काठमाडौं- नेपाली कांग्रेसका महामन्त्री डा शशांक कोइरालाले पार्टीलाई थप क्षति हुन नदिन सभापतिलाई विगतमा सहयोग गर्दै आएको प्रष्ट्याएका छन्।
सभापति शेरबहादुर देउवालाई शुक्रबार बुझाएको पत्रमा महामन्त्री कोइरालाले पार्टीका धेरै साथीहरुको आलोचना सहँदै सभापतिलाई सहयोग गरेको उल्लेख गरेका छन्।
देउवा निवास बुढानिलकण्ठ पुगेर महामन्त्री कोइराला र नेता डा मिनेन्द्र रिजालले बुझाएको पत्रमा सभापतिकै पछिल्ला निर्णयका कारण पार्टीको बैठकमा सहभागी नभएको खुलाएका छन्। पत्रमा भनिएको छ, ‘पार्टीभित्र विवाद बढ्दै जाँदा केन्द्रीय कार्यसमितिका पछिल्ला केही बैठकमा म पनि सहभागी हुन नसक्ने परिस्थिति निर्माण भएको छ।’
सभापति देउवाले गठन गरेका विभाग र मनोनित आमन्त्रित केन्द्रीय समितिको निर्णयप्रति समेत महामन्त्री कोइरालाले आपत्ति जनाएका छन्। बैठकमा सहभागी हुने वातावरण निर्माण गर्न छलफल जारी रहेकै समय विभाग गठन र आमन्त्रित केन्द्रीय सदस्य मनोनयनले पार्टीभित्रको वातावरण बिग्रिएको उनले जनाएका छन्। ‘कुराकानी भइरहेको बखतमा विधानमा तोकिए बाहेकका विभाग बनाइनु, पार्टीका केही साथीहरुलाई केन्द्रीय समिति सदस्य र आमन्त्रित सदस्यहरुको मनोनयन गरिनुले पार्टीभित्र एकताको वातावरण थप बिथोलिएको मेरो बुझाइ छ।’ पत्रमा भनिएको छ। १४ औं महाधिवेशनका कार्यक्रमहरु समेत तय भइसकेपछि एकतर्फी रुपमा निर्णय गर्नुलाई कोइरालाले महाधिवेशनको निष्पक्षता र सुनिश्चिततालाई गम्भीर रुपमा प्रभावित गर्न सक्ने आशंका गरेका छन्।
नवलपरासी जिल्लाका कार्यवाहक सभापतिलाई हटाइएकोप्रति पनि कोइरालाले आपत्ति जनाएका छन्। अर्जुन पोख्रेललाई कार्यवाहक सभापतिबाट हटाएर देउवाले आफूनिकटका विष्णुप्रसाद पौडेललाई उक्त जिम्मेवारी दिएका थिए। पोखरेललाई नै कार्यवाहक सभापति बनाउन सभापतिलाई सुझाइएको छ।
सभापतिले पोख्रेललाई हटाएपछि देउवासँग चिढिएको वरिष्ठ नेता रामचन्द्र पौडेलपक्षले बुधबार बैठक गरी विरोध जनाएको थियो। उक्त निर्णयको विरोध गर्दै सभापतिसँग भेटेर आफ्नो पक्षको तर्फबाट पत्र बुझाउन महामन्त्री कोइरालालाई जिम्मेवारी दिइएको थियो।
कोइरालाले सभापति देउवालाई शुक्रबार साँझ बुझाएको पत्र जस्ताको तस्तैः
आदरणीय श्री शेरबहादुर देउवा
सभापति,
नेपाली कांग्रेस ।
विषय : नवलपरासी (वर्दघाट सुस्ता पश्चिम) जिल्ला नेतृत्व सम्बन्धमा।
२०७६ साल फाल्गुण २३ गते तपाईंद्वारा हस्ताक्षरित पत्रद्वारा नेपाली कांग्रेसको विधान, २०१७ (संशोधन सहित) को धारा २५ (७) बमोजिम श्री विष्णुप्रसाद पौडेललाई नवलपरासी (वर्दघाट सुस्ता पश्चिम) को जिल्ला सभापतिले पार्टीको विधान अनुसार गर्न पाउने कार्य गर्न गराउन उक्त जिल्लाको पार्टी संगठन संचालनको जिम्मेवारी प्रदान गरिएको भन्ने जानकारी प्राप्त भयो । सो पत्र नेपाली कांग्रेसको मौजुदा विधानको व्यवस्था प्रतिकूल हुने कुरा तल बुँदागत रुपमा उल्लेख गरेको छु । साथै, राजनीतिक रुपमा पनि यो कार्यले गम्भीर सांगठनिक विवाद सृजना गरेको कुरामा ध्यान आकृष्ट गर्न यो पत्र लेख्दैछु ।
१) नवलपरासी जिल्ला विभाजनपश्चात नवलपरासी (वर्दघाट सुस्ता पश्चिम) मा रिक्त रहेको सभापति पदमा नेपाली कांग्रेसको विधानको धारा ५० को उपधारा (८) बमोजिम साविक नवलपरासी जिल्ला कार्यसमितिका उपसभापति श्री अर्जुन पोख्रेललाई कार्यवाहक सभापतिको जिम्मेवारी दिइएको हो। कार्यवाहक सभापति हुन नेपाली कांग्रेसको विधानको धारा १२ (५) (क) (१) बमोजिम १० वर्ष क्रियाशील सदस्य रहेको महाधिवेशन प्रतिनिधि भन्ने व्यवस्था आकर्षित हुँदैन। यो व्यवस्था सभापतिको उम्मेदवार हुनका लागि मात्रै हो।
२) धारा ५० (८) ले सम्बन्धित तहको अधिवेशन तोकिएको अवस्थामा वा महाधिवेशन तोकिएको अवस्थामा वा ६ महिनाभित्र महाधिवेशनको मिति नै तोकिएमा सभापतिका लागि अलग्गै निर्वाचन गर्नुपर्ने छैन भन्ने व्यवस्था गरेको छ। यस व्यवस्थाले नयाँ अधिवेशन गर्न सक्ने वा पाउने अवस्था देखिएन र विधानबमोजिम कार्यवाहक सभापति हुँदाहुँदै नयाँ सभापति तोक्ने हामीसँग कुनै वैधानिक बाटो छैन।
३) तपाईंद्वारा प्रेषित परिमार्जित पत्रमा उल्लेख भएको विधानको धारा २५ (७) जिल्ला नेतृत्व छनौटका सन्दर्भमा आकर्षित हुने देखिँदैन। यो धारा संगठनका निकाय गठनका सम्बन्धमा व्यवस्था गरिएको होइन। यो धाराको तत्काल परिआएका कार्यका लागि मात्रै आकर्षित हुन्छ, नेतृत्व छनौटका लागि विधानले अन्य धारामा प्रष्ट व्यवस्था गरेको कुरा माथि नै उल्लेख गरिसकेको छु।
४) नवलपरासी (वर्दघाट सुस्ता पश्चिम) जिल्लाको नेतृत्वका विषयमा पार्टीका केन्द्रीय पदाधिकारीहरुको बैठकले श्री अर्जुन पोख्रेल कार्यवाहक सभापति रहेको विषयलाई सर्वसम्मतीले निर्णय गरेको कुरा हामी सबैको स्मृतिमा रहेको छ भन्ने विश्वास राख्दछु। साथै, कार्यवाहक सभापति श्री अर्जुन पोखरेलकै नेतृत्वमा नवलपरासी (वर्दघाट सुस्ता पश्चिम) जिल्लामा स्थानीय तह, प्रदेश र संघीय तहको निर्वाचन सम्पन्न भएको र सम्पूर्ण सांगठनिक समायोजन कार्यहरु पूरा भई त्यसको अभिलेख समेत केन्द्रीय कार्यालयमा रहेको यहाँलाई अवगत नै छ।
५) नेपाली कांग्रेसका विधानको धारा ४५ मा भएको व्यवस्थाअनुरुप कुनै कारणले पार्टीका कुनै पनि निकायमा रिक्त हुन आउने स्थानका लागि यस विधानमा अन्यथा व्यवस्था भएकोमा बाहेक जुन प्रक्रियाबाट निर्वाचित भएको हो सोही प्रक्रियाद्वारा पदपूर्ति गरिने व्यवस्था रहेकाले कार्यवाहक सभापति विधानबमोजिम जिम्मेवारी निर्वाह गरिरहेको अवस्थामा नयाँ निर्णय गर्ने कुनै कारण देखिँदैन।
आदरणीय सभापतिज्यू,
आम निर्वाचनपछि पार्टीमा उत्पन्न विवादबाट पार्टीलाई थप क्षति नहोस् भनेर मैले धेरै साथीहरुको आलोचना सहँदै सभापतिज्यूलाई सहयोग गरेको हुँ। तर पार्टीभित्र विवाद बढ्दै जाँदा केन्द्रीय कार्यसमितिका पछिल्ला केही बैठकमा म पनि सहभागी हुन नसक्ने परिस्थिति निर्माण भएको छ। यस्तो परिस्थितिको अन्त्य गरी हामी सबै बैठकमा सहभागी हुने वातावरण निर्माण गर्न हामीबीच छलफल र कुराकानी भइरहेको बखतमा विधानमा तोकिए बाहेकका विभाग बनाइनु, पार्टीका केही साथीहरुलाई केन्द्रीय समिति सदस्य र आमन्त्रित सदस्यहरुको मनोनयन गरिनुले पार्टीभित्र एकताको वातावरण थप बिथोलिएको मेरो बुझाइ छ।
अन्य विषयमा असहमति भए तापनि हामीले पार्टीको १४ औं महाधिवेशनको प्रक्रिया प्रारम्भ गरिसकेका छौं । महाधिवेशनका कार्यक्रमहरु समेत तय भइसकेका छन्। तर, एकाङ्की रुपमा हुने निर्णयले पार्टीको १४ औं महाधिवेशनको निष्पक्षता र सुनिश्चितता गम्भीर रुपमा प्रभावित हुन्छ। महाधिवेशन हामी सबैको साझा आयोजना हो। यो सर्वोच्च आयोजनामा पार्टीका सबै साथीहरुको उत्साहपूर्ण सहभागिताको आवश्यकता पर्दछ।
विधानको व्यवस्थाअनुसार सभापतिको काम, कर्तव्य र अधिकार पार्टीको आदर्श, सिद्धान्त र मर्यादालाई उच्च राख्ने र राख्न लगाउने हो। देशमा सबै राजनीतिक पार्टी र आम नागरिकसामु नेपाली कांग्रेसको सञ्चालन पद्धतिलाई अनुकरणीय रुपमा कायम राख्नु हामी सबैको कर्तव्य हो। पार्टीको समग्र नेतृत्व गर्ने जिम्मेवारी सभापतिज्यू स्वयंको रहेको कुरा मनन गर्नुहुन सादर अनुरोध गर्दछु।
तसर्थ, नवलपरासी (वर्दघाट सुस्ता पश्चिम) जिल्ला विधानको व्यवस्थाबमोजिम श्री अर्जुनकुमार पोख्रेल कार्यवाहक सभापति रहेको जिल्ला कार्यसमितिलाई नै यथावत कायम राख्नुहुन अनुरोध गर्दछु।
जय नेपाल!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787723619.jpg)
-1786602170.png)
