काठमाडौं- उच्चस्तरीय वित्तीय क्षेत्र समन्वय समितिको बैठकले चालु आर्थिक वर्षको नीति तथा कार्यक्रम, बजेट वक्तव्य एवं मौद्रिक नीतिमा उल्लेखित व्यवस्था कार्यान्वयनको तयारीलगायतका विषयमा छलफल गरेको छ।
अर्थमन्त्री डा युवराज खतिवडाको अध्यक्षतामा सम्पन्न बैठकले घरेलु, साना तथा मझौला उद्यम एवं कोरोना प्रभावित पर्यटन व्यवसायमा श्रमिक-कर्मचारीको पारिश्रमिक भुक्तानी व्यवसाय सञ्चालनका लागि खडा गरिने कोष, नेपाल राष्ट्र बैंकबाट सञ्चालनमा आउने पुनर्कर्जा कोषको व्यवस्थापन एवं सञ्चालन र लघु बिमा तथा कोरोना रोगको बिमासम्बन्धी विषयमा छलफल भएको हो।
समितिले सरकारी ऋणपत्रको अभौतिकीकरण एवं दोस्रो बजार कारोबार तथा नेपाल धितोपत्र बोर्ड, नेपाल स्टक एक्स्चेन्ज तथा सिडिएस एण्ड क्लियरिङ्ग लिमिटेडको पुनर्संरचना, सहुलियतपूर्ण कर्जाका लागि ब्याज अनुदानसम्बन्धी एकीकृत कार्यविधि एवं हेजिङ्गसम्बन्धी नियमावली संशोधनका विषयमा छलफल गरेको छ। नेशनल पेमेन्ट गेटवे सञ्चालनको यथाशिघ्र कार्यान्वयनका लागि सबै निकायहरुले आ–आफ्नो जिम्मेवारीको कार्य सम्पन्न गरी अर्को बैठकमा प्रगतिसहित उपस्थित हुन पनि समितिले निर्देशन दिएको छ।
बिहीबार बसेको बैठकमा सबै निकायले गत वर्षको समीक्षासहित चालु आवको सुरुवाती प्रगतिका बारेमा बैठकमा जानकारीसमेत गराएका छन्। बैठकमा नेपाल राष्ट्र बैंकका गभर्नर, सचिव (राजस्व), धितोपत्र बोर्डका अध्यक्ष, बिमा समितिका अध्यक्ष, नेपाल बैंकर्स संघका अध्यक्ष, सहकारी विभागका रजिष्ट्रार तथा कम्पनी रजिष्ट्रार कार्यालयका रजिष्ट्रारलगायतका पदाधिकारीहरुको उपस्थिति थियो।
बैठकका एजेण्डामा छलफल हुनु अघि सबै निकायका प्रमुखहरुबाट अघिल्लो बैठकले गरेका निर्णयहरुको कार्यान्वयनको अवस्थाका बारेमा समीक्षासमेत भएको भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791545631.png)
-1786602170.png)
