काठमाडौं- स्पेनिस क्लब बार्सिलोनामा रहेका लियोनल मेस्सीले ला लिगा अन्तर्गत मंगलबार राति लेगानेसविरुद्ध गोल गर्दै आफ्नो खेल जीवनमा ६ सय ९९ गोल पूरा गरे। मेस्सीले बार्सिलोनाका लागि ७ सय २० खेलमा ६ सय २९ गोल साथै अर्जेन्टिनाको राष्ट्रिय टिमबाट १ सय ३८ खेलमा ७० गोल गरेका छन्।
लेगानेसलाई २–० ले हराएको खेलमा मेस्सीले दोस्रो गोल गरेका हुन्। खेलको ६८औँ मिनेटमा पाएको पेनाल्टी मेस्सीले गोलमा परिणत गरेका थिए। उत्कृष्ट रुपमा बल बढाइरहँदा मेस्सीविरुद्ध नै फोउल भएको थियो। गोलपछि मेस्सीले फरक शैलीमा ‘सेलिब्रेसन’ गरे।
जुन पेनाल्टी गोल मेस्सीले ला लिगामा गरेको ५६औँ पेनाल्टी गोल थियो। ला लिगामा पेनाल्टीमार्फत धेरै गोल गर्नेमा मेस्सीले लिजेण्ड खेलाडी ह्युगो सान्चेजसँग बराबरी गरेका छन्। त्यसअघि क्रिष्टियानो रोनाल्डो छन्। ला लिगामा मेस्सीले १२ पेनाल्टी भने मिस गरेका छन्।
लेगानेसविरुद्धको गोल गरेपछि डिफेन्डर जेरार्ड पिकेले मेस्सीको कानमा केही बोलेका थिए। जसपछि मेस्सी फरक खाले सेलिब्रेसन गर्दै गरेका देखिए। एउटा हात कम्मरमा राखेर अर्को हात माथि उठाएर उभिएका मेस्सीले एक औला ठड्याइरहेका देखिन्थे।
मेस्सीको फरक खालको गोल सेब्रिसन किन भयो भन्ने बारेमा विभिन्न खाले अनुमानहरु भइरहेका छन्। डिस्को नाचेको जस्तो देखिने, फोर्टनाइट गेम, सात सयौँ गोलप्रतिको संकेत लगायत अनुमान भइरहे पनि धेरैले स्पेनमा मेस्सीको गोल सेलिब्रेसनलाई क्रिष्टोफर कोलम्बससँग जोडिएर चर्चा भइरहेको छ।
क्याटालोनियामा पछिल्लो सयम देखिएको विवादमा औपनिवेशिकरणसँग जोडेर क्रिष्टोष्फर कोलम्बसको मूर्ति हटाउने काम भइरहेका छन्। कोलम्बसलाई धेरैले दास दासीको व्यापारको कारकका रुपमा हेरेर विरोध गर्ने गरेका छन्। गोरा जातीको सर्वोच्चताको प्रतीकका रुपमा क्रिष्टोफरको मूर्तिलाई लिएर पनि विरोध भएका छन्।
अमेरिकाबाट सुरु भएको रंगभेदी आन्दोलनको विषयले मड्रिड हुँदै क्याटालोनियामा समेत प्रवेश पाएको हो। यसैले अहिले मेस्सीको गोल सेलिब्रेसनलाई त्यसैसँग जोडिएर हेरिएको छ।
बार्सिलोनाले आधिकारिक रुपमा केही नखुलाए पनि स्पेन र अर्जेन्टिनामा मेस्सीको गोल सेलिब्रेसनको चर्चा कोलम्बससँग जोडेर चुलिएको छ। कोलम्बसको मूर्ति निकाल्ने वा तोड्ने विषय अचेतन प्रतिमामाथिको नराम्रो व्यवहारका रुपमा रहेको र मेस्सीले त्यसको विरोध गरेको ब्याख्या भइरहेका छन्।
अर्जेन्टिनामा भने मेस्सीले क्रिष्टोफर कोलम्बसलाई समर्थन गर्दै त्यसरी गोलको खुसी मनाएको चर्चा छ। मेस्सी उभिएको शैलीमा नै कोलम्बसको मूर्ति बार्सिलोनामा रहेको छ। जसलाई त्यहाँबाट हटाउनुपर्ने मागहरु उठिरहेका छन्। सहरका मेयरले पनि त्यसलाई हटाउन अस्विकार गरिरहेका छन्।
तर मेस्सी स्वयमले त्यो सेलिब्रेसन के सोचेर गरेका थिए यकिन छैन। मानिसहरुले आफ्नो स्वार्थअनुसार आफ्नो शैलीमा मेस्सीको सेलिब्रेसनलाई लिएर ब्याख्या गरिरहेका छन्। यसअघि २०१३–१४ मा बार्सिलोनाको जर्सी क्रिष्टोफर कोलम्बसको मूर्तिमा लगाइदिँदा पनि यस्तै चर्चाहरु चलिरहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1698918398-1698987692.png)
-1764146706.png)
