काठमाडौं- इंग्लिस प्रिमियर लिगमा मंगलबार राति चेल्सीले नरविच सिटीलाई हराएसँगै आउँदो सिजन च्याम्पियन्स लिगमा पुग्ने चेल्सीको सम्भावना बलियो भएको छ। विजेता लिभरपुल र म्यानचेस्टर सिटीसँगै च्याम्पियन्स लिग खेल्ने दुई टिम कुन हुन्छन् भने प्रतिस्पर्धा थप रोचक बनेको हो।
म्यानचेस्टर सिटीमाथि लागेको दुई वर्ष युरोपियन प्रतिस्पर्धाको प्रतिबन्ध फुकुवा भएसँगै लिगको शीर्ष चारभित्र अटाउने टिमबारेको निर्णय अन्तिम चरणसम्म पुग्ने देखिन्छ। अहिले तेस्रो स्थानमा रहेको चेल्सीको ३६ खेलमा ६३ अंक छ। चौथो स्थानको लेस्टर सिटीको ३५ खेलमा ५९, पाँचौँमा रहेको म्यानचेस्टर युनाइटेडको ३५ खेलमा ५९ अंक नै छ।
च्याम्पियन्स लिगमा लिभरपुल र म्यानचेस्टर सिटीसँगै बाँकी दुई टिममा चेल्सी, लेस्टर र म्यानचेस्टर युनाइटेडको सम्भावना बलियो देखिए पनि वुल्भ्स, सेफिल्ड युनाइटेड र टोटनह्यामको सम्भावनालाई पनि नकार्न मिल्दैन।
छैठौँमा रहेको वुल्भ्सको ३५ खेलमा ५५ अंक छ। सातौँ स्थानको सेफिल्डको ३५ खेलमा ५४ अंक र आठौँ स्थानमा रहेको टोटनह्यामको ३५ खेलमा ५२ अंक छ। त्यसैले गणितीय सम्भावनाका हिसाबले प्रतिस्पर्धा अझै पनि ६ टिमबीच छ।
च्याम्पियन्स लिग प्रिमियर लिगबाट शीर्ष तीन टिम मात्र पर्न सक्ने खतरा पनि यथावत छ। किनभने प्रिमियर लिगबाट च्याम्पियन्स लिगमा अधिकमा पाँच टिम सहभागी हुन पाउँछन्। यस्तोमा यदि यो सिजनको च्याम्पियन्स लिग चेल्सीले जितेर वुल्भ्स या म्यानचेस्टर युनाइटेडले युरोपा लिग जितेमा र जित्ने टिम शीर्ष चारमा नपरेमा त्यो सम्भावना देखिन्छ।
म्यानचेस्टर सिटी र चेल्सीले यही सिजनको च्याम्पियन्स लिगमा साथै वुल्भ्स र म्यानचेस्टर युनाइटेडले युरोपा लिगमा प्रतिस्पर्धा गर्न बाँकी नै छ। उनीले उपाधि जितेमा आउने वर्ष च्याम्पियन्स लिगमा स्वत स्थान बनाउनेछन्।
जस्तो कि चेल्सीले यो सिजन च्याम्पियन्स लिग जितेर प्रिमियर लिगमा शीर्ष चारमा पर्न सकेन भने आउने सिजन प्रिमियर लिगबाट पाँच टिम च्याम्पियन्स लिगमा हुनेछन्। यही विषय म्यानचेस्टर युनाइटेड र वुल्भ्समा पनि लागु हुन्छ। तर यी टिमले युरोपियन प्रतिस्पर्धाको उपाधि जितेर प्रिमियर लिगमा पनि शीर्ष चारमा परेमा भने तीनै चार टिम आउँदो वर्ष च्याम्पियन्स लिग खेल्नेछन्।
चेल्सी
चेल्सीको अहिले ३६ खेलमा ६३ अंक छ। चेल्सीको बाँकी दुई खेलमा २२ जुलाइमा पहिलो लिभरपुलसँग र २६ जुलाइमा दोस्रो वुल्भ्ससँग छ। जसबाट चेल्सीलाई अब चार अंकको आवश्यकता रहन्छ।
यदि चेल्सीपछिका टिमले बुधबारको खेलमा अंक गुमाएमा चेल्सीले लिभरपुलसँग खेल्ने बेला उसलाई च्याम्पियन्स लिग पुग्न तीन अंकको मात्र आवश्यकता पर्नेछ।
लेस्टर सिटी
लेस्टरको अहिले ३५ खेलमा ५९ अंक छ। लेस्टरले अबको बाँकी खेलमा पहिलो खेल १६ जुलाइमा सेफिल्ड युनाइटेडसँग खेल्नेछ, दोस्रो खेल टोटनह्यामसँग १९ जुलाइमा र तेस्रो खेल म्यानचेस्टर युनाइटेडसँग २६ जुलाइमा छ।
लेस्टरका लागि बाँकी खेल जित्नुको विकल्प छैन। अहिलेको परिस्थिति हेर्दा लेस्टर र म्यानचेस्टर सिटीको अन्तिम खेलको विजेता नै च्याम्पियन्स लिग पुग्न सक्ने सम्भावना पनि उतिनै देखिन्छ।
म्यानचेस्टर युनाइटेड
अहिले म्यानचेस्टर युनाइटेडको ३५ खेलमा ५९ अंक रहेको छ। यसअघि सेफिल्ड युनाइटेडसँग चेल्सी पराजित हुँदा युनाइटेडलाई माथि चढ्ने राम्रो अवसर थियो। तर युनाइटेडले साउथह्याम्पटनसँग २-२ गोलको बराबरी खेल्यो।
अब बाँकी तीन खेलमा युनाइटेडले पहिलो खेल १६ जुलाइमा क्रिस्टल प्यालेससँग, दोस्रो खेल २२ जुलाइमा वेस्ट ह्यामसँग र तेस्रो खेल २६ जुलाइमा लेस्टरसँग खेल्दैछ। लेस्टर र युनाइटेडको सम्भावनाको अवस्था उस्तै देखिन्छ। दुवैलाई बाँकी खेल जित्ने दबाब छ।
वुल्भ्स
अहिले वुल्भ्सको ३५ खेलमा ५५ अंक रहेको छ। अब ब्रन्ली, क्रिस्टल प्यालेस र चेल्सीसँग खेल्न बाँकी रहेको वुल्भ्सको च्याम्पियन्स लिग पुग्ने सम्भावना झिनो छ। अहिले नै लेस्टर र म्यानचेस्टर युनाइटेडभन्दा वुल्भ्स चार अंकले पछि छ।
सेफिल्ड युनाइटेड
सेफिल्डको अहिले ३५ खेलमा ५४ अंक छ। सेफिल्डले अब लेस्टर, इभर्टन र साउथह्याम्पटनसँग खेल्न बाँकी छ। युरोपा लिगको सम्भावना राम्रो भए पनि सेफिल्डको च्याम्पियन्स लिग सम्भावना भने कमजोर छ। लेस्टरसँग नै पाँच अंकले पछि रहेको सेफिल्डका लागि अरु टिमको नतिजा धेरै निर्भर रहन्छ।
टोटनह्याम
आठौँ स्थानमा रहेको टोटनह्यामको अहिले ३५ खेलमा ५२ अंक रहेको छ। टोटनह्यामले अब न्युक्यासल, लेस्टर र क्रिस्टल प्यालेससँग खेल्न बाँकी रहेको छ। च्याम्पियन्स लिगको सम्भावना असाध्यै न्यून रहेको टोटनह्यामका लागि युरोपा लिगका लागि पनि संघर्ष गर्नुपर्ने देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1794037350.jpeg)
-1786602170.png)
