काठमाडौं- भारतीय क्रिकेट कन्ट्रोल बोर्ड बिसिसिआईले बन्द रंगशालामा खेल गर्ने गरी इन्डियन प्रिमियर लिग आइपिएल क्रिकेट गर्ने तयारी सुरु गरेको छ। बिसिसिआईका अध्यक्ष सौरभ गांगुलीले बिहीबार संघहरुलाई पठाएको पत्रमा आइपिएललाई लिएर आशावादी रहेको बताएका छन्।
गएको अप्रिल हुने तय रहेको आइपिएल क्रिकेट कोरोना भाइरस (कोभिड १९) को महामारीका कारण स्थगित भएको थियो। ‘यहि वर्ष आइपिएल गर्न सक्ने हरेक सम्भावनालाई हेरेर बिसिसिआईले काम गरिरहेको छ। बन्द रंगशालामा खेल गर्ने गरी अगाडि बढेका छौँ। समर्थक, प्रायोजक, प्रसारक सबैले आइपिएललाई चासोका साथ हेरेका छन्’ गांगुलीले उल्लेख गरेका छन्।
आइपिएल बिसिसिआईको कमाइको सबैभन्दा ठूलो माध्यम हो। यदि यो वर्ष आइपिएल क्रिकेट हुन नसकेकामा बिसिसिआईले प्रसारण अधिकारमार्फत प्राप्त गर्ने झण्डै ४ करोड भारतीय रुपैयाँ गुमाउने बताइन्छ।
तर क्रिकेटको व्यस्त तालिकामा नयाँ समय मिलाउन आइपिएलका लागि मुस्किल हुने देखिन्छ। एसिया कप, टी ट्वान्टी विश्वकपका साथै अन्य नियमित सिरिजका कारण राम्रो समय मिल्न कठीन छ।
जेठ ५ गते नै भारत सरकारले बन्द रंगशालामा खेल गतिविधि गर्न खुकुलो नीति लिएको थियो। जसले गर्दा आइपिएल क्रिकेट हुने आश बढेको हो। सरकारको निर्णयलाई क्रिकेटसम्बद्धहरुले स्वागत गरिरहेका छन्।
बिसिसिआईले पनि सरकारको खेल गतिविधि बन्द रंगशालामा गर्न दिने निर्णयको स्वागत गर्दै अहिले अरु परिस्थितिको पनि विचार गर्नुपर्ने भन्दै तयारी सुरु गरेको थियो। जहाँ सरकारको निर्णयसमेत आइपिएललाई मध्यनजर गरेर गरिएको बताइन्छ।
तर यात्रामा भइरहेको कठिनाइकै बीच खेल गतिविधि बन्द रंगशालामा नै सञ्चालन गर्न पनि सहज नहुने बताइएको छ। बिसिसिआईका कोषाध्यक्ष अरुण धुमाल क्रिकेट गतिविधिहरु सञ्चालन गर्नका लागि देशभित्र मात्र भए पनि हवाइ यातायात सहज हुनुपर्ने बताउँछन्।
आइपिएल अहिले अनिश्चित समयका लागि स्थगित भएको अवस्था छ। पहिले चैत १६ गतेदेखि गर्ने भनिएको प्रतियोगिता १८ दिन पछि सार्दै बैशाख ३ गतेका लागि नयाँ मिति तोकिएको थियो। तर कोरोना जोखिम बढ्दै जाँदा अर्को सूचना नभएसम्मका लागि स्थगित गर्ने निर्णय आएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791041970.png)
