काठमाडौै- अहिलेको कोरोना महामारीको बेलामा लकडाउनको पालना अनि सामाजिक दूरी कायम गराउन सर्वसाधारणलाई उत्प्रेरित गर्न सेलिब्रिटीहरुको भूमिका महत्वपूर्व हुन्छ नै। त्यसैले त हलिउडदेखि बलिउडसम्मका कलाकारहरु सामाजिक सञ्चालमार्फत आफ्ना फ्यानहरुलाई घरमै बस्न, सामाजिक दूरी कायम गर्न अनि भीडभाड नगर्न अपिल गरिरहेका छन्।
नेपालमा पनि केही कलाकारहरुले आफ्ना फ्यानप्रतिको जिम्मेवारी महसुस गर्दै लकडाउनको पालना र सामाजिक दूरी कायम गर्न प्रोत्साहित गर्ने गरेका छन्। कोरोना संक्रमितको संख्या बढेसँगै बढिरहेको संक्रमणको बेलामा समाजमा बलियो सामाजिक छवि बनाएका केही सेलिब्रिटी भने लकडाउनको बेलामा पनि भेला भएर सामाजिक दूरीको खिल्ली उडाउन सक्रिय देखिए।
उनीहरुले लुकिलुकी यस्तो गरेका पनि हैनन्। लकडाउनको बेलामा भेला भएर गरेको पार्टी सगर्व सामाजिक सञ्जालमा बाँडिरहेका छन्। संकटको बेलामा सामाजिक दायित्व बिर्सने कलाकार हुन्, सामाजिक विषयलाई व्यङ्ग्य कस्न माहिर कलाकार तथा फिल्म निर्माता दीपकराज गिरी, दिपाश्री निरौला, नायिका पूजा शर्मा, कलाकार किरण केसी, नेपाल चलचित्र विकास बोर्डकी पूर्वअध्यक्ष निकिता पौडेल, कलाकार अनुराग कुँवर र सञ्चारकर्मी रवि लामिछाने र उत्सव रसाइली।
सार्वजनिक भएको भिडियोमा उनीहरु कसैको घरमा भेला भएर पार्टी गरिरहेको देखिन्छ। उनीहरु भेला हुँदा न सामाजिक दूरी कायम गरेको देखिन्छ न कोरोना संक्रमणबाट जोगिन कुनै सुरक्षा उपाय नै अपनाएका छन्। कार्यक्रम ‘सिधा कुरा जनतासँग’ मार्फत घरमै भएको एक थोक तरकारीमा ऐना हेर्न मिल्ने गरी तङ्ग्रंग झोल हालेर खाउँ तर बाहिर नजाउँ’ भन्दै सन्देश दिने सञ्चारकर्मी लामिछाने सामाजिक दूरीको उलंघन गर्दै भएको जमघटमा रमाइरहेका देखिन्छन्। उनीहरुलाई नायिका शर्माले आज कत्ति रमाइलो भयो भन्दै धन्यवाद दिँएर बिदा गरेकाले पार्टीको आयोजक उनले नै गरेको देखियो।
भेला हेर्दा बाध्यात्मक देखिन्न। लकडाउनले उकुुसमुुकुस भएर फ्रेस हुने योजनामा उनीहरु भेला भएको देखिन्छ। सरकारले अहिले अत्यावश्यक सेवा बाहेक अन्य पेसामा संलग्नलाई अत्यावश्यक परेको अवस्था बाहेक सवारीसाधन प्रयोग गर्न दिएको छैन। सर्वसाधारणलाई अत्यावश्यक काम बाहेक सडकमा हिँड्न पनि रोकेको अवस्थामा उनीहरुले केका आधारमा सवारीसाधन प्रयोग गरे? यसले परिचित कलाकारले सरकारको निर्देशनको अवज्ञा र सरकारी पासको दुरुपयोग समेत गरेको देखियो।
राष्ट्रियस्तरका कलाकारबाट भएको यो व्यवहार संकटको बेला सुहाउँदो छ त?
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
