सांकेतिक तस्बिर
प्युठान- प्युठानमा भएकाे ट्र्याक्टर दुर्घटनामा परी मृत्यु हुने सातै जनाकाे पहिचान खुलेकाे छ। उनीहरु सबै राेल्पाका हुन्।
दुर्घटनामा परी मृत्यु हुनेमा रोल्पा रुन्टीगढी गाउँपालिका ५ का २१ वर्षीय सागर बस्नेत, २४ वर्षीय रिमबहादुर बस्नेत, २५ वर्षीय कबिराम बस्नेत, १९ वर्षीय विरेन्द्र बाठामगर, १९ वर्षीय थमन बाठामगर, रोल्पाकै त्रिवेणी गाउँपालिकाका चालक २५ वर्षीय कमल कुँवर र उमेर नखुलेका गोवर्द्धन बुढामगर छन्।
मृतकहरु भिङग्री–स्वर्गद्वारी सडकखण्डमा काम गर्ने कामदार रहेको जिल्ला प्रहरी कार्यालय प्युठानका सूचना अधिकारी प्रहरी निरीक्षक विष्णुप्रसाद पौडेलले जानकारी दिए। धरमपानीबाट भिङ्ग्रीतर्फ आउँदै गरेको ट्याक्टरमा आठ जना सवार थिए। तीमध्ये रोल्पाका विशाल थापा मात्र हामफालेर बाँच्न सफल भएका छन्।
ट्र्याक्टर सडकबाट करिब पाँच सय मिटर तल खसेको छ। वर्षा भइरहेकाले उद्धारमा कठिनाइ भइरहेको प्रहरीले जनाएको छ। प्युठानकाे स्वर्गद्वारी नगरपालिका-३ रुमालेमा गएराति लु २ च ४२३४ नम्बरको ट्र्याक्टर दुर्घटनामा परेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
