काठमाडौं- मालिन्दो एयरको जहाज बिहीबार राति दुर्घटनामा परेपछि त्रिभुवन विमानस्थलको उडान र अवतरण प्रभावित बनेको छ।
मलेसियाको राजधानी क्वालालाम्पुरका लागि उड्न लागेको जहाज त्रिभुवन अन्तर्राष्ट्रिय विमानस्थलको रनवेबाट चिप्लिएर गएराति १० बजेतिर दुर्घटनामा परेको थियो। ओडी १८१ नम्बरको उक्त जहाज रनवेबाट चिप्लिएर घाँसे मैदानमा जोतिएको छ। जहाजमा जम्मा १३९ यात्रु थिए। चालक दलका सदस्य र सबै यात्रुहरुको सकुशल उद्धार गरिएको विमानस्थलका महाप्रबन्धक राजकुमार क्षेत्रीले जानकारी दिए।
तालिका अनुसार उक्त जहाजको उडान समय राति ९:४५ बजेको थियो।
जहाज भासिएको ठाउँबाट ननिकालेसम्म अन्तर्राष्ट्रिय उडान र अवतरण बन्द गरिएको विमानस्थल प्रशासनले जनाएको छ। विमानस्थल कार्यालयका प्रवक्ता प्रेमनाथ ठाकुरले प्राविधिकहरुले जहाज मर्मत गरिरहेकाले कतिबेरमा जहाज निकालिने बारे भन्न नसकिने बताए। जहाज निकाल्न एयरलाइन्सका प्राविधिक र नेपाली सेना खटिएका छन्।
अवतरणका लागि आएका अन्तरराष्ट्रिय विमानहरु भारत र बंगलादेशतिर डाइभर्ट गरिएकाे छ। सयौं यात्रु अलपत्र परेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791545631.png)
-1786602170.png)
