नयाँ दिल्ली (एजेन्सी)- एसएस राजामौली निर्देशित 'बाहुबली' शृंखलाका दुवै फिल्मले दक्षिण भारतीय अभिनेता प्रभासलाई विश्वव्यापी आइकन बनायो। ३८ वर्षीय प्रभास भारतका चर्चित अविवाहितहरुको सूचीमा पर्छन्।
'बाहुबली' फिल्ममा व्यस्त भएकाले उनले पछिल्लो ५ वर्षमा विवाहको कैयौं प्रस्ताव पन्छाइरहे। फिल्मको सुटिङ सकिए लगत्तै उनको विवाहको प्रसंग समाचारमा छाउन थालेको थियो, जुन अझै पनि जारी छ। यसैबीच, प्रभासले दक्षिण भारतीय सुपरस्टार चिरञ्जीवीकी भतिजी निहारिका कोनिडेलासँग विवाह गर्न लागेको खबर आइरहेको छ। तर, चिरञ्जीवीले यो खबर अफवाह मात्र भएको भन्दै खण्डन गरेका छन्।
प्रभास र निहारिकाबीच करिब १४ वर्षको अन्तर छ। यी दुईको विवाहको खबर पछिल्लो समय भुसको आगो झैं फैलियो। तर, यी तमाम चर्चालाई खण्डन गर्दै चिरञ्जीवीले आधिकारिक विज्ञप्ति नै जारी गरेका थिए, 'निहारिका अहिले आफ्नो करिअरमा केन्द्रित छिन्। विवाहको बारेमा परिवारले अहिले सोचेको समेत छैन।'
को हुन् निहारिका कोनिडेला?
२४ वर्षीया निहारिका अभिनेत्री र निर्मात्री हुन्। उनी अभिनेता तथा निर्माता नागेन्द्र बाबूकी छोरी र तेलुगु सुपरस्टार चिरञ्जीवीकी भतिजी हुन्। उनले आफ्नो करिअरको सुरुवात २०१६ मा तेलुगु फिल्म 'ओका मानुसु' बाट गरेकी थिइन्। उनले आफ्नो ब्यानर 'पिङ्क एलिफेन्ट पिक्चर्स' मार्फत कैयौं फिल्म निर्माण गरिसकेकी छन्। निहारिकाले तेलुगु डान्स रियालिटी शो समेत सञ्चालन गरेकी थिइन्।
उनी पछिल्लो समय लक्ष्मण कार्या निर्देशित फिल्म 'हेप्पी वेडिङ' को सुटिङमा व्यस्त छिन्। यसका साथै उनी चिरञ्जीवीको फिल्म 'स्या रा' मा विशेष भूमिकामा देखिँदै छिन्। फिल्ममा अमिताभ बच्चन, नयनतारा मुख्य भूमिकामा छन्। प्रभास भने पछिल्लो समय दुबईमा श्रद्धा कपुरसँग फिल्म 'साहो' को सुटिङमा व्यस्त छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
