काठमाडौं– अनुशासन समितिको स्पष्टिकरण पत्रले नेपाली कांग्रेसको शीर्ष तहकाे थप विवाद सतहमा आएको छ। पूर्वराज्यमन्त्रीसमेत रहेका कैलालीका पुष्करनाथ ओझालाई दोस्राेपटक स्पष्टिकरण सोधिएपछि संस्थापन र वरिष्ठ नेता रामचन्द्र पौडेल पक्षबीच विवाद उत्पन्न भएको छ।
१९ फागुनमा अनुशासन समितिले ओझालाई पत्र लेखि कारबाही किन नगर्ने भनि जवाफ माग गरेको थियो। तीन दिनभित्र जवाफ पठाउन पत्राचार गरिएपनि ओझाले उत्तर फर्काएका छैनन्।
ओझालाई गत निर्वाचनमा कांग्रेसको आधिकारिक उम्मेदवार हराउन भूमिका खेलेको आरोप लागेको छ। गत भदौमा अनुशासन समितिले पहिलोपटक पत्र पठाउँदै स्पष्टिकरण सोधेको थियो। दुई महिनापछि ओझाले अनुशासन समितिलाई स्पष्टिकरण पठाएका थिए।
नेपाली कांग्रेसको ‘आधिकारिक उम्मेदवारलाई चुनावी सहयोग गर्ने/नगर्ने आफ्नो क्षेत्राधिकार भएको भन्दै एक कार्यक्रममा बोलेको अडियो’ प्राप्त भएको अनुशासन समितिले जनाएको छ। सोहि अडियोको आधारमा स्पष्टिकरण चित्त बुझ्दो नभएको उल्लेख गर्दै कारबाहीको सिफारिस गर्ने अनुशासन समितिको तयारी थियो।
आफ्नो समूहका नेतालाई कारबाहीको प्रक्रिया सुरु गरेपछि वरिष्ठ नेता पौडेल ओझाको पक्षमा उभिएका छन्। शुक्रबार विज्ञप्तिमार्फत पौडेलले कारबाहीको नाटक मञ्चन गरिएको आरोप लगाए। ‘आफूलाई मन परेन भन्दैमा अन्दाजको भरमा आरोप’ लगाएको उनले विज्ञप्तिमा उल्लेख गरेका छन्।
सभापति शेरबहादुर देउवा पत्नी आरजु राणा उम्मेदवार बनेको कैलाली ५ मा ओझाले अन्तर्घात गरेको उजुरी परेको थियो। कारबाहीको सिफारिस गर्न अनुशासन समितिका सबै सदस्यको सहमति हुनुपर्ने क्षेत्राधिकार पार्टी केन्द्रीय समितिले दिएको छ। संस्थापन पक्षले एकतर्फी रुपमा कारबाही प्रक्रिया अघि बढाएको भन्दै संस्थापनइतर समूहले आपत्ति जनाएको छ। ओझा सहित संस्थापनइतरका महेन्द्र मल्ल र रामबहादुर विष्टलाई अनुशासन समितिले स्पष्टिकरण सोधेको थियो। मल्ल बाँकेका स्थानीय नेता हुन् भने विष्ट डडेल्धुराका कार्यालय सचिव हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
