राजपा अध्यक्ष मण्डलद्वारा समाजवादीसँगको एकतालाई सर्वसम्मत अनुमोदन

राजनीति

नेपाल लाइभ शुक्रबार, वैशाख १९, २०७७ ११:३२

काठमाडौं- राष्ट्रिय जनता पार्टीले समाजवादीसँगको एकतालाई अनुमोदन गरेको छ। पार्टीको अध्यक्ष मण्डलको बैठकले राजपा र समाजवादीबीचको एकताको सहमति पत्रलाई सर्वसम्मत अनुमोदन गरेको हो। अनुमोदनको लागि गत बैशाख १६ गते राजपा अध्यक्ष मण्डलको बैठक बसेको थियो।

दुवै पार्टीबीच गत बैशाख १० गते मध्यरातमा एकताको सहमति पत्रमा हस्ताक्षर भएको थियो। सहमतिपत्रमा राजपाका तर्फबाट महन्थ ठाकुर, राजेन्द्र महतो, राजकिशोर यादव तथा शरतसिंह भण्डारीले हस्ताक्षर गरेका छन्। समाजवादीका तर्फबाट डा बाबुराम भट्टराई, उपेन्द्र यादव, अशोक राई तथा राजेन्द्र श्रेष्ठले हस्ताक्षर गरेका थिए।

सहमति पत्रमा राजपा अध्यक्ष मण्डका बाँकी सदस्यहरु राजकिशोर यादव र अनिल झाको हस्ताक्षर नभएको र यो प्रक्रियामा प्रकट पनि नभएका कारण एकता प्रक्रियामा उनीहरुको धारणाबारे अन्यौल देखिएको थियो।

राजपा विधानमा ‘सामूहिक नेतृत्वको भावनालाई अंगिकार गर्दै अध्यक्ष मण्डलबाट गरिने निर्णय सर्वसम्मतिको आधारमा गरिने छ’ उल्लेख छ। त्यसैले पनि ती दुई अध्यक्षप्रति धेरैको चासो थियो। ‘पार्टीभित्र कुनै विवाद छैन। एकताप्रति पनि सबैको सहमति छ। त्यसको पुष्टि १६ गतेको सर्वसम्मत निर्णयले गरेको छ’, अध्यक्ष मण्डलका एक सदस्यले भने।

पार्टी नेतृत्वले एकतालाई सर्वसम्मत अनुमोदन गरेपछि निर्वाचन आयोगमा पार्टी एकता प्रक्रिया अगाडि बढाउन पार्टीलाई सहज हुने भएको छ।

एकताको सहमतिपत्रमा पार्टी एकीकरण समानताको आधारमा गरिने उल्लेख छ। त्यस्तै, एकीकृत पार्टीको नाम जनता समाजवादी पार्टी, नेपाल (People's Socialist Party, Nepal) हुने छ। एकीकृत पार्टीको झण्डा समाजवादी पार्टीले प्रयोग गर्दै आएको आयातकार आकारमा राता र हरियो रंगको बिचमा तारा हुने छ। साथै, एकीकृत पार्टीको चुनाव चिन्ह राजपा नेपालले प्रयोग गर्दै आएको छाता हुने छ।

राजपा र समाजवादीका नेताहरुले बैशाख ११ गते नै निर्वाचन आयोगमा पुगेर दल दर्ताको प्रक्रिया अघि बढाएका छन्। उनीहरुले त्यस दिन दल दर्ताको निवेदनसहित सहमति पत्र दर्ता गराएका थिए। बाँकी प्रक्रिया लकडाउनपछि सुरु हुने जानकारी दिइएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

क्षेप्यास्त्र प्रहारको सन्देश बुझ्न अमेरिकालाई रूसको चेतावनी

बिआरआईमा अनुदान मात्र स्वीकार्यः नेता निधि

सडक फोहोर गरेको भन्दै एमालेलाई महानगरको १ लाख जरिवाना