चीनले दक्षिण कोरियासँग हवाइसेवा रोकेपछि मेडिकल सामाग्री नेपाल पठाउन समस्या

कोरोना अपडेट

नेपाल लाइभ शुक्रबार, चैत १४, २०७६ १५:१२

काठमाडौं- चीन र दक्षिण कोरियाबीचको हवाई सेवा स्थगन भएपछि दक्षिण कोरियामा रहेका नेपालीले पठाउन लागेको मेडिकल सामग्री नेपाल ल्याउन समस्या उत्पन्न भएको छ।

चीनले बिहीबार सूचना जारी गर्दै कोरोना संक्रमण फैलिएका देशमा हवाई सेवा रोक्ने जनाएको थियो। चीनको उक्त कदमले दक्षिण कोरियाबाट चीन हुँदै नेपाल पठाउन लागिएको कोरोना परीक्षणको किट ल्याउने प्रक्रियामा समस्या उत्पन्न भएको छ।

दक्षिण कोरियास्थित गैरआवासीय नेपाली संघको पहलमा कोरोना परीक्षणमा प्रयोग हुने किट पठाउन लागिएको थियो। कोरियाबाट हवाइमार्गमार्फत् चीन पठाएको मेडिकल सामग्रीलाई नेपालबाट गएको विमानले ल्याउने पूर्वतयारी भएको थियो। तर, चीनको पछिल्लो निर्णयले स्वास्थ्य उपकरण कोरियाबाट चीन पठाउन नसकिने अवस्था आएको एनआरएन कोरिया च्याप्टरका अध्यक्ष यज्ञराज सुवेदीले जानकारी दिए।

अत्यावश्यक मेडिकल सामग्री पठाउन संस्थाले आर्थिक संकलन गरी सामान खरिद गर्ने तयारीमा थियो। ‘एक व्यक्ति, एक किट’ अभियान सुरु भएसँगै कामका लागि कोरिया गएका युवा तथा अन्य पेशाकर्मी र व्यवसायीले आर्थिक सहयोग गरेका थिए।

एनआरएन कोरियाको आह्वानपछि हालसम्म ९५ लाख रुपैयाँ संकलन भइसकेको संस्थाका महासचिव विमल सुवेदीले जानकारी दिए। अभियान आइतबारसम्म सञ्चालन गर्ने बताइएको छ। अभियानमा त्यहाँ रहेका ३८ सय बढी नेपालीले सहयोग गरेका छन्।

आइतबारसम्म एक करोडभन्दा बढी रकम संकलन हुने अपेक्षा रहेको उनले बताए। चीनको बाटो हुँदै सामाग्री नेपाल पठाउन समस्या आएपछि अन्य विकल्पको खोजी भएको अध्यक्ष सुवेदीले जानकारी दिए। संकलित रकमबाट २० हजारप्रति किट र अन्य सामाग्री रहेको उनले बताए।

कोरियामा निर्मित कोरोना भाइरस किट उच्च प्रविधि उक्त भएको बताइएको छ। कोरोना भाइरसको परीक्षणको नतिजा तीन घन्टामा निस्कने उक्त किटसँगै पिपिई र लेजर थर्मोमिटरसमेत नेपाल पठाउन छलफल भइरहेको एनआरएन कोरियाका संस्थापक अध्यक्ष केपी सिटौलाले जानकारी दिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

गायिका मङ्गेशकरको स्वर रहेको ‘बाचुन्जेलीलाई’ सार्वजनिक

राष्ट्रसङ्घीय मानवअधिकार परिषद्बाट इजरायल अलग

‘फेरि रेशम फिलिली’ टिजरमा अमेरिका मोहको कथा