काठमाडौं- विदेशमा अप्ठ्यारो परेकाहरूलाई स्वदेश फिर्ता हुनका लागि सरकारले कोरोना संक्रमण नभएको पुष्टि हुने पिसिआर वा आरडिटी परीक्षण अनिवार्य गरेको छ। पिसिआर र आरडिटी रिपोर्ट नेगेटिभ रिपोर्ट भएकाहरूलाई पनि विदेशबाट छुट्टाछुट्टै उडानमार्फत् स्वदेश फर्काइने कोरोना संकट व्यवस्थापन केन्द्र (सिसिएमसी)ले जनाएको छ।
आरडिटीको रिपोर्टमा पूर्ण विश्वास गर्न सकिने अवस्था नरहेकाले यी दुई किसिमका रिपोर्ट नेगेटिभ भएकाहरूलाई पनि छुट्टाछुट्टै स्वदेश फर्काइने व्यवस्था गरिएको सिसिएमसीले जनाएको हो।
‘हामीले पिसिआर र आरडिटी नेगेटिभ भएकालाई एउटै उडानमा मिसाएर नल्याउन भनेका छौँ। जुन देशमा पिसिआर परीक्षणको व्यवस्था छ ती देशबाट फर्कने सबैले पीसिआर परीक्षण गराउनै पर्ने र जुन देशमा आरडिटीको मात्र व्यवस्था छ सो देशकाले आरडिटी परीक्षण गराउने व्यवस्था मिलाउन कुटनीतिक नियोगहरूसँग कुरा राखेका छौँ,’ सिसिएमसीका सचिव महेन्द्र गुरागाइँले नेपाल लाइभसँग भने।
कोरोना परीक्षणको व्यवस्था नभएका मुलुकबाट ज्वरो मात्र नापेर पनि नेपाल ल्याइने
विदेशबाट नेपाल फर्कन पिसिआर वा आरडिटी परीक्षणको नेगेटिभ रिपोर्ट अनिवार्य गरिएको छ। तर हाल नेपाली रहेका देशमा पिसिआर वा आरडिटी दुवै परीक्षणको व्यवस्था छैन भने त्यस्ता मुलुकमा जटिल अवस्थामा रहेका नागरिकहरुलाई ज्वरो मात्र नापेरसमेत ल्याउन सक्ने व्यवस्था सरकारले गरेको छ।
नेपालीहरुलाई स्वदेश आउन सहजीकरण गर्ने सम्बन्धी कार्ययोजना २०७७ मा पिसिआर, आरडिटी वा अन्य परीक्षणको नेगेटिभ रिपोर्ट भनेर राखिएको छ।
अन्य भनेर व्यवस्था गरिएकाले पिसिआर वा आरडिटी परीक्षणको व्यवस्था नभएका मुलुकबाट ज्वरो मात्र नापेर समेत नेपाली ल्याउन सकिने भएको हो। यस्ता मुलुकबाट फर्कने नेपाली नागरिकहरुलाई छुट्टै उडानमार्फत ल्याउने र सोहीअनुसार व्यवस्थापन गर्ने सिसिएमसीका सचिव गुरागाइँ बताउँछन्।
पिसिआर परीक्षणको रिपोर्ट नेगेटिभ भएकालाई होम क्वारेन्टाइनमा
विदेशबाट फर्किएका आरडिटी वा अन्य परीक्षण गराएर फर्किएकाहरुलाई सरकारले तोकेका विभिन्न क्वारेन्टाइनमा १४ दिन राखिने व्यवस्था गरिएको छ।
तर पिसिआर परीक्षणको रिपोर्ट नेगेटिभ भएकाहरुलाई होम क्वारेन्टाइनमा पठाइने व्यवस्था गरिएको छ।
‘अन्तराष्ट्रिय मापदण्डअनुसार पनि पिसिआर नेगेटिभ भएकाहरु सिधै घर जान पनि मिल्छ। तर यात्राका क्रममा संक्रमण हुने जोखिम रहेकाले घर गएर पनि सुरक्षित तरिकाले क्वारेन्टाइनमा बस्नुपर्ने व्यवस्था गरिएको हो’ सिसिएमसीका सचिव गुरागाईं भन्छन्।
परीक्षण नगराएकासँगै आए पिसिआर नेगेटिभ पनि होम क्वारेन्टाइनमा जान नपाउने
पिसिआर नेगेटिभ भएकाहरु पिसिआर नगराएकासँग एउटै उडानमा स्वदेश फर्किएमा उनीहरु पनि होम क्वारेन्टाइनमा जान नपाउने सिसिएमसीका सचिव महेन्द्र गुरागाईंले बताए। गत जेठ २७ गते अस्ट्रेलियाबाट ११ जना नेपालीहरू स्वदेश फर्किए। स्वदेश फर्किएकाहरुमध्ये ९ जनासँग पिसिआर परीक्षणको नेगेटिभ रिपोर्ट थियो भने २ जना बिना परीक्षण फर्किएका थिए।
उनीहरु एउटै उडानमार्फत फर्किएकाले ती पीसिआर रिपोर्ट नेगेटिभ भएका ९ जनासमेत होम क्वारेन्टाइनमा जान पाएनन्। उनीहरुलाई होटल क्वारेन्टाइनमा राखिएको थियो।
विदेशबाट फर्किए ११ सय १७ फर्किए
हालसम्म विभिन्न मुलुकबाट ११ सय १७ नेपालीहरु स्वदेश फर्किएका छन्। मलेसियाबाट १, म्यानमारबाट २६, युएईबाट १६९, जापानबाट १३, अस्ट्रेलियाबाट ११, कुवेतबाट ४४८, अफगानिस्तानबाट १८, बंगलादेशबाट २५८, ओमानबाट १६६ र हङकङबाट ७ जना स्वदेश फर्किएका हुन्।
मंगलबार(आज ) बेलुका ९ बजे श्रीलंका र म्यानमारबाट १५४ नेपाली फर्किने नागरिक उड्डयन प्राधिकरणले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
