काठमाडौं– छायाँ सरकारकी श्रम, रोजगार तथा सामाजिक सुरक्षामन्त्री डा डिला संग्रौलाले कार्यकर्ता पोस्ने भाँडो बनेको प्रधानमन्त्री रोजगार कार्यक्रमले बेरोजगारी समस्या हट्छ भनी प्रश्न गरेकी छन्।
सोमबार प्रतिनिधि सभा बैठकमार्फत डा संग्रौलाले श्रममन्त्री रामेश्वर राय यादवलाई सो प्रश्न गरेकी हुन्। पछिल्लो समय कोभिड १९ का कारण उद्योगधन्दा तथा कलकारखाना ठप्प हुँदा देशको अर्थ व्यवस्था नाजुक बन्दै गएको र यसबाट लाखौं बेरोजगारी सिर्जना हुने उनले बताइन्। त्यस्तै विदेशबाट समेत रोजगारी गुमाएर लाखौं युवाहरू फर्कने अवस्था रहेकाले रोजगारी सिर्जनामा सरकारले ध्यान पुर्याउनुपर्ने उनको भनाइ छ।
उनले भनिन्, ‘विगतमा हेर्ने हो भने बारीको झार उखल्ने, बाँदर धपाउने कार्यमा राज्यकोष दुरुपयोग गरियो।’
सामान्य अनुमान गर्दा पनि ४० लाखभन्दा बढी बेरोजगार युवाहरूलाई रोजगारी दिनुपर्ने अवस्था सिर्जना भएकाले सरकारले योजनाबद्ध रुपमा कार्यक्रम कार्यान्वयन गर्नुपर्ने संग्रौलाले बताइन्।
मन्त्री यादवले संग्रौलाको प्रश्नमाथि जवाफ दिँदै सरकारले सम्पूर्ण बेरोजगार युवाहरूलाई देशभित्रै रोजगारी सिर्जना गर्न कुनै पनि कसर बाँकी नराख्ने बताए।
उनले प्रधानमन्त्री रोजगार कार्यक्रममार्फत प्रारम्भिक चरणमा कहिँकतै बाँदर धपाउने‚ झार उखेल्नेलगायतका कार्य भएपनि बिस्तारै योजनाबद्ध रुपमा दीर्घकालीन उपलब्धीमूलक बनाउँदै लैजाने बताए।
यो कार्यक्रम कार्यकता पोस्ने नभएर विपन्न तथा बेरोजगार युवाहरूका लागि रोजगारी दिलाउन अघि सारिएको मन्त्री यादवको जोड थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770196062.png)
-1764146706.png)
