कश्मीरको तस्बिर खिच्ने तीन भारतीय पत्रकारलाई पुलित्जर पुरस्कार

विश्व

नेपाल लाइभ मंगलबार, वैशाख २३, २०७७ १४:२७

एसोसिएट प्रेसका फोटो पत्रकार यासीन डार, मुख्तार खान र चन्नी आनन्द

काठमाडाैं- भारतका ३ फोटो पत्रकारलाई विश्वको सबैभन्दा प्रतिष्ठित पुलित्जर पुरस्कार दिइएको छ। तीनै जना जम्मू-कश्मीरका पत्रकार हुन्।

अघिल्लो वर्ष जम्मू-कश्मीरको विशेष दर्ता खारेज गर्ने नरेन्द्र मोदी सरकारको निर्णयपछिको अवस्था उनीहरुले फोटोमार्फत आम मानिसमा पुर्‍याएका थिए। फोटो पत्रकारहरु यासीन डार, मुख्तार खान र चन्नी आनन्दलाई फिचर फोटोग्राफीमा पुलित्जर दिइएको हो।

उनीहरु अन्तर्राष्ट्रिय न्युज एजेन्सी एशोसियट्स प्रेस (एपी)का लागि काम गर्ने गर्दछन्। यासीन र मुख्तर श्रीनगरमा बस्दै आएका छन भने आनन्द जम्मूका निवासी हुन्। चन्नी आनन्द पछिल्लो २० वर्षदेखि एपीमा आबद्ध रहेका छन्। पुरस्कार घोषणा भएपनि उनले आफूले विश्वास गर्न नसकिरहेको बताएका छन्।

साेमबार अबेर पुरस्कारको घोषणा भएको थियो। उनीहरुले कश्मीरी घाटीको सामान्य जनजीवन, प्रर्दशनकारी र सुरक्षाबलको तस्बिर विश्वभर पुर्‍याएका थिए। गत वर्ष ५ अगस्टमा भारतले जम्मू-कश्मीरले पाउँदै आएको अनुच्छेद ३७० खारेज गरेको थियो।

योसँगै पुरै प्रदेश केन्द्र शासित जम्मू-कश्मीर र लद्दाख अलग राज्यमा विभाजन भएका थिए। यसरी कश्मीरको विशेषाधिकार समाप्त गर्न अघि त्यहाँका नेताहरुलाई नजरबन्दमा राखिएको थियो। उक्त क्षेत्रमा एक महिनासम्म कर्फ्यू लागेको थियो भने टेलिफोन र इन्टरनेट सेवामा पनि रोक लागेको थियो।

न्युयोर्क टाइम्स, एन्कर डेली र प्रो पब्लिकलाई यो वर्षको पुलित्जर पुरस्कार दिइएको थियो। तीनैलाई अमेरिकामा भ्रष्टाचार, कानुन प्रर्वतन, यौन हिंसा र नस्लभेदजस्ता विषयमा खोजी पत्रकारिता गरेको भन्दै पुरस्कार दिइएको थियो।

न्युयोर्क टाइम्सले तीन पुरस्कार जितेको थियो। यसबाहेक द न्युर्योकर, द वासिंङ्टन पोष्ट, एशोसियट्स प्रेस, द लस एन्जलस टाइम्स, द बाल्टिमोर सन, द फिलिस्तिन हेराल्ड प्रेसलाई भिन्न-भिन्न समाचारका लागि पुलित्जर दिइएको छ।

पुलित्जर पुरस्कारको सुरुवात १९१७ मा भएको थियो। यो अमेरिकाको एक प्रमुख पुरस्कार हो। गत वर्ष न्युयोर्क टाइम्स र वाल स्ट्रिट जर्नललाई अमेरिकी राष्ट्रपति डोनाल्ड ट्रम्पको परिवारसँग जोडिएको जानकारी सार्वजनिक गराए बापत पुरस्कृत गरिएकाे थियाे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।