काठमाडौं- लकडाउनसँगै बन्द भएको आन्तरिक उडान असार १७ गतेबाट खुलाउने तयारी भएको छ। कोरोना भाइरस रोग रोकथाम तथा नियन्त्रण उच्चस्तरीय समितिले समेत आन्तरिक उडान खुलाउने विषयमा तयारी गरेसँगै नागरिक उड्डयन प्राधिकरणले पनि आन्तरिक उडान खुलाउने तयारी थालेका हो।
आइतबारबाटै टिक बुकिङ खुलाउने र १७ बाट आन्तरिक उडान सुरु गर्ने तयारी सरकारको छ। कोरोनाको हटस्पट क्षेत्रमा रहेका विमानस्थलको हकमा भने तत्काल कुनै निर्णय नभएको प्राधिकरण स्रोत बताउँछ। प्राधिकरणका एक सदस्यका अनुसार पहिलो चरणमा कम जोखिम भएको विमानस्थलको हकमा केही दिन टिकट बुकिङको समय दिने र असार १७ गतेबाट आन्तरिक उडान खुला गर्ने सहमति भएको हो।
पूर्ण रुपमा आन्तरिक उडान खुला गर्ने विषयमा भने तयारी गर्दै जाने सहमति भएको ती सदस्यले जानकारी दिए। तर, प्राधिकरण महानिर्देशक राजन पोखरेलले भने व्यवसायीसँगको छलफलमा यही मितिबाट उडान खाल्ने कुरामा निर्णय नभएपनि कसरी सुरक्षति गर्दै उडान सुरु गर्ने भन्ने विषयमा छलफल भएको स्वीकार गरे।
‘सरकारले हवाई उडान खुुल्ला गर्ने निर्णपछि मात्रै मिति तय हुन्छ,’ पोखरेलले भने, ‘वायुसेवा कम्पनीहरु भने १७ असारदेखि सेवा सुरु गर्न सहमत भएका छन्।’
वायुसेवा कम्पनी, यात्रु तथा विमानस्थल कार्यालयमा खटिने कर्मचारीले सुरक्षा निर्देशिका पालना गर्दै सामाजिक दुरी समेत काम गराउने गरी उडान गर्ने तयारी भएको हो। आन्तरिक उडानका लागि आवश्यक सबै सुरुक्षा व्यवस्थित गरेर उडान सुचारु गर्ने विषयमा नेपाल नागरिक उड्डयन प्राधिकरणले निजी हवाई सेवा प्रदायकसँग छलफल गरेको छ।
प्राधिकरण महानिर्देशक पोखरेलले बुद्ध एयरका संचालक वीरेन्द्रबहादुर बस्नेत, श्री एयरका संचालक सुधीर मित्तल र यती एयरका सिइओ उमेश राईबीच आन्तरिक उडान खुला गर्ने विषयमा छलफल गरेका हुन्।
केही दिन अगाडि मात्रै नेपाल नागरिक उड्डयन प्राधिकरणले आन्तरिक र बाह्य उडान दुवैलाई लक्षित गर्दै कोभिड विशेष सुरक्षा निर्देशिका कार्यान्वयनमा ल्याएको थियो। सुरक्षा निर्देशिकमा प्राधिकरणले हवाई यात्राका क्रममा टिकट र बोर्डिङ पास मात्र लिएर गर्नुपर्ने, यात्रुले कोभिड-१९ को स्वघोषणा पत्र भर्नुपर्ने उल्लेख गरेको थियो।
यसैगरी यात्रुले कोभिड जाँच गरे–नगरेको, स्वास्थ्य समस्या भए–नभएको उल्लेख गरेर फर्म भर्नु पर्ने निर्देशिका उल्लेख छ। यसैगरी घोषणापत्रमा झुठो विवरण राखेर हवाई यात्रा गरे कानुनी कारबाही भोग्नुपर्ने गरी सुरक्षा निर्देशिका प्राधिकरणले जारी गरेको थियो।
अन्तर्राष्ट्रिय हवाई यात्रुले भने आफ्नो ट्राभल हिस्ट्रीसमेत खुल्ने गरी विवरण भर्नुपर्ने निर्देशिकामा उल्लेख छ। यसैगरी जहाज चढ्ने बेला रुँघाखोकी लागेको, १००.४ फरेनहाइट भन्दा बढी तापक्रम भएको, सास फेर्न कठिन हुने समस्या भएको र स्वाद र गन्ध थाहा नपाउनेजस्ता कोभिड-१९ सँग मिल्दोजुल्दो लक्षणदेखिएमा हवाइ यात्रा गर्न नपाउने निर्देशिकमा उल्लेख छ।
७० वर्षभन्दा माथि, गर्भवती र गम्भीर स्वास्थ्य समस्याबाट गुज्रिरहेका व्यक्तिले समेत सम्भव भएसम्म हवाई यात्रा नगर्न प्राधिकरणले निर्देशिकामार्फत सुझाएको छ।
यसैगरी यात्रा अवधिमा मास्क अनिवार्य रहने प्राधिकरणको निर्देशिकामा उल्लेख छ। साथै आन्तरिक उडानतर्फ इनफ्लाइट क्याटरिङ बन्द गर्ने, सम्भव भएसम्म ट्रली प्रयोग नगर्ने र अतिरिक्त सहायता आवश्यक पर्ने यात्रुले मात्र यसको प्रयोग गर्नुपर्ने प्राधिकरणको सुरक्षा निर्देशिकामा समावेश गरेको छ। चैत ११ गतेबाट लकडाउन सुरुभएसँगै आन्तरिक उडान बन्द गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1767770856.png)
