नयाँ दिल्ली- भारतको उत्तरपूर्वी राज्य आसाममा भारी वर्षापछि आएको बाढीले कम्तीमा ९३ जनाको ज्यान गएको छ। राज्यमा गएको हप्तादिनसम्म परेको अविरल वर्षापछि ठूलो बाढी आएको थियो। त्यस बाढीमा परी जनधनको ठूलो क्षति भएको राज्यका अधिकारीहरुले बताएका छन्।
आसाम राज्यको विपद् व्यवस्थापन विभागले दिएको जानकारीअनुसार शुक्रबार बिहानसम्म ९३ जनाको ज्यान गएको छ। उनीहरु बाढीका कारण कोही बगेर र केहीको डुबेर ज्यान गएको हो। २५ लाख मानिस नराम्ररी प्रभावित भएका पनि सो विभागले जनाएको छ। उनीहरु घरबास छोडेर सुरक्षित स्थलतर्फ जानुपर्ने अवस्था आएको बताइएको छ।
विभागले दिएको जानकारीमा ३०० भन्दा बढी चौपाया पनि मरेका छन्। विभागका अनुसार गएको हप्तादेखि नै अविरल रुपमा वर्षा भइरहेको छ। सबैभन्दा बढी प्रभावित जिल्लाहरुमा धेमाजी, लखिमपुर, विश्वनाथ, दराङ, बाक्सा, नालबारी, बारपेटा, चिराङ, बोन्गाइगाउँ, कोक्राझार, ढुब्री, गोलपारा, कामरुप, मोरीगाउँ लगायतका रहेका छन्।
विभागले बढी मात्रामा प्रभावित भएका जिल्लाहरु कम्तीमा पनि २६ ओटा रहेका जनाएको छ। वर्षा अझै रोकिएको छैन र खतरा पनि नटरेको विभागले जनाएको छ। आसाममा वर्षेनी बाढीले सयभन्दा बढी नागरिकको ज्यान लिने गरेको छ। गत वर्ष पनि यस्तै भीषण वर्षा र बाढीबाट ठूलो जनधनको क्षति भएको थियो।
(रासस-एएनआई)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770562345.jpg)
-1764146706.png)
