सप्तकोशीमा ९७ आरडिटी टेस्टमा सबै रिपोर्ट काेराेना नेगेटिभ

कोरोना अपडेट

दिनेश शर्मा सोमबार, वैशाख ८, २०७७ १२:३५

सप्तरी– कोरोना भाइरस (कोभिड–१९)को आशंका बढेपछि सप्तरीको सप्तकोशी नगरपालिकामा र्‍यापिड डायग्नोस्टिक टेस्ट (आरडिटी) परीक्षणलाई निरन्तरता दिइएको छ। मेयर उत्तमकुमार गौतम, ४ नम्बरका वडाध्यक्ष बद्रिनारायण चौधरीलगायतका जनप्रतिनिधिसहित आइतबार ९७ जनामा गरिएको परीक्षणमा सबैको रिपोर्ट नेगेटिभ आएको छ।

सप्तकोशी नगरपालिका २, सिद्धिपुरमा ६६ तथा वडा नं. ४ र १० गरी कूल ३१ जनाको आरडिटी गरिएको थियाे। उनीहरु सबैको रिपोर्ट नेगेटिभ आएको जिल्ला स्वास्थ्य कार्यालय सप्तरीका निमित्त प्रमुख दुनियाँलाल यादवले बताए।

यसअघि शनिबार वडा नं. १ फत्तपुर (पारुहाङ्ग चौक)का ७५ जनाको आरडिटी गरिएको थिए। सप्तकोशीमा कूल १७२ जनाको आरडिटी गरिएको छ। जसमध्ये स्थानीय ७१ वर्षीय पुरुषमा कोरोना पोजेटिभ देखिएको थियो। उनलाई परिवारका दुई सदस्यसहित राजविराजको गजेन्द्रनारायण सिंह अस्पतालको आइसोलेसनमा राखिएको छ। उनीहरुको स्वाब संकलन गरी आइतवार पिसिआर परीक्षणका लागि धरानस्थित बिपी कोइराला स्वास्थ्य विज्ञान प्रतिष्ठना पठाइएको छ।

सप्तरीका कूल ८ जनाको स्वाबको नमुना परीक्षणका लागि पठाइएको अस्पतालका प्रमुख मेडिकल सुपरिटेन्डेन्ट चुमनलाल दासले बताए।

त्रियुगा नगरपालिका– ३ भुल्केस्थित मस्जिदमा फेला परेका कोरोना संक्रमितले आश्रय लिएको पाइएपछि सप्तकोशी नगरपालिकाका विभिन्न स्थानमा आरडिटी टेस्ट सुरु गरिएको थियो। उनीहरु सप्तकोशी १ को पारुहाङ्ग चौक, वडा नं. २ को सिद्धिपुर र वडा नं. ४ को वलार्दहको मस्जिदमा गरी करिव १० दिन बसेको पुष्टि भएको छ।

भारतीय नागरिक सप्तरीको वोदेबर्साइन नगरपालिका– ५ जाँजरमा फागुन ३ तीनदेखि ५ दिनसम्म भएको धार्मिक सम्मेलनमा सहभागी हुन आएका थिए। उनीहरु सप्तकोशी नगरपालिकाका विभिन्न मस्जिद हुँदै उदयपुरको चौदण्डिगढी नगरपालिका ५ स्थित सिवाई मस्जित पुगेका थिए। त्यहाँ ५ दिन बसेपछि त्रियुगा नगरपालिका प्रवेश गरेको पाइएको हाे।

संक्रमितहरुले सप्तकोशीमा भएका तीन वटै मस्जिदमा समय बिताएको पाइएपछि सिङ्गो नगरवासी त्रसित छन्। कोरोना संक्रमित व्यक्तिहरु बसेर गएको प्रमाणित भएपछि वडा कार्यालयहरुले आ–आफनो वडा सिल गरेका गरेका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।