इबोलाको औषधि कोरोनाको उपचारमा प्रयोग गर्न एफडीएको स्वीकृति

विश्व

नेपाल लाइभ शनिबार, वैशाख २०, २०७७ ११:१२

एजेन्सी–अमेरिकाको फुड एण्ड ड्रग एडमिनिस्ट्रेसन (एफडीए)ले कोरोना भाइरसको आपतकालीन उपचारका लागि इबोलाको औषधि ‘रेमडेसिभिर’ प्रयोग गर्न स्वीकृति दिएको छ। यसको अर्थ इबोलाको उक्त एन्टीभाइरल औषधि अब कोभिड १९ का कारण अस्पताल भर्ना भएका बिरामीमा प्रयोग गर्न सकिनेछ। हालैका केही परीक्षणबाट कोरोनाबाट गम्भीर बिरामी भएकाहरुलाई यो औषधिले सन्चो भएको पाइएको थियो।

तर एफडीएको यो स्वीकृति औपचारिक नभई आपतकालीनमात्र भएको बताइएको छ। औपचारिक स्वीकृतिका लागि उच्चस्तरीय अध्ययन आवश्यक पर्ने बताइन्छ।

विज्ञहरुले इबोलाको उपचारका लागि गिलिइड फर्मास्युटिकल्सद्वारा उत्पादित यो औषधिलाई ‘जादूको चक्की’ का रुपमा नलिन सुझाव दिएका छन्।

डोनाल्ड ट्रम्पसँग ओभल अफिसमा भएको छलफलमा गिलिइडका प्रमुख कार्यकारी डानियल ओ डेले एफडीएको स्वीकृति महत्वपूर्ण कदम रहेको बताए। यसका लागि कम्पनीले १५ लाख भायल औषधि सहयोग गर्ने उनले बताए। कोरोनाको उपचारमा उक्त औषधि प्रयोग गर्नुपर्छ भन्ने पक्षमा ट्रम्प पनि छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।