शीर्ष नेतासँग बामदेवको गुनासो-ममाथि फेरि अन्याय नहोस्

राजनीति

वीरेन्द्र ओली शुक्रबार, फागुन ३०, २०७६ २०:२७

काठमाडौ–उपाध्यक्ष बामदेव गौतमलाई राष्ट्रिय सभामा लैजाने विषयमा सत्तारुढ नेपाल कम्युनिष्ट पार्टी (नेकपा) भित्र तीव्र ध्रुवीकरण भएको छ। गौतमलाई राष्ट्रिय सभामा पठाउने सचिवालय निर्णय नमान्ने प्रधानमन्त्री केपी ओलीको घोषणाले पार्टीभित्र तरंग पैदा हुँदा नेताहरुबीच दौडधुप चलेको छ।

गौतमलाई राष्ट्रिय सभामा लैजाने विषयमै छलफल गर्न वरिष्ठ नेता माधवकुमार नेपाल र स्वयं बामदेव गौतम शुक्रबार सबेरै खुमलटारस्थित प्रचण्डनिवास पुगेका थिए।

अध्यक्ष पुष्पकमल दाहाल निवासमा नेता गौतमले आफूलाई पार्टीभित्र पटक–पटक धोका भएको गुनासो गर्दै अब पनि शीर्ष नेताहरुको स्वार्थको शिकार हुने त होइन भन्दै संशय प्रकट गरेका थिए।

खुमलटार स्रोतका अनुसार गौतमले आफूले देश र आफ्नो दलका लागि लामो समयदेखि निस्वार्थ र एउटा सच्चा सिपाहीजस्तै काम गरिरहेको प्रसंग उठाउँदै गर्दै अबका दिनमा आफूलाई अन्याय हुन नहुने बताएका थिए। गौतम बोलिरहँदा अध्यक्ष प्रचण्ड र वरिष्ठ नेता नेपालले स्वीकृतिजनक भाव प्रकट गरेका थिए।

नेता गौतमका भनाइको जवाफमा अध्यक्ष प्रचण्डले ‘प्रधानमन्त्री अस्पतालमा नै रहेकाले यो विषय दलभित्र कुरा गर्न अझै केही दिन लाग्न सक्ने’ बताएका थिए भने नेता नेपालले ‘आफू दलभित्रका सबै विषयमा मध्यस्थता गर्न सधैं तयार रहेको र कसैलाई पनि अन्याय हुन नदिने पक्षमा रहेको’ भनाइ राखेका थिए।

सोही बैठकका विषयमा प्रतिक्रिया लिन खोज्दा गौतम सम्पर्कमा आउन चोहनन्।

गौतमका पक्षमा भने प्रचण्डसहित वरिष्ठ नेता नेपाल, झलनाथ खनाललगायत उभिएका छन्।

दौडधुप र ध्रुवीकरणकै बीच नेता नेपाललाई फकाउन ओली पक्षधर नेता इश्वर पोखरेल दुई पटक नेपाल निवास पुगिसकेका छन्। ओली समूहका अन्य नेताहरू भूमीश्वर ढकाल, बलराम अधिकारी, महेश बस्नेत लगायतपनि नेपाललाई नजिक ल्याउन प्रयासरत छन्।

अध्यक्ष प्रचण्डले आफंै राष्ट्रपति विद्यादेवी भण्डारीलाई भेटेर गौतमको पक्षमा विश्वास दिलाउन खोजेका छन् भने प्रवक्ता नारायणकाजी श्रेष्ठले नेपाललाई निवासमै गई पटक÷पटक भेटिसकेका छन्।

यस्तै गत बुधबार तत्कालीन सञ्चारमन्त्री गोकुल बाँस्कोटाको घरमा विप्लवसमूहले बम विस्फोट गराएपछि प्रचण्डले कडा प्रतिक्रिया जनाउँदै विज्ञप्ति जारी गरेका थिए। उनले घटनामा ‘आतंककारी समूह’ संलग्न भएको भन्दै भत्र्सना गरेका थिए। यसलाई ओलीको सान्त्वना बटुल्ने प्रचण्ड प्रयासका रुपमा समेत विश्लेषण गरिएको छ।

गौतमलाई राष्ट्रिय सभामा सिफारिस गर्ने र मिलेनियम च्यालेन्ज कर्पोेरेशन (एमसीसी) का विषयमा शीर्ष नेताहरु नै विभाजित हुँदा गुटकै गठबन्धनमा फेरबदल आउन सक्ने विश्लेषण गर्न थालिएको छ। तर, नेताहरु तत्काल गठबन्धनमै फेरबदल आउने गरी विश्वासको वातावरण भईनसकेको दाबी गरेका छन्।

नेपाललगायत नेताको ‘नाडी छाम्दै’ प्रचण्ड

अध्यक्ष प्रचण्डले अर्का अध्यक्ष ओलीसँग सहकार्य गर्दै आए पनि नेपाललगायत अरु नेताहरुको नाडी छाम्दै आएका छन्। ओलीविरुद्ध नेपाल, खनाल र गौतम भएकाले दीर्घकालिन गठबन्धन गर्न सकिन्छ या सकिँदैन भन्ने सम्बन्धमा विचार बुझ्दै आएका छन्। ओली प्रधानमन्त्री हुँदासम्म पार्टीमा आफ्नो अनुकूल निर्णय र शक्ति प्रयोग गर्न नसकिने देखेपछि नेपाललगायत नेताको नाडी छाम्ने गरेको पूर्व एमालेवृत्तको बुझाइ छ। तर, नेपालले ओलीसँग पटक–पटक धोका पाइसकेका छन् भने प्रचण्डलाई पनि विश्वास गर्न सकेका छैनन्।

यदि विश्वासको वातावरण हुँदै गएमा आन्तरिक गठबन्धनमा फेरबदल आउनसक्ने देखिन्छ । जसमा प्रचण्ड–नेपाल गठबन्धन एकातिर र अर्कोतिर ओली एक्लै हुन सक्ने देखिन्छ। यसो हुन नसके अहिलेकै गठबन्धनले निरन्तरता पाउनेछ।

तर, नेकपा स्थायी कमिटी सदस्य मणि थापा अहिले नै ओली–प्रचण्डको गठबन्धन तोड्ने स्थिति आउन नसक्ने बताउँछन्। यदि यो गठबन्धन भत्किए पार्टी एकतासमेत भत्किन सक्ने थापाको आँकलन छ।

माधव नेपालनिकट वेदुराम भुसालले पनि अहिलेको नेपाल–प्रचण्ड गठबन्धन तत्कालका एजेण्डामा मात्रै गरिएको बताए। ‘अहिले गौतमजीलाई राष्ट्रिय सभामा पठाउने, एमसीसीलगायत मुद्धामा मिल्ने विषयमा एक भएका छौ,’ भुसालले भने, ‘तर, अहिले बाहिर अनेक तवरले आफ्नै तरिकाले विश्लेषण गर्न थालियो। त्यो विश्लेषण गर्नेलाई नै जिम्मा दिनु पर्छ।’

सचिवालय बैठकपछि ओली–प्रचण्डको भेटै भएको छैन

नेकपाको १८ फागुनको सचिवालय बैठकपछि ओली र प्रचण्डबीच भेट भएको छैन। सोही बैठकले गौतमलाई राष्ट्रिय सभामा पठाउने निर्णय गरेको थियो। त्यसमा ओलीले आपत्ति जनाएका थिए।

ओली दोस्रो पटक मिर्गौला प्रत्यारोपण गर्न १९ फागुनमा त्रिवि शिक्षण अस्पताल भर्ना भएका थिए। अध्यक्ष प्रचण्ड ओलीलाई भेट्न प्रत्यारोपणको अघिल्लो दिन २० गते राति ९ बजे अस्पताल पुगेका थिए। तर, चिकित्सकले ओलीलाई भेट्दा संक्रमण हुन सक्छ भनेपछि सामान्य स्वास्थ्य स्थितिको जानकारी लिएर फर्किएका थिए।

भोलिपल्ट प्रचण्डले आफूलाई रुघाखोकी लागेको भन्दै चार दिनसम्म भेटघाट नै बन्द गरेका थिए। त्यसपछि एकै पटक २५ फागुनमा चितवनमा हुने विभिन्न कार्यक्रममा सहभागी भएका थिए। लगत्तै चितवनबाट फर्किएका प्रचण्ड राष्ट्रपतिदेखि आफ्नै पार्टीका नेताहरुसँगको भेटघाटलाई बढाएका थिए। ओली सफल मिर्गौला प्रत्यारोपणपछि शुक्रबार साँझ निवास फर्किसकेका छन्।