काठमाडौं- शनिबार ४ बजे बस्ने नेकपा सचिवालय बैठकका लागि आ-आफ्नो रणनीति बनाउन मुख्य नेताहरु तल्लीन छन्। प्रधानमन्त्री केपी शर्मा ओलीको कामकारबाहीबाट असन्तुष्ट समूह एकतिर छ भने अर्कोतिर ओली समर्थक छन्। यही बीचमा प्रधानमन्त्री ओलीले नयाँ प्रस्ताव ल्याएपछि शनिबारको बैठकलाई महत्त्वका साथ हेरिएको छ।
प्रधानमन्त्री ओलीले सम्भावित रणनीतिका विषयमा आफू निकट नेता र कानुन व्यवसायीसँग छलफल गरिरहेका छन्। शनिबार बिहानै ओलीले आफू निकट नेतालाई प्रधानमन्त्री निवासमा बोलाएर सचिवालय बैठकका सम्बन्धमा परामर्श गरे। प्रधानमन्त्री ओलीले विवादको अन्त्य गर्न अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाललाई फकाइरहेका छन्।
छुट्टाछुट्टै भेटेर दुई नेताको जुगलबन्दी टुटाउने प्रयास समेत जारी छ। ओलीले प्रचण्ड र नेपाललाई आफ्नो पक्षमा पार्न संघका मन्त्री, प्रदेशका मुख्यमन्त्री फेरबदलदेखि लिएर सरकार सञ्चालनमा आफ्नो कार्यशैली परिवर्तन गर्नेसम्म बताइसकेका छन्। यी प्रयत्न सफल नभएपछि ओली शनिबारको बैठकमा नयाँ चाल चाल्न सक्ने सम्भावना छ।
पार्टीको सचिवालय, स्थायी कमिटी, केन्द्रीय कमिटी र संसदमा समेत ओली अल्पमतमा रहेको ओली इतर समूहको दाबी छ। ओली भने आफू कमजोर नरहेको सन्देश अनेक तरिकाले दिइरहेका छन्।
सचिवालय बैठकमा ओलीले कोरोना महामारी र आगामी आर्थिक वर्षको बजेट ल्याउनुपर्ने चटारोलाई प्रस्तुत गर्ने बुझिएको छ। यी चटारो सकिएपछि स्थायी कमिटी बैठक बोलाएर बाँकी कुरा गर्ने प्रस्ताव ल्याउने उनको तयारी छ। यो रणनीत सफल भयो भने ओलीको राजीनामा र विरोध तत्कालका लागि टर्नेछ। यस्तो प्रस्ताव आउन सक्ने विषयमा प्रचण्ड-नेपाल समूह जानकार छ।
यी बाहनामा आफ्नो राजीनामा केही दिन पर धकेल्न सकियो भने माहोल आफ्नो पक्षमा पार्न सकिन्छ भन्ने प्रधानमन्त्री ओलीको बुझाइ छ। ओली निकट नेताहरु पनि यतिबेला महामारी र बजेट भएकाले राजीनामा माग्न र दिन नहुने बताउँछन्।
ओलीनिकट नेकपा स्थायी कमिटी सदस्य सत्यनाराण मडण्डल महामारीका बेला राजीनामा माग्नु अनैतिक कुरा भएको तर्क गर्छन्। कोराना महामारीका बेला सबै एकजुट भएर लाग्नुपर्नेमा उल्टै सरकार फेरबदलमा लाग्दा जनतामा राम्रो सन्देश नजाने उनको भनाई छ। कसैले लहडको भरमा माग्दैमा प्रधानमन्त्री ओलीले राजीनामा दिन नहुने उनले बताए।
उता अर्का अध्यक्ष पुष्पकमल दाहाल ‘प्रचण्ड’ र वरिष्ठ नेता माधव नेपाल पक्षका नेताहरुले शुक्रबार बेलुका कोटेश्वरमा भेलागरी प्रधानमन्त्रीको तत्काल राजीनामा माग्ने र स्थायी कमिटी बैठक बोलाएर छलफल गर्ने निष्कर्ष निकालेको छ।
प्रधानमन्त्रीले राजीनामा दिन्छु भनिसकेकाले आज बस्ने सचिवालय वैठकले निर्णय गर्नुपर्ने माधव नेपाल निकट एक नेताले बताए। ‘हामीले भनेका होइन। उहाँले नै राजीनामा दिन्छु भन्नुभएको छ। आज बस्ने सचिवालय वैठकले निर्णय गर्नुपर्छ,’ उनले भने, ‘होइन भने पार्टी कमिटी बैठकमा राजीनामा दिन्छु भन्ने फेरि दिन्न भन्न मिल्छ? प्रधानमन्त्रीज्यूको आफ्नै कुराले झन घेराबन्दीमा पर्नुभएको छ।’
प्रचण्ड-नेपाल समूहका नेताहरुले प्रधानमन्त्रीको तत्काल राजीनामा गराएर पछि मात्रै प्रधानमन्त्रीको उम्मेदवार तय गर्ने योजनामा छ। शनिबार बस्ने सचिवालय बैठकले एउटा निकास दिनेगरी निर्णय गर्नुपर्ने स्थायी कमिटी सदस्य वेदुराम भुसालले बताए। तत्काल प्रधानमन्त्रीले निकास नदिए पार्टीमा थप विवाद बढ्न सक्ने उनको बुझाई छ।
प्रचण्ड-नेपाल समूह सचिवालयबाट राजीनामा गराएर स्थायी कमिटीबाट निर्णय गराउने रणनीतिमा लागेको छ। प्रधानमन्त्री ओली अनावश्यक रुपमा आफ्नो समूहमा खेल्न खोजेको उक्त समूहको बुझाई छ।
अर्को पार्टी फुटाउने गरी अध्यादेश ल्याउँदा पार्टीभित्रै ओलीको राजीनामा माग भएको हो। समाजवादी पार्टीलाई फुटाउन अध्यादेश ल्याइएको थियो भने उक्त पार्टीका सांसदलाई पार्टी फुटाउने योजनाअनुसार काठमाडौं ल्याइएको थियो। जसको पार्टीभित्र तीव्र बिरोध छ।
यसैगरी कोरोना नियन्त्रणका लागि मेडिकल सामग्री खरिद गर्दा ओलीनिकट केही मन्त्रीले भ्रष्टाचार गर्न खोजेको आरोप पनि लागेको थियो। सरकारले एकपछि अर्को विवादित काम गरेकाले राजीनामा निर्विकल्प भएको भुसालले बताए। ‘हामीले महामारीका बेला बैठक बस्ने समय भइसक्दा पनि यस्तो बेला बैठक बस्ने कुरा ठीक हुँदैन भनेर चुपचाप लागेर बसेका थियौं,’ भुसालले भने, ‘प्रधानमन्त्रीज्यू आफैं अध्यादेश ल्याएर विवाद गर्ने सरकार आफैं अनियमिततामा मुछिन थालेपछि प्रधानमन्त्रीको राजीनामा मागेका हौं।’
विवादकै घानमा एमसीसी
लामो समयदेखि विवादित विषय मिलेनियम च्यालेन्ज कर्पोरेशन (एमसीसी) कार्यदलको प्रतिवेदन शुक्रबार सार्वजनिक भयो। पार्टीमा प्रधानमन्त्रीको प्रतिवेदन राजीनामा माग भइरहेकै बेला झलनाथ खनाल नेतृत्वको कार्यदलले सार्वजनिक गरेपछि थप अर्को विवाद सिर्जना गरिएको छ।
प्रधानमन्त्री ओलीलाई थप दबाबमा राख्न विवादका बीच एमसीसी प्रतिवेदन घान हालिएको छ। एमसीसी प्रतिवेदन प्रधानमन्त्रीको ईच्छा विपरित सर्वजनिक गरिएको भन्ने विषयमा परराष्ट्र मन्त्री प्रदीप ज्ञावलीले असहमति राखिसकेका छन्। एमसीसी प्रतिवेदनले पार्टीमा प्रचण्ड नेपाल समूह बलियो ओली समूहलाई कमजोर बनाउने देखिएको छ।
विवाद बढ्दै जाँदा चिनिया राजदूतको सक्रियता
नेकपामा नेताहरुबीच विवाद बढ्दै जाँदा चिनियाँ राजदुत होउ याङछीले शुक्रबार अध्यक्ष प्रचण्ड र वरिष्ठ नेता नेपाललाई निवासमै गई भेट गरेकी थिइन्।
प्रधानमन्त्री ओलीको कार्यशैलीलाई लिएर पार्टीमा राजीनामा माग गरेपछि चिनियाँ राजदूत सक्रिय भएकी हुन्। राजनीतिक अस्थिरता हुनेगरी सत्ता परिवर्तनको खेलमा नलाग्न सुझाव दिएको बुझिएको छ।
चिनिया राजदूतको सक्रियताले प्रधानमन्त्री ओलीलाई नै सहयोग पुगेको आकलन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
