रुपन्देही– प्रदेश ५ का मुख्यमन्त्री शंकर पोखरेलले आज प्रदेशसभासामु सामाजिक–आर्थिक विकासको स्थितिपत्र सार्वजनिक गरेका छन्।
प्रदेशसभा बैठकमा स्थितिपत्र सार्वजनिक गर्दै उनले प्रदेश ५ मा २६ प्रतिशत जनता गरिबीको रेखामुनि रहेको जानकारी दिए।
१२ वटा जिल्ला रहेको यस प्रदेशमा समृद्धिका आधार र चुनौतीसमेत केलाउँदै मुख्यमन्त्री पोखरेलले चुनौतीको सामनापछि नमूनायोग्य प्रदेशका रुपमा रुपान्तरण गर्न सकिने विश्वास व्यक्त गरे।
उनले भने, ‘तराईका जिल्लाको उर्वरभूमि यस प्रदेशमा रहेकाले भरपर्दो सिँचाइको व्यवस्था भए त्यसबाट उल्लेखनीय परिवर्तन गर्न सकिन्छ।’
मुख्यमन्त्री पोखरेलले अव्यवस्थित जग्गा प्लटिङको शृङ्खलाले भूमिको खण्डीकरण भइरहेकामा चिन्ता व्यक्त गर्दै पहाडी क्षेत्रमा कृषियोग्य भूमि बाँझो अवस्थामा रहेको बताए।’
खुला सिमानाका कारण भारतबाट आउने कृषि उपजले स्वदेशमै उत्पादन हुने कृषि उपजलाई विस्थापन गरिरहेको सन्दर्भ अघि सार्दै उनले सहकारीको व्यवस्थापन र भौतिक पूर्वाधारको अभाव चुनौतीका रुपमा रहेको बताए।
१ सय ९ स्थानीय तह भएको प्रदेश ५ मा ४ उपमहानगरपालिका, ३२ नगरपालिका र ७३ गाउँपालिका रहेका छन्।
तराई क्षेत्रसमेत रहेको यस प्रदेशमा ७ हजार उचाइका हिमालसमेत रहेको छन्। रुकुम हिमाली जिल्लाका रुपमा रहेको छ।
९५ जातजाति रहेको यस प्रदेशमा ४४ लाख ५८ हजार २ सय ५३ जनसङ्ख्या रहेको छ जहाँ ५२ दशमलब ४३ प्रतिशत महिला र ४७ दशमलब ५७ प्रतिशत पुरुष रहेका छन्।
स्थितिपत्रमा उल्लेख भएअनुसार २ सय १० अर्ब बराबरको गार्हस्थ उत्पादन हुने यस प्रदेशमा ४६ दशमलब ५ प्रतिशत कृषि क्षेत्रको योगदान रहेको छ।
यो प्रदेश दाल र तेलहनमा पहिलो स्थानमा रहेको छ भने माछा उत्पादनमा दोस्रो स्थानमा रहेको छ। खाद्यान्न उत्पादन गरेर निर्यात गर्नसक्ने अवस्थामा पनि त्यत्तिकै रहेको छ।
शिक्षा, स्वास्थ्य, खानेपानी, शौचालयलगायतका सामाजिक तथा आर्थिक विकासका सूचकाङ्कहरु पनि स्थितिपत्रमा समेटिएका छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766663453.png)
-1764146706.png)
-1766648928.png)
-1763721444.png)
