कोरोना भाइरस भ्याक्सिन : चीन र अमेरिका अघोषित ‘युद्ध’ मा

विश्व

नेपाल लाइभ मंगलबार, वैशाख २३, २०७७ १३:४७

तस्बिर : अंकटाड डट ओआरजी

एजेन्सी–यतिखेर विश्वका कैयौं मुलुक कोरोना भाइरसको भ्याक्सिन तयार पार्ने दौडमा छन्। यही दौडका क्रममा अमेरिका र चीनबीच ‘अघोषित युद्ध’ जस्तै छ। अमेरिकी अधिकारीहरु चीनले पहिला भ्याक्सिन तयार गरेमा यसको प्रयोग आर्थिक र कूटनीतिक सफलता हासिल गर्न सक्ने भन्दै डराइरहेका छन्।

विश्वका केही देशहरु भने एक-अर्काबीच सूचना साटासाट गर्दै भ्याक्सिनको तयारीमा काम गरिरहेका छन्। तर चीन र अमेरिका आ–आफ्नै हिसाबले भ्याक्सिन निर्माणको तयारीमा प्रयासरत छन्। रातदिन खटिइरहेका छन्। अमेरिकाको राष्ट्रिय सुरक्षासँग जोडिएका एक अधिकारीले कोरोनाको भ्याक्सिन तयार गर्ने मुलुकले विश्वमा शासन गर्ने बताए।

‘चीनलाई यो भ्याक्सिनको महत्व थाहा छ र जसले पहिला तयार गर्छ उसले विश्वभर शासन गर्ने निश्चित छ, ’ ती अधिकारीले भने।

पेन्टागन एवं सीआइएका पूर्व अधिकारी मेट क्रोएनिगले चीनले पठाउने हरेक सहयोगमा उसको स्वार्थ जोडिने गरेको आरोप लगाए। ‘यसकारण चीनले भ्याक्सिन प्रयोग आफ्नो प्रभाव विस्तार गर्न र अमेरिकालाई पछाडी पार्न प्रयोग गर्न सक्छ,’ क्रोएनिगले भने।

गत अप्रिलमा चीनले कोरोना भाइरसको एक भ्याक्सिनको सुरुवाती परीक्षण सफल रहेको जनाएको थियो। कोरोना भाइरसको सुरुवात पनि चीनको वुहानबाट भएको हो। त्यसकारण पनि कोरोना भ्याक्सिन उसले पहिला उत्पादन र परीक्षण गर्न समय पाउने छ र सम्भव पनि छ।

चीनले भ्याक्सिनको तयारी सुरुवाती दिनमै गरेको हुनसक्छ। अहिले चीनमाथि वुहानवाट भाइरस फैलाएको आरोप विश्वभरबाट लाग्दै आएको छ। यस्तोमा उसले भ्याक्सिन पहिला तयार गरेमा पुरानो छवि मेटाएर नयाँ बनाउन सक्ने अवसर हुने पनि देखिन्छ।

तर अमेरिकी अधिकारीहरु भने चीनले भ्याक्सिन निर्माणमा हालसम्म कुनै पनि सफलता हासिल नगरेको दाबी गर्छन्। राष्ट्रिय सुरक्षासँग आबद्ध एक अधिकारीले चीनले सधैं अर्को देशको शैली चोरी गर्ने गरेको आरोप लगाए। भ्याक्सिन पहिला तयार पार्दा कूटनीतिकभन्दा पहिला आर्थिक असर धेरै देखिन्छ। एशोसियसन अफ अमेरिकन मेडिकल कलेजका प्रमुख वैज्ञानिक रोस म्याकिन्नेले भ्याक्सिन तयार पहिला गर्ने देशले पहिला आफ्नो देशको जनसंख्या जोगाउने र आर्थिक रुपमा पनि खुल्ने बताए।