काठमाडौं- खाद्य व्यवस्था तथा व्यापार कम्पनी लिमिटेडले १० हजार मेट्रिक टन चामल खरिदका लागि दुई पटकसम्म गरेको बोलपत्र आह्वानमा एउटा पनि प्रस्ताव परेको छैन।
खाद्य व्यवस्था तथा व्यापार कम्पनीले पहिलोपल्ट गत चैत ५ गते र दोस्रो सूचना वैशाख १० गते जारी गरेको थियो। दोश्रो पटकको जारी गरिएको सूचनामा टेण्डर प्रस्ताव हाल्ने मिति पनि २५ गते सकिसकेको छ। तर चामल खरिदका लागि कसैले पनि टेण्डर हालेका छैनन्।
खाद्य व्यवस्था कम्पनीका प्रमुख कार्यकारी अधिकृत नेत्रप्रसाद सुवेदीले अब नयाँ टेण्डर आह्वान गरेर फेरि खरिद प्रकृया अगाडि बढाउन लागिएको बताए। ‘२ पटक प्रस्ताव आह्वान गर्दा पनि नपरेपछि अब खरिद मूल्यमा केही परिवर्तन गरेर बोलपत्र आह्वान गर्न लागेका छौं। हामी चुप लागेर त बस्दैनौं, थप खरिद गर्ने प्रकृयामा गइहाल्छौं। इमर्जेन्सी खरिद पनि गर्न सकिन्छ। अहिले आपूर्ति र ढुवानी नरोकिएका कारण संकटको अवस्थामा जस्तो तत्काल खरिद गरिहाल्नुपर्ने अवस्था छैन,’ उनले भने।
खाद्य व्यवस्था कम्पनीले लहान, विराटनगर, विरगञ्ज, बिर्तामोडलगायत चामल आवश्यक रहेका स्थानका लागि खरिद गर्ने भनेर प्रस्ताव माग गरेको थियो। तर टेण्डर प्रस्ताव नपरेपछि नयाँ खरिद मूल्य तोकेर टेण्डर माग्न लागिएको सुवेदीले बताए। अहिले टेण्डर आह्वान गरिएको भन्दा थप चामल खरिदका लागि पनि संचालक समितिमा छलफल भएको उनले बताए।
अहिले १० हजार मेट्रिक टन चामल खरिद गर्ने र त्यसको प्रगति पनि हेरेर थप खरिद गर्नुपर्ने अवस्था आएका त्यसका लागि प्रकृया अगाडि बढाउने विषयमा छलफल भइसकेको सुवेदीको भनाइ छ।
खाद्य व्यवस्था कम्पनीले पछिल्लो समय चामल बाहेक दाल, घ्यूलगायतका अन्य खाद्यान्न सामग्री पनि खरिद गर्न थालेको छ। नुन र खाने तेल पनि बिक्री वितरण गर्ने सोचमा कम्पनी छ। धान र चामल खरिदका लागि सरकारले वार्षिक रुपमा छुट्याएको रकमबाटै ती वस्तुहरु पनि खरिद गर्न लागिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
