग्रमा मूल्य अभिवृद्धि कर २ खर्ब २४ अर्ब रूपैयाँ संकलन भएको छ। जुन अघिल्लो वर्ष २ खर्ब ४१ अर्ब रूपैयाँ संकलन भएको थियो।
यसैगरी अन्तशुल्कतर्फ १७.४३ प्रतिशतको गिरावट देखिएको छ। आयातमा २५.८९ प्रतिशत र आन्तरिकतर्फ ११.९१ प्रतिशतले अन्तशुल्क घटेको छ। गत वर्ष १ खर्ब ६२ करोड रूपैयाँ अन्तशुल्क संकलन भएको थियो। त्यसअघिको वर्षमा १ खर्ब २१ अर्ब ८५ करोड रूपैयाँ अन्तशुल्क संकलन भएको थियो।
आयकरतर्फ १३ प्रतिशतको वृद्धि देखिएको छ। गत आर्थिक वर्षमा २ खर्ब १९ अर्ब रूपैयाँ आयकर संकलन भएको छ। त्यसअघिको वर्षमा १ खर्ब ९४ अर्ब रूपैयाँ आयकर संकलन भएको थियो।
यसैगरी गैरकरतर्फ ६.८२ प्रतिशतको गिरावट देखिएको छ। गत वर्ष ९३ अर्ब ७२ करोड गैरकर उठेको छ। त्यसअघिको वर्षमा १ खर्ब ५९ करोड रूपैयाँ गैरकर उठेको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।