काठमाडौं- नेपाली फिल्म क्षेत्रमा कलाकारमाथि हुने गरेको व्यवहारबारे अभिनेत्री साम्राज्ञी राज्यलक्ष्मी शाहले इन्स्टाग्राममा भिडियो राखेपछि निर्देशक तथा अभिनेता भुवन केसीसँग सुरु भएको विवाद चर्किँदै गएको छ।
साम्राज्ञीले इन्स्टाग्राममा सुटिङका क्रममा आफूले भोगेको तीतो अनुभव पोखे पनि कसैको नाम लिएकी थिइनन्। अभिनेता तथा निर्माता केसीले फेसबुकमा साम्राज्ञीको प्रतिवाद गर्दै स्टाटस राखे। त्यसको प्रतिवाद गर्दै अभिनेत्री साम्राज्ञीले अर्को भिडियो पोस्ट गरिन्। तर केसीको नाम लिइनन्। तर उनको भिडियोको सन्देश केसीका लागि थियो भन्ने प्रस्टै थियो।
बिहीबार एकाएक केसीले चलचित्र कलाकार संघमा अभिनेत्री साम्राज्ञीले नभएको आरोप लगाएर चरित्रहत्या गरेको भन्दै निवेदन दिए। उनी यतिमै रोकिएनन्। फेसबुकमा उनलाई सम्बोधन गर्दै पत्र समेत राखे जहाँ उनले आफ्नो मान प्रतिष्ठामा आघात पुग्नेगरी मानमर्दन हुने प्रकारका सामाग्रीहरू इन्स्टाग्राम , फेसबूक या अन्य कुनै पनि सामाजिक सन्जालमा पोस्ट नगर्न र गरे कानुन बमोजिमको सजायको भागेदारी गराउनका निमित्त,आवश्यक कानुनी प्रकृयाको थालनी गर्ने चेतावनी दिएका छन्।
साम्राज्ञीको नाममा केसीले पोस्ट गरेको पत्र :
डियर साम्राज्ञी,
तपाईंलाई पहिलो पटक नायिकाको रुपमा सुपर काजल फिल्मको चलचित्र ड्रिम्सबाट चलचित्र क्षेत्रमा पदार्पण गर्ने मौका दिने व्यक्तिप्रति तपाईं धन्यवादी हुनुहुन्छ भन्नेमा म अपेक्षा गर्दछु! करिब ६ वर्षअगाडि निर्माण भएर प्रदर्शन समेत भएर सुपर हिट भएको चलचित्र ड्रिम्सको सुटिङको क्रममा पानी खान पाइन, छाता ओढ्न पाइन, सुविधा प्राप्त भएन भन्नेजस्ता झुठा कुराहरु उठाएर चलचित्र प्रदर्शन भएको लगभग तीन वर्ष पछाडि र आज भोलिमात्र मलगायत अरु निर्माताहरुलाई पनि गालीगलौज गरेको देख्दा आश्चर्य लागेको छ। आफूलाई ब्रेक दिने पितातुल्य व्यक्तिको बारेमा अनर्गल तथा झुठा कुराहरु उल्लेख गरेर तपाईंले मेरो बारेमा आफ्नो इन्स्टाग्रममा भिडियो बनाई पोस्ट गर्नुभएको सामाग्रीहरुको सम्बन्धमा मेरो गम्भीर ध्यानाकर्षण भएको छ।
अब उप्रान्त तपाईंले म भुवन केसीले विगत करिब चालिस वर्षदेखि नेपाली चलचित्रमा काम गरी विभिन्न सुपरहिट फिल्म निर्माण पनि गरी आजसम्म यही चलचित्र क्षेत्रमा रातदिन कार्यरत रही मैले हासिल गरेको मान प्रतिष्ठाहरुमा आघात पुग्नेगरी पुनः त्यस्ता मानमर्दन हुने प्रकारका सामाग्रीहरु इन्स्टाग्राम, फेसबूक या अन्य कुनै पनि सामाजिक सन्जालमा पोस्ट नगर्नहुन सुचित गर्दछु!
मेरो यो सूचनाको बावजुद तपाईंले यस्ता झुठा लान्छना लगाउने कार्यहरु गरे गराएमा तपाईं उपर प्रचलित साइबर कानुन र मानहानी सम्बन्धी कानुनको प्रगोग गरी मलाई पुग्न गएको मानसम्मानको हानी नोक्सानी उपर तपाईंबाट एथोचित क्षतिपुर्ति गराउने र तपाईंलाई कानुन बमोजिमको सजायको भागेदारी गराउनको निमित्त आवश्यक कानुनी प्रकृयाको थालनी गर्ने व्यहोरा तपाईंलाई बढो दु:खका साथ जानकारी गराउँदछु|
भवदीय भुवन के.सी
सिनामंगल ,काठमाडौं ,वडा न.९
मिति २०७७ साल, अषाढ १८ गते
शुभम्!
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.jpg)
