काठमाडौं- टोटनह्यामका प्रशिक्षक जोसे मोउरिन्होले गोलकिपर ह्युगो लोरिस र फरवार्ड सन हुङ मिनबीच भएको भनाभन राम्रो भएको प्रतिक्रिया दिएका छन्। प्रिमियर लिग अन्तर्गत इभर्टनसँगको खेलमा मध्यान्तरमा दुई खेलाडी झगडा गरेका थिए।
त्यसरी खेलाडीबीचको सामान्य झगडाले टिमलाई अगाडि बढ्न मद्धत गर्ने मोउरिन्होको भनाइ छ। मध्यान्तरमा खेलाडीहरु बाहिर निस्कँदा सनको बाटो छेकेर कप्तान लोरिस अगाडि बढेका थिए। लोरिसले रिसाएर गरेको व्यवहार स्पष्ट देखिन्थ्यो।
२४औँ मिनेटको आत्मघाती गोलमार्फत जित पाएको टोटनह्यामका कप्तान लोरिसले खेलपछि आफूहरुमा कुनै समस्या नरहेको प्रतिक्रिया दिए। ‘त्यो कुराहरु चेन्जिम रुमसम्मका विषयहरु मात्र हुन्। हामीबीच जे भयो त्यो फुटबल अन्तर्गतकै विषय हो। बेला बेला यस्तो हुन्छ। खेल सकिँदा हामी खुसी थियौँ’ लोरिसले भनेका छन्।
एभर्टनविरुद्धको जित प्रशिक्षक मोउरिन्होको प्रिमियर लिगमा दुई सयौँ जित थियो। दुई सय खेल जित्ने मोउरिन्हो पाँचौँ प्रशिक्षक हुन्। यसअघिको खेलमा सेफिल्ड युनाइटेडसँग ३–१ ले हार्दा मोउरिन्होले खेलाडीहरुको सोचमा प्रश्न उठाएका थिए।
‘म आलोचनात्मक हुने कुरामा विश्वास राख्छु। उनीहरु जति हुनु पर्ने त्यति समालोचनात्मक रुपमा प्रस्तुत हुँदैनन्। मैले एकअर्कासँग अझै बढी मेहनतको आश राख्न पनि भनिरहेको हुन्छु’, मोउरिन्हो भन्छन्, ‘सन निकै राम्रा छन्। सबैलाई उनी मन पर्छ। लोरिसले उनले अझै मेहनत गरेर टिमका लागि बढी गर्न सक्छन् भनेका हुन्।’
जारी सिजन ३३ खेलमा ४८ अंकसहित टोटनह्याम आठौँ स्थानमा छ। पाँच खेल बाँकी रहेको अवस्थामा टोटनह्यामलाई युरोपियन प्रतिस्पर्धामा जाने गरी अगाडि बढ्न मुस्किल देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
