सुरक्षा/अपराध

सुस्मिता क्षेत्री हत्याकाण्ड : छोराको मृत्युको क्षतिपूर्ति लिँदा बुहारीको गयो ज्यान

नारायण अधिकारी सोमबार, असार १५, २०७७ १६:५०

काठमाडौं- मकवानपुरको हेटौंडा उपमहानगरपालिका–४ स्थित सुस्मिता क्षेत्री थापाको हत्याको कारण आर्थिक पक्ष रहेको प्रहरी अनुसन्धानले देखाएको छ। सुस्मिताका श्रीमान् रुपेन्द्र थापाको गत वर्षको असोज २३ गते मोटरसाइकल दुर्घटनामा नवलपरासीको दाउन्नेमा मुत्यु भएको थियो। सो बापतको क्षतिपूर्ति र बिमासहितका रकम श्रीमती सुस्मिताले लिएपछि उनको हत्या भएको पाइएको मकवानपुर प्रहरीले जानकारी गराएको हो।

जिल्ला प्रहरी कार्यालय मकवानपुरका प्रमुख एसपी सुशील सिंह राठौरले हत्याको कारण मध्येको एक पक्ष चाँहि रूपन्द्रको मुत्युपछि आउने क्षतिपूर्ति र बिमासहितको रकमसमेत रहेको जनाए।

क्षतिपूर्तिबापतको ५ लाख रुपैयाँ सुस्मिताले लिएकी थिइन्। तर रुपेन्द्रका बुबाआमासहित आफन्तले भने उक्त पैसा आफूहरूसमेत पाउनुपर्ने भन्दै विवाद गरेका थिए।

त्यस्तै रुपेन्द्रले काम गर्ने क्लोज सिस्टम इन्टरनेसनल नेपाल प्रालि (सिएसआई) हेटौंडाबाट मृत्युपश्चात् पाउने बीमा, बोनस, तलबभत्ताबापत एकमुष्ठ ३८ लाख २८ हजार ४ सय ७२ रुपैयाँ भुक्तानी लिने विषयमा श्रीमती सुस्मिता र ससुरा प्रकाश, सासू तुलसाबीच विवाद भएको थियो। सोही रकमका विषयमा विवाद हुँदा उक्त रकम अहिलेसम्म पनि भुक्तानी भएको छैन। जसकारण रुपेन्द्रको परिवार मिलेर हत्या गरेको अनुसन्धानबाट देखिएको प्रहरीले जनाएको छ।

सामाजिक सुरक्षा कोषबाट २०७६ कात्तिक देखि २०७७ बैसाख महिनासम्मको १७ हजार १ सयको दरले १ लाख ७७ हजार ९ सय ४८ रुपैयाँ सुस्मिताको ग्लोबल आइएमई बैंकको खातामा पेमेन्ट भएको थियो। यो विषयमा पनि उनीहरुबीच विवाद भएको थियो।

नेसनल लाइफ इन्स्योरेन्स कम्पनी लिमिटेडबाट रुपेन्द्रको १० लाख ६३ हजार ९ सय १४ रुपैयाँ इच्छ्याएको व्यक्ति रुपेन्द्रका बाबुले लिइसकेको पाइएको अनुसन्धानले देखाएको छ।

मृतक सुस्मिताले पाउने सबै रकम निकाले घरपरिवारमा पनि दिनुपर्छ भनेर दबाब दिएपछि सोही विषयमा विवाद हुँदा उनको हत्या भएको देखिएको एसपी राठौरले जानकारी दिए।

रुपेन्द्रको ससुरालीबाट घर फर्कने क्रममा दुर्घटनामा मृत्यु भएपछि सुस्मितालाई रुपेन्द्रको परिवारले ससुराली पक्षलाई दोष लगाउने गरेका थिए। बुहारीकै कारण छोराको ज्यान गएको भन्दै मानसिक यातना दिइएको समेत पाइएको प्रहरीले जनाएको छ।

सुस्मिताको हत्या गर्नुको अर्को कारण भने ससुरा प्रकाश थापाबाट बाथरुममा जबरजस्ती करणी उद्योग गरेको पाइएको प्रहरीले जनाएको छ। उक्त कुराको पोल खुल्ने डरले हत्या भएको पनि हुनसक्ने देखिएको प्रहरीको भनाइ छ।

कसरी भयो हत्या?
असार १ गते राती साढे ९ बजे सुस्मिताका ससुरा प्रकाश थापा र सासु तुलसा थापा बेलुकाको खाना खाई भान्छा कोठाबाट आफ्नो सुत्ने कोठातर्फ गएका थिए। खाना खानुभन्दा अगाडि ससुरा प्रकाश थापाले रक्सी खाएका थिए।

उनीहरु सुत्न जाँदा सुस्मिताकी नन्द सीता थापा र सुस्मिता क्षेत्री थापा भई भान्छा कोठामा खाना खाइरहेका थिए।

सुस्मिता क्षेत्री थापा महिनावारी भएकाले भान्छा कोठाको भुईंमा बसेर खाना खाँदै थिइन्। सोही समयमा ससुराले बाहिरबाट काठको लौरो हातमा लिएर भान्छाकोठामा प्रवेश गरी बुहारीको टाउकोमा प्रहार गरेका थिए। यसपछि सुस्मिता भुईंमा लडेको प्रहरी अनुसन्धानबाट खुलेको छ।

त्यही मौकामा सुस्मिताकी नन्द सीता थापाले समेत सुस्मितामाथि प्रहार गरिन्। त्यसपछि सुस्मिताले 'बचाउ बचाउ' भनेकी थिइन्। सासू तुलसा थापाले सुनेर भान्छाकोठामा आउन लाग्दा ससुरा र नन्द सीताले सासू तुलसालाई भान्छाबाट बाहिर निकाल्दै थिए। त्यसपछि ससुरा र नन्द सीता थापा मिली पटकपटक काठको लौरो र ढुङ्गाको लोहोरोले सुस्मितामाथि प्रहार गरी हत्या गरेको खुलेको प्रहरीले जनाएको छ।

सुस्मिताको मृत्यपश्चात् सासू तुलसा भित्र गएर फुटेको सिसाको कचौराको टुक्राहरू जम्मा गरी प्लास्टिकको झोलामा हाली बाहिर भान्छाकोठाको अगाडिको बरन्डामा राखिन्। पछि सीता थापाले आफ्नी आमालाई लिएर सुत्ने कोठामा लगी हल्ला नगर्न भनिन्।

बाबुछोरी मिली घटनास्थललाई आत्महत्या जस्तो देखाउनको लागि सल्लाह गरी भान्छाकोठा भित्र बिग्रिएका सबै चिजवस्तु यथास्थानमा मिलाएर राखेका थिए। भान्छाकोठामै भएको कपडाको चकटीले मृतकको निधारमा भएको घाउ छोपी विभिन्न स्थानमा लागेका रगतहरू पुछेका थिए।

छोरी सीता थापालाई भान्छाकोठाको ढोकाबाट निकाली ससुरा प्रकाश थापाले भित्रबाट भान्छाकोठाको ढोकाको चुक्कुल लगाए। भान्छाकोठाको पछाडिको आल्मुनियमको स्लाइडिङ झ्यालबाट बाहिर निस्की बाहिरबाट उक्त झ्याल पूर्णरूपमा बन्दसमेत गरेको पाइएको मकवानपुरका डिएसपी इन्द्रबहादुर रानाले बताए।

भान्छाकोठाको बरन्डामा राखेको फुटेको सिसाको टुक्राहरू राखेको प्लास्टिकको झोला र काठको लौरो घर पछाडिको मकैबारीमा फाले। त्यसपछि बाबु छोरी दुवै जनाले रगत लागेका कपडाहरू धोई पखाली आ–आफ्नो शरीरमा लागेको रगत समेत पखालेर आ–आफ्नो कोठा गए।

भोलिपल्ट असार २ गते बिहान ५ बजेको समयमा समयमा मूलढोकाको च्यानल गेट खोली छर छिमेकमा गई बुहारीले भान्छा कोठामा आत्महत्या गरेको भनी जानकारी गराएपश्चात् छरछिमेकमार्फत् प्रहरीलाई खबर भएको थियो। प्रहरीमा खबर आउनासाथ वडा प्रहरी कार्यालय हेटौँडाबाट साढे ६ बजे प्रहरी घटनास्थल पुगेको थियो। पछि एसपी राठौरसहितको टोली मेडिको लिगलसहितको टिम लिएर घटनास्थल गएका थिए।

त्यसपछि ससुरा प्रकाश, सासू तुलसा, नन्द सीता, जेठी नन्द दुर्गा थापा कार्कीलाई नियन्त्रणमा लिएर प्रहरीले अनुसन्धान सुरु गरेको छ। पक्राउ परेका उनीहरुलाई कर्तत्व ज्यानको कसुरमा अनुसन्धान अघि बढाइएको प्रहरीले जानकारी दिएको छ।